ಈ ನಡುವೆ, ಬಿಜೆಪಿ ರಾಷ್ಟ್ರೀಯ ಸಂಘಟನಾ ಉಸ್ತುವಾರಿ ಬಿ.ಎಲ್. ಸಂತೋಷ್ ಮತ್ತು ಉತ್ತರ ಪ್ರದೇಶ ಉಸ್ತುವಾರಿ ರಾಧಾ ಮೋಹನ್ ಸಿಂಗ್ 20 ದಿನಗಳ ಅಂತರದಲ್ಲಿ 2ನೇ ಬಾರಿಗೆ ರಾಜ್ಯಕ್ಕೆ ಭೇಟಿ ನೀಡಿದ್ದು, ಸಿಎಂ ಯೋಗಿ, ಡಿಸಿಎಂಗಳಾದ ದಿನೇಶ್ ಶರ್ಮ ಮತ್ತು ಕೇಶವ್ ಪ್ರಸಾದ್ ಮೌರ್ಯ ಸೇರಿ ಹಿರಿಯ ಮುಖಂಡರೊಂದಿಗೆ ಸಭೆಗಳನ್ನು ನಡೆಸುತ್ತಿದ್ದಾರೆ. ಆರ್ಎಸ್ಎಸ್ ನಾಯಕರಾದ ದತ್ತಾತ್ರೇಯ ಹೊಸಬಾಳೆ ಮತ್ತು ಕೃಷ್ಣ ಗೋಪಾಲ್ ಅವರೂ ಸಭೆಯಲ್ಲಿ ಭಾಗಿಯಾಗಿದ್ದಾರೆ. ಮಿಷನ್ 300 ಯೋಜನೆ ಹಮ್ಮಿಕೊಂಡಿರುವ ಬಿಜೆಪಿ 403 ಸೀಟುಗಳಲ್ಲಿ ಕನಿಷ್ಠ 300 ಸೀಟುಗಳನ್ನು ಗೆಲ್ಲಬೇಕೆಂಬ ಲೆಕ್ಕಾಚಾರ ಹಾಕಿಕೊಂಡಿದೆ. ಬಿ.ಎಲ್. ಸಂತೋಷ್, ರಾಧಾ ಮೋಹನ್ ಸಿಂಗ್ ಹಿಂದಿನ ಭೇಟಿ ವೇಳೆ ಮುನ್ಸಿಪಲ್ ಕಾರ್ಪೆರೇಷನ್ ಮತ್ತು ರಾಜ್ಯದ ವಿವಿಧ ಆಯೋಗ, ನಿಗಮಗಳಿಗೆ ನೇಮಕಗಳು ನಡೆಯದ್ದರ ಬಗ್ಗೆ ಅತೃಪ್ತಿ ತೋಡಿಕೊಂಡಿದ್ದರು. ನಂತರ, ಕೆಲ ನೇಮಕಾತಿಗಳನ್ನು ಕೈಗೊಳ್ಳಲಾಗಿತ್ತು.
