ಬೆಂಗಳೂರು: ಕರೊನಾ ಸಂಕಷ್ಟ ಕಾಲದಲ್ಲಿ ಸರ್ಕಾರ ಮಾಡಿರುವ ಕೆಲಸವಲ್ಲದೆ, ಒಂದು ಪಕ್ಷವಾಗಿ ಏನೇನು ಕಾರ್ಯ ಕೈಗೊಳ್ಳಲಾಗಿದೆ ಎನ್ನುವುದರ ಕುರಿತು ವಿವರವಾದ ವರದಿ ನೀಡುವಂತೆ ಬಿಜೆಪಿ ಹೈಕಮಾಂಡ್ ತಾಕೀತು ಮಾಡಿದ್ದು, ಬಿಜೆಪಿ, ರಿಪೋರ್ಟ್ ಕಾರ್ಡ್ ರೆಡಿ ಮಾಡಿದೆ. ನೊಂದವರ ಕಷ್ಟಕ್ಕೆ ಸ್ಪಂದಿಸುತ್ತಿರುವ ಬಿಜೆಪಿ ರಾಜ್ಯ ಘಟಕ, ಮಾ.29ರಿಂದ ಈವರೆಗೆ 20,14 ಜನರಿಗೆ ಆಹಾರ ಪೊಟ್ಟಣ, 5.96 ಲಕ್ಷ ಕುಟುಂಬಗಳಿಗೆ ರೇಷನ್ ಕಿಟ್ ವಿತರಿಸಿದೆ ಎಂದು ಪಕ್ಷದ ಅಧ್ಯಕ್ಷ ನಳೀನ್ಕುಮಾರ್ ಕಟೀಲ್ ತಿಳಿಸಿದ್ದಾರೆ. ಪ್ರಧಾನಿ ಮೋದಿ ಕರೊನಾ ಲಾಕ್ಡೌನ್ ಘೋಷಿಸಿದ ಬಳಿಕ ಬಿಜೆಪಿ 5 ಅಂಶಗಳಲ್ಲಿ ಸೇವಾ ಕಾರ್ಯ ಪ್ರಾರಂಭಿಸಿತು. ಪ್ರತಿ ದಿನ 2.14 ಲಕ್ಷ ಜನರಿಗೆ ಆಹಾರ ಪೊಟ್ಟಣ, ಒಂದು ವಾರಕ್ಕೆ ಆಗುವಷ್ಟು ಅಕ್ಕಿ, ಗೋಧಿ, ಹಿಟ್ಟು, ಸಕ್ಕರೆ, 1 ಲೀಟರ್ ಎಣ್ಣೆ, ಉಪು್ಪ ಮತ್ತು ಬೇಳೆ ವಿತರಿಸಲಾಗಿದೆ. 7 ಸಾವಿರ ಬೂತ್ಗಳಲ್ಲಿ ಮಾಸ್ಕ್ ತಯಾರಿಸಲಾಗಿದ್ದು, 15.15 ಲಕ್ಷ ಜನರಿಗೆ ವಿತರಣೆ ಮಾಡಲಾಗಿದೆ. ಸಹಾಯವಾಣಿ ಮೂಲಕ 1.24 ಲಕ್ಷ ಜನರ ವೈಯಕ್ತಿಕ ಸಮಸ್ಯೆಗಳಿಗೆ ಪರಿಹಾರ ನೀಡಲಾಗಿದೆ ಎಂದು ಅವರು ವಿವರಿಸಿದ್ದಾರೆ. ಪಿಎಂ ಕೇರ್ಸ್ ಸಹಾಯ ನಿಧಿ ಸಂಗ್ರಹಕ್ಕೆ 1.16 ಲಕ್ಷ ಕಾರ್ಯಕರ್ತರು, ರಾಜ್ಯದ ಸೇವಾ ಕಾರ್ಯಕ್ಕೆ 1.68 ಲಕ್ಷ ಕಾರ್ಯಕರ್ತರು ಸಕ್ರಿಯವಾಗಿದ್ದು, ಮನೆಗಳಿಂದಲೇ ದೂರವಾಣಿ ಮೂಲಕ ಕಾರ್ಯ ನಿರ್ವಹಣೆ ಮಾಡುತ್ತಿದ್ದಾರೆ ಎಂದು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
