ಪಂಚಜನ ಎಂಬ ಅಸುರ ಗುರುಪುತ್ರನನ್ನು ಸಂಹಾರ ಮಾಡಿದ್ದಾನೆ ಎಂದು ತಿಳಿದ ಕೃಷ್ಣ ಪಂಚಜನನನ್ನು ಸಂಹರಿಸುತ್ತಾನೆ. ಆದರೆ ಅವನ ಬಳಿ ಏನೂ ಸಿಗಲಿಲ್ಲ, ಶಂಖ ಸಿಕ್ಕಿದೆ. ಪಂಚಜನನ ಹೊಟ್ಟೆಯಲ್ಲಿ ಬಂದಿದ್ದರಿಂದಲೇ ಆ ಶಂಖಕ್ಕೆ ಪಾಂಚಜನ್ಯ ಎಂಬ ಹೆಸರು ಬಂದಿದೆ. ಅವನು ಶಂಖದ ಹುಳದ ರೂಪದಲ್ಲಿ ಇದ್ದ ಕಾರಣದಿಂದ ಅವನ ಹೊಟ್ಟೆಯಿಂದ ಶಂಖ ಪ್ರಕಟವಾಗಿದೆ. ವರುಣನಿಗೆ ದರ್ಶನ ಕೊಡಬೇಕಾಗಿತ್ತು. ಪಂಚಜನನ ಸಂಹಾರ ಮಾಡಿ ಪಾಂಚಜನ್ಯಶಂಖವನ್ನು ತಾನು ಸ್ವೀಕಾರ ಮಾಡಬೇಕಾಗಿತ್ತು. ಈ ಕಾರಣಕ್ಕಾಗಿ ಸಮುದ್ರಕ್ಕೆ ಹೋಗಿದ್ದಾನೆ. ಸಮುದ್ರದಲ್ಲಿ ಗುರುಪುತ್ರ ಇಲ್ಲ ಎನ್ನುವುದು ತಿಳಿದಿದ್ದರೂ ಈ ಎಲ್ಲ ಕಾರ್ಯಗಳನ್ನು ಜಗತ್ತಿಗೆ ತೋರಿಸುವುದಕ್ಕೆ ಶಂಖವನ್ನು ಹುಡುಕಲು ಹೋದಂತೆ ನಟನೆ ಮಾಡುತ್ತಾನೆ.
