ವೇಶ್ಯಾವಾಟಿಕೆ ದಂಧೆ ನಡೆಸುತ್ತಿದ್ದ ಬಾಲಿವುಡ್​ ಕಾಸ್ಟಿಂಗ್​ ಡೈರೆಕ್ಟರ್​ ಬಂಧನ; ಆತನನ್ನು ಪೊಲೀಸರು ಬಲೆಗೆ ಬೀಳಿಸಿದ್ದು ಹೇಗೆ ಗೊತ್ತಾ?

ಮುಂಬೈ: ನಗರದಲ್ಲಿ ವೇಶ್ಯಾವಾಟಿಕೆ ದಂಧೆ ನಡೆಸುತ್ತಿರುವ ಆರೋಪದ ಮೇಲೆ ಬಾಲಿವುಡ್ ಕಾಸ್ಟಿಂಗ್​ ಡೈರೆಕ್ಟರ್​ (ಪಾತ್ರಗಳ ಬಗ್ಗೆ ಕಲಾವಿದರಿಗೆ ವಿವರಿಸುವವ) ಓರ್ವನನ್ನು ಮುಂಬೈ ಪೊಲೀಸರು ಬಂಧಿಸಿದ್ದಾರೆ.

ಕಾಸ್ಟಿಂಗ್​ ನಿರ್ದೇಶಕ ನವೀನ್​ ಕುಮಾರ್​ ಪ್ರೇಮಲಾಲ್​ ಆರ್ಯಾ ಎಂಬಾತನನ್ನು ಬಂಧಿಸಿದ ಮುಂಬೈ ಪೊಲೀಸ್​ ಸಾಮಾಜಿಕ ಸೇವಾ ಬ್ರ್ಯಾಂಚ್​ ಅಧಿಕಾರಿಗಳು ಇಬ್ಬರು ಜ್ಯೂನಿಯರ್​ ಆರ್ಟಿಸ್ಟ್​ಗಳನ್ನು ರಕ್ಷಣೆ ಮಾಡಿದ್ದಾರೆ.

ನವೀನ್​ ಕುಮಾರ್​ ಕಳೆದ 5 ವರ್ಷಗಳಿಂದಲೂ ವೇಶ್ಯಾವಾಟಿಕೆ ದಂಧೆ ನಡೆಸುತ್ತಿದ್ದ. ಆತನ ಸ್ನೇಹಿತರಾದ ಅಜಯ್​ ಶರ್ಮಾ ಮತ್ತು ವಿಜಯ್​ ಎಂಬುವರು ಸಹಾಯ ಮಾಡುತ್ತಿದ್ದರು. ಈತ ಓರ್ವ ಮಹಿಳೆಗೆ 60,000ರೂ.ಬೆಲೆ ಕಟ್ಟುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ಅನಾಮಿಕ ವ್ಯಕ್ತಿಯೋರ್ವರು ನೀಡಿದ ಸುಳಿವಿನ ಆಧಾರದ ಮೇಲೆ ಎಸ್​ಎಸ್​ಬಿ ಇನ್ಸ್​ಪೆಕ್ಟರ್​ ಸಂದೇಶ್​ ರೇವಾಲೆ ಅವರು ನವೀನ್​ಕುಮಾರ್​ನನ್ನು ಬಂಧಿಸಲು ಯೋಜನೆ ರೂಪಿಸಿದರು.

ಈ ಬಗ್ಗೆ ಮಾಹಿತಿ ನೀಡಿದ ಅಧಿಕಾರಿ, ನಮ್ಮೊಂದಿಗೆ ಕೈಜೋಡಿಸಿದ ವ್ಯಕ್ತಿಯೋರ್ವ ನವೀನ್​ ಕುಮಾರ್​ಗೆ ಕರೆ ಮಾಡಿದ್ದರು. ಅಂತೆಯೇ ಸಿನಿಮಾ ಇಂಡಸ್ಟ್ರಿಯಲ್ಲಿ ರೂಪದರ್ಶಿ ಹಾಗೂ ಕಲಾವಿದರಾಗಿ ಕೆಲಸ ಮಾಡುತ್ತಿರುವ ಇಬ್ಬರು ಹುಡುಗಿಯರನ್ನು ಕಳಿಸಲು ಆತ ಒಪ್ಪಿಕೊಂಡ. ಅದಕ್ಕಾಗಿ ಆತ ಒಬ್ಬೊಬ್ಬೊರಿಗೂ 60,000 ರೂ.ಬೇಡಿಕೆ ಇಟ್ಟ. ಹಾಗೇ ಹೋಟೆಲ್​ನಲ್ಲಿ ಅಡ್ವಾನ್ಸ್​ ಆಗಿ ರೂಂ ಬುಕ್​ ಮಾಡಲು ತಿಳಿಸಿದ.

ನವೀನ್​ ಕುಮಾರ್​ ಹೇಳಿದಂತೆ ಇಬ್ಬರು ಹುಡುಗಿಯರೊಂದಿಗೆ ಮೊದಲೇ ಹೇಳಿದ ಸ್ಥಳಕ್ಕೆ ಬಂದ. ನಾವು ಕೂಡಲೇ ಆತನನ್ನು ಬಂಧಿಸಿದೆವು ಎಂದು ತಿಳಿಸಿದ್ದಾರೆ.

ಕಾಸ್ಟಿಂಗ್​ ಡೈರೆಕ್ಟರ್​ನನ್ನು ವಿಚಾರಣೆಗೆ ಒಳಪಡಿಸಲಾಗಿದೆ. ಈ ವೇಳೆ ದೆಹಲಿಯ ಯುವತಿಯೋರ್ವಳು ವೇಶ್ಯಾವಾಟಿಕೆ ದಂಧೆಯಲ್ಲಿ ಸಕ್ರಿಯವಾಗಿದ್ದು ಗೊತ್ತಾಗಿದೆ ಎಂದಿದ್ದಾರೆ. (ಏಜೆನ್ಸೀಸ್)