VIDEO: ಮಾಸ್ಕ್​​​​ ತೆಗೆಯದೆ ತಿಂಡಿ ತಿನ್ನುವ ಸುಲಭ ವಿಧಾನ ಹೇಳಿಕೊಟ್ಟ ಬ್ರಿಟಿಷ್​ ಮಾಡೆಲ್​...!

ಇಡೀ ವಿಶ್ವ ಕರೊನಾ ವಿರುದ್ಧ ಹೋರಾಡುತ್ತಿದೆ. ಸದ್ಯ ಜಗತ್ತಿನ ಮಂತ್ರ, ಮಾಸ್ಕ್​ ಧರಿಸಿ, ಸಾಮಾಜಿಕ ಅಂತರ ಕಾಯ್ದುಕೊಳ್ಳಿ. ಸಾಧ್ಯವಾದಷ್ಟು ಮನೆಯಲ್ಲೇ ಇರಿ...

ಆದರೆ ಮಾಸ್ಕ್​ ಧರಿಸಿಕೊಂಡೇ ಇರುವುದು ಅಷ್ಟು ಸುಲಭವಲ್ಲ. ಏನಾದರೂ ತಿನ್ನುವಾಗಲಾದರೂ ಅದನ್ನು ಕೈಯಿಂದ ಮುಟ್ಟಿ ತೆಗೆಯಲೇಬೇಕು.

ಆದರೆ ಬ್ರಿಟಿಷ್​ ರೂಪದರ್ಶಿ ಎಮ್ಮಾ ಲೂಯಿಸ್​ ಕನ್ನೊಲಿ ಅವರು ಮಾಸ್ಕ್​ನ್ನು ಕೈಯಿಂದ ತೆಗೆಯದೆ, ತಿಂಡಿ ತಿನ್ನುವುದು ಹೇಗೆಂದು ತೋರಿಸಿಕೊಟ್ಟಿದ್ದಾರೆ. ವಿಡಿಯೋ ನೋಡಿದ ಅವರ ಅಭಿಮಾನಿಗಳು, ನೆಟ್ಟಿಗರು ಹುಬ್ಬು ಮೇಲೇರಿಸಿದ್ದಾರೆ.

ಕಳೆದ ಕೆಲವು ದಿನಗಳ ಹಿಂದೆ ಒಂದು ಸಣ್ಣ ವಿಡಿಯೋವನ್ನು ಎಮ್ಮಾ ಇನ್ಸ್ಟಾಗ್ರಾಂನಲ್ಲಿ ಶೇರ್​ ಮಾಡಿಕೊಂಡಿದ್ದಾರೆ. ಅವರು ಅದೇನನ್ನೋ ಬಾಯಿಗೆ ಹಾಕಿಕೊಳ್ಳುತ್ತಾರೆ. ಆದರೆ ತಾವು ಧರಿಸಿದ್ದ ಮಾಸ್ಕ್​ನ್ನು ತೆಗೆಯುವುದಿಲ್ಲ. ತೆಗೆಯುವುದು ಬಿಡಿ ಅದನ್ನು ಮುಟ್ಟುವುದೂ ಇಲ್ಲ.

ಅದು ತುಂಬ ಸಿಂಪಲ್​ ವಿಧಾನ. ಎಮ್ಮಾ ಲೂಯಿಸ್​ ಎರಡು ಮಾಸ್ಕ್​ಗಳನ್ನು ಧರಿಸಿದ್ದಾರೆ. ಪೊಂದು ಮಾಸ್ಕ್​ ಅವರ ಮೂಗಿನ ಮೇಲೆ ಇದ್ದರೆ, ಇನ್ನೊಂದು ಅವರ ಗಲ್ಲದ ಮೇಲಿದೆ. ಇದೆರಡೂ ಮಾಸ್ಕ್​ಗಳು ಅರ್ಧ ಭಾಗ ಬಾಯಿಯನ್ನು ಮುಚ್ಚಿವೆ. ಸುಮ್ಮನೆ ಬಾಯಿ ತೆರೆದರೆ ಸಾಕು ಮಾಸ್ಕ್​​ಗಳು ಸರಿಯುತ್ತವೆ. ಆಗ ಸುಲಭವಾಗಿ ಬೇಕಾಗಿದ್ದನ್ನು ತಿನ್ನಬಹುದು. ವಿಡಿಯೋ ಶೇರ್​ ಮಾಡಿದ ರೂಪದರ್ಶಿ, ಮನಸಿದ್ದಲ್ಲಿ ಮಾರ್ಗ ಎಂದು ಕ್ಯಾಪ್ಷನ್​ ಬರೆದಿದ್ದಾರೆ.

ವಿಡಿಯೋ ಫನ್ನಿಯಾಗಿ ಇದ್ದು, ಈಗಾಗಲೇ ಮೂರು ಲಕ್ಷಕ್ಕೂ ಅಧಿಕ ವೀವ್ಸ್ ಬಂದಿದೆ. ಈ ವಿಧಾನವನ್ನು ನೆಟ್ಟಿಗರು ಮೆಚ್ಚಿಕೊಂಡು ಕಾಮೆಂಟ್​ ಮಾಡಿದ್ದಾರೆ. ಇನ್ನೂ ಕೆಲವರು, ನಮಗೆ ನಗು ತಡೆಯಲು ಸಾಧ್ಯವಾಗುತ್ತಿಲ್ಲ ಎಂದು ಹೇಳಿದ್ದಾರೆ. (ಏಜೆನ್ಸೀಸ್​)