ಇನ್ನು, ‘ಸಪ್ತ ಸಹೋದರಿ’ಯರೆಂದೇ ಕರೆಯಲಾಗುವ ಈಶಾನ್ಯದ ಏಳು ರಾಜ್ಯಗಳಿಗೆ, ಅಲ್ಲಿನ ಸಮಸ್ಯೆಗಳಿಗೆ, ಆ ಜನರ ಆಶೋತ್ತರಗಳಿಗೆ ಹಿಂದಿನ ಕೇಂದ್ರ ಸರ್ಕಾರಗಳು ಸ್ಪಂದಿಸಿದ್ದು ವಿರಳ. ಹಾಗಾಗಿ, ಸ್ವಾಭಾವಿಕವಾಗಿಯೇ ಅಲ್ಲಿನ ಜನರಲ್ಲಿ ನಿರಾಸೆ ಮಡುಗಟ್ಟಿ, ಅದು ಆಕ್ರೋಶವಾಗಿ ಮಾರ್ಪಟ್ಟಿತ್ತು. ಕಳೆದ ಐದು ವರ್ಷಗಳಲ್ಲಿ ಈ ಏಳು ರಾಜ್ಯಗಳ ಮೂಲಸೌಕರ್ಯ ಅಭಿವೃದ್ಧಿಗೆ ದಿಟ್ಟ ಕ್ರಮಗಳನ್ನು ಕೈಗೊಂಡ ಬಳಿಕ, ಅಲ್ಲಿ ಹೊಸ ಆಶಾವಾದ ಹುಟ್ಟಿಕೊಂಡಿದೆ. ಆದರೂ, ಅಶಾಂತಿಗೆ ಕಾರಣವಾಗಿದ್ದ ಬೋಡೋ ಬಣಗಳು ಸೇರಿ ಕೆಲವು ಸಂಘಟನೆಗಳ ಚಟುವಟಿಕೆಗಳು ಆತಂಕಕ್ಕೆ ಕಾರಣವಾಗಿದ್ದವು. ಆ ನಿಟ್ಟಿನಲ್ಲೂ ಸಮಾಧಾನದ ಸುದ್ದಿಯೊಂದು ಹೊರಬಿದ್ದಿದೆ. ಶಾಂತಿ ಸ್ಥಾಪನೆ ಹಿನ್ನೆಲೆಯಲ್ಲಿ ಕೇಂದ್ರ ಸರ್ಕಾರ ನಿಷೇಧಿತ ನ್ಯಾಷನಲ್ ಡೆಮಾಕ್ರಟಿಕ್ ಫ್ರಂಟ್ ಆಫ್ ಬೋಡೋಲ್ಯಾಂಡ್ (ಎನ್ಡಿಎಫ್ಬಿ)ನ ಎಲ್ಲ ಬಣಗಳ ಪ್ರತಿನಿಧಿಗಳೊಂದಿಗೆ ಸೋಮವಾರ ತ್ರಿಪಕ್ಷೀಯ ಒಪ್ಪಂದಕ್ಕೆ ಸಹಿ ಹಾಕಿದೆ. ಗೃಹ ಸಚಿವ ಅಮಿತ್ ಷಾ ಮತ್ತು ಅಸ್ಸಾಂ ಮುಖ್ಯಮಂತ್ರಿ ಸರ್ಬಾನಂದ್ ಸೊನೊವಾಲ್ ಸಮ್ಮುಖದಲ್ಲಿ ಒಪ್ಪಂದಕ್ಕೆ ಸಹಿ ಹಾಕಲಾಗಿದೆ. ಬೋಡೋ ಉಗ್ರರ ಸಂಘಟನೆಯ ಅನೇಕ ಬಣಗಳು ಹಲವು ವರ್ಷಗಳಿಂದ ನಡೆಸುತ್ತಿದ್ದ ಹಿಂಸಾಚಾರ ಈ ಮೂಲಕ ಕೊನೆಯಾಗಲಿದೆ. ಅಲ್ಲದೆ, ‘ಪ್ರತ್ಯೇಕ ಬೋಡೋಲ್ಯಾಂಡ್’ ಬೇಡಿಕೆ ಕೂಡ ಅಂತ್ಯಗೊಳ್ಳಲಿದೆ. ಇದೇ ತಿಂಗಳ 30ರಂದು 1550 ಉಗ್ರ ಸಂಘಟನೆಗಳ ಸದಸ್ಯರು 130 ಶಸ್ತ್ರಾಸ್ತ್ರಗಳೊಂದಿಗೆ ಶರಣಾಗಲಿರುವುದು, ಮಹತ್ವದ ವಿದ್ಯಮಾನ. ‘ಎನ್ಡಿಎಫ್ಬಿಯ ಎಲ್ಲ ಬಣಗಳು ಹಿಂಸೆ ತೊರೆಯುವ ನಿರ್ಧಾರ ತೆಗೆದುಕೊಂಡಿದ್ದು, ಉಗ್ರರಿಗೆ ನೀಡಲಾಗಿರುವ ಭರವಸೆಯನ್ನು ಕಾಲಮಿತಿಯಲ್ಲಿ ಈಡೇರಿಸಲಾಗುವುದು’ ಎಂದು ಷಾ ಪ್ರತಿಕ್ರಿಯಿಸಿದ್ದಾರೆ.
