ಗಂಭೀರ ಕಾಯಿಲೆಗೆ ಚಿಕಿತ್ಸೆ, ಕೆಲಸ ಕಳೆದುಕೊಂಡು ಅತಂತ್ರರಾದವರು, ಹಾಸ್ಟೆಲ್ ಇಲ್ಲದೆ ಸಮಸ್ಯೆ ಎದುರಿಸಿರುವ ವಿದ್ಯಾರ್ಥಿಗಳು, ಗರ್ಭಿಣಿಯರಿಗೆ ಆದ್ಯತೆ ಮೇಲೆ ರಾಜ್ಯದೊಳಗೆ ಕರೆಸಿಕೊಳ್ಳುವ, ಉಳಿದವರಿಗೆ ನಂತರ ಅವಕಾಶ ನೀಡುವ ಸಂಬಂಧ ರಾಜ್ಯ ಸರ್ಕಾರ ಆದೇಶ ಹೊರಡಿಸಿತ್ತು. ಇಷ್ಟರ ನಡುವೆ ದೊಡ್ಡ ಪ್ರಮಾಣದಲ್ಲಿ ಹೊರ ರಾಜ್ಯದವರ ಆಗಮನದಿಂದ ಸೋಂಕಿತರ ಸಂಖ್ಯೆ ಗಣನೀಯವಾಗಿ ಹೆಚ್ಚಾಗಿದೆ. ಅವರೆಲ್ಲರನ್ನೂ ಕ್ವಾರಂಟೈನ್ಗೊಳಪಡಿಸಿದರೂ ಜಿಲ್ಲಾಡಳಿತಗಳು ಸಾಕಷ್ಟು ಶ್ರಮ ಹಾಕಬೇಕಾಗಿದೆ. ಪ್ರತಿಯೊಬ್ಬರ ಮೇಲೂ ನಿಗಾ ವಹಿಸಿ ಕಣ್ಗಾವಲು ಇಡಬೇಕಾಗಿದೆ. ಸೋಂಕು ಇಲ್ಲದ ಹಸಿರು ವಲಯದಲ್ಲೂ ಸೋಂಕು ಕಾಣಿಸಿದೆ. ಸಹಜವಾಗಿ ಜನರು ಭಯಭೀತರಾಗುತ್ತಾರೆ ಮತ್ತು ಜಿಲ್ಲಾಡಳಿತ ಪೂರ್ಣ ಪ್ರಮಾಣದಲ್ಲಿ ಸೋಂಕಿತರ ನಿರ್ವಹಣೆ ಬಗ್ಗೆ ಕೆಲಸ ಮಾಡ ಬೇಕಾಗುತ್ತದೆ. ಈ ಕಾರಣಕ್ಕೆ ಕೆಲ ದಿನಗಳ ಕಾಲ ಹೊರ ರಾಜ್ಯದವರನ್ನು ನಿಯಂತ್ರಿಸುವುದೇ ಒಳಿತು ಎಂದು ಜಿಲ್ಲಾಡಳಿತಗಳು ಅಭಿಪ್ರಾಯಪಟ್ಟಿದ್ದವು.
