ಭಾರತ-ನೇಪಾಳ ಗಡಿಯಲ್ಲಿ ಗಡಿ ಗುರುತಿಸುವ ಪಿಲ್ಲರ್​ಗಳು ಮಾಯ!

ಬರೇಲಿ: ವಿವಾದಿತ ಪ್ರದೇಶಗಳನ್ನು ತನ್ನದೆಂದು ಹೇಳಿಕೊಂಡು ನೇಪಾಳ ಸಂಸತ್​ನ ಕೆಳಮನೆಯಲ್ಲಿ ಪರಿಷ್ಕೃತ ನಕ್ಷೆಗೆ ಅನುಮೋದನೆ ಪಡೆದುಕೊಂಡ ಬೆನ್ನಲ್ಲೇ ಭಾರತ ಮತ್ತು ನೇಪಾಳದ ಗಡಿಯನ್ನು ಗುರುತಿಸಲು ಹಾಕಲಾಗಿದ್ದ ಸಾಕಷ್ಟು ಸಂಖ್ಯೆಯ ಪಿಲ್ಲರ್​ಗಳು ಮಾಯವಾಗಿವೆ ಎಂದು ಸಶಸ್ತ್ರ ಸೀಮಾ ಬಲ್​ನ (ಎಸ್​ಎಸ್​ಬಿ) ಅಧಿಕಾರಿಗಳು ಕೇಂದ್ರ ಗೃಹ ಸಚಿವಾಲಯಕ್ಕೆ ತಿಳಿಸಿದ್ದಾರೆ.

ಉತ್ತರ ಪ್ರದೇಶದ ಲಖಿಂಪುರ್​ ಖೇರಿ ಜಿಲ್ಲಾಧಿಕಾರಿಗೂ ಈ ಬಗ್ಗೆ ಮಾಹಿತಿ ನೀಡಿರುವ ಎಸ್​ಎಸ್​ಬಿ, ಗಡಿ ಗುರುತಿಸುವಿಕೆಯ ಪಿಲ್ಲರ್​ಗಳನ್ನು ತೆಗೆದುಹಾಕಿರುವ ನೇಪಾಳದ ಸಶಸ್ತ್ರ ಪಹರಿ ಬಲ್​ (ಎಸ್​ಪಿಬಿ) ಆ ಪ್ರದೇಶಗಳಲ್ಲಿ ಹೊಸ ಹೊರಠಾಣೆಗಳನ್ನು ನಿರ್ಮಿಸಿಕೊಂಡಿದೆ ಎಂದು ಹೇಳಿದ್ದಾರೆ.

ಲಖಿಂಪುರ್​ ಖೇರಿ ಜಿಲ್ಲೆಯಲ್ಲಿ ಹಾದು ಹೋಗಿರುವ ಭಾರತ-ನೇಪಾಳದ 62.9 ಗಡಿ ಭಾಗದ ಭದ್ರತೆ ಹೊಣೆಗಾರಿಕೆಯನ್ನು ಎಸ್​ಎಸ್​ಬಿಯ 39ನೇ ಬೆಟಾಲಿಯನ್​ ವಹಿಸಿಕೊಂಡಿದೆ. ಎಸ್​ಎಸ್​ಬಿಯ ಕಮಾಂಡಂಟ್​ ಮುನ್ನಾ ಸಿಂಗ್​ ಅವರು ನೇಪಾಳದ ಅತಿಕ್ರಮಣವನ್ನು ವಿವರಿಸಿ ಲಖಿಂಪುರ್​ ಖೇರಿಯ ಜಿಲ್ಲಾಧಿಕಾರಿ ಶೈಲೇಂದ್ರ ಸಿಂಗ್​ ಅವರಿಗೆ ಪತ್ರ ಬರೆದಿದ್ದಾರೆ.

ಇದನ್ನೂ ಓದಿ: ಹೆತ್ತ ಒಡಲ ಕಿರುಕುಳಕ್ಕೆ ಬೇಸತ್ತು ಆತ್ಮಹತ್ಯೆ ಮಾಡಿಕೊಂಡಳೇ ಬಾಲೆ?

ಎಷ್ಟು ಪಿಲ್ಲರ್​ಗಳನ್ನು ಕಿತ್ತುಹಾಕಲಾಗಿದೆ ಎಂಬ ಬಗ್ಗೆ ಮಾಹಿತಿ ನೀಡಲು ಸಾಧ್ಯವಿಲ್ಲ. ಅದು ತುಂಬಾ ಗೌಪ್ಯ ಸಂಗತಿ ಎಂದು ಕಮಾಂಡಂಟ್​ ಮುನ್ನಾಸಿಂಗ್​ ಸುದ್ದಿಗಾರರಿಗೆ ಹೇಳಿದ್ದಾರೆ.

ಖೇರಿ ಜಿಲ್ಲೆಯು ನೇಪಾಳದ ಕಾಂಚನಪುರ ಜಿಲ್ಲೆ ಮತ್ತು ಕೈಲಾಲಿ ಜಿಲ್ಲೆಗಳೊಂದಿಗೆ ಗಡಿಭಾಗವನ್ನು ಹಂಚಿಕೊಳ್ಳುತ್ತದೆ. ಬಿಹಾರದಲ್ಲಿ ಹಾದು ಹೋಗಿರುವ ಭಾರತ-ನೇಪಾಳೆ ಗಡಿ ಭಾಗದಲ್ಲಿ ಇತ್ತೀಚೆಗೆ ನೇಪಾಳದ ಸಶಸ್ತ್ರ ಪೊಲೀಸರು ನಡೆಸಿದ್ದ ಗುಂಡಿನ ದಾಳಿಯಲ್ಲಿ ಬಿಹಾರದ ಒಬ್ಬ ರೈತ ಮೃತಪಟ್ಟಿದ್ದರು. ಜತೆಗೆ ಇನ್ನಿಬ್ಬರು ಗಾಯಗೊಂಡಿದ್ದರು. ಈ ಘಟನೆಯ ನಂತರದಲ್ಲಿ ನೇಪಾಳದೊಂದಿಗಿನ ಗಡಿ ಭಾಗದಲ್ಲಿ ಭಾರತ ಪಹರೆಯನ್ನು ಹೆಚ್ಚಿಸಿದೆ.

https://www.vijayavani.net/sushant-singh-rajput-had-donated-rs-1-crore-for-kerala-flood-relief/