ಸುಶಾಂತ್​ ಸಿಂಗ್​ ರಜಪೂತ್​ ಆತ್ಮಹತ್ಯೆ: ಐಷಾರಾಮಿ ಕಾರುಗಳಲ್ಲಿ ಬಿಹಾರ ಪೊಲೀಸರ ತಿರುಗಾಟ

ಮುಂಬೈ: ಬಾಲಿವುಡ್​ ನಟ ಸುಶಾಂತ್​ ಸಿಂಗ್​ ರಜಪೂತ್​ ಅವರ ಆತ್ಮಹತ್ಯೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ತನಿಖೆಗಾಗಿ ಮುಂಬೈಗೆ ಬಂದಿರುವ ಬಿಹಾರದ ನಾಲ್ವರು ಪೊಲೀಸರ ತಂಡ ಐಷಾರಾಮಿ ಬಿಎಂಡಬ್ಲ್ಯು, ಜಾಗ್ವಾರ್​ ಕಾರುಗಳಲ್ಲಿ ಓಡಾಡುತ್ತಿರುವುದು ಹಲವು ಹುಬ್ಬುಗಳನ್ನು ಮೇಲೇರುವಂತೆ ಮಾಡಿದೆ.

ಪ್ರಕರಣದ ತನಿಖೆಯಲ್ಲಿ ಬಿಹಾರ ಪೊಲೀಸರ ತಂಡಕ್ಕೆ ಮುಂಬೈ ಪೊಲೀಸರಿಂದ ಹೇಳಿಕೊಳ್ಳುವಂಥ ಸಹಕಾರ ದೊರೆಯುತ್ತಿಲ್ಲ. ಆದರೂ ಅವರು ತನಿಖೆಯನ್ನು ಮೊಟಕುಗೊಳಿಸಿ ಹಿಂದಿರುಗಲು ನಿರಾಕರಿಸುತ್ತಿದ್ದಾರೆ. ಕೆಲವೊಮ್ಮೆ ಆಟೋರಿಕ್ಷಾ ಇಲ್ಲವೇ ಮೋಟಾರ್​ಸೈಕಲ್​ಗಳನ್ನು ಬಳಸುತ್ತಿರುವ ಅವರು, ಹೆಚ್ಚಿನ ಭಾಗ ಐಷಾರಾಮಿ ಕಾರುಗಳನ್ನೇ ಬಳಸುತ್ತಿರುವುದು ಅಚ್ಚರಿಗೆ ಕಾರಣವಾಗಿದೆ.

ಸುಶಾಂತ್​ ಸಿಂಗ್​ ರಜಪೂತ್​ ಅವರ ಬ್ಯಾಂಕ್​ ಖಾತೆಯ ವಿವರ ಪಡೆದುಕೊಳ್ಳಲು ಬಾಂದ್ರಾದಲ್ಲಿರುವ ಕೋಟಕ್​ ಮಹೀಂದ್ರಾ ಬ್ಯಾಂಕ್​ಗೆ ಗುರುವಾರ ಬಂದಿದ್ದ ಬಿಹಾರ ಪೊಲೀಸರ ತಂಡ ಬಿಎಂಡಬ್ಲ್ಯು ಕಾರ್​ನಲ್ಲಿ ಬಂದಿತ್ತು. ಇವರು ಐಷಾರಾಮಿ ಕಾರಿನಲ್ಲಿ ಬ್ಯಾಂಕ್​ಗೆ ಬಂದ ವಿಷಯ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗುತ್ತಿರುವಂತೆ, ಆ ಕಾರನ್ನು ಬಿಟ್ಟು ಆಟೋರಿಕ್ಷಾದಲ್ಲಿ ಮರಳಿದರು ಎನ್ನಲಾಗಿದೆ.

ಇದನ್ನೂ ಓದಿ: ರಾಜಸ್ಥಾನದಲ್ಲಿ ‘ಕುದುರೆ ವ್ಯಾಪಾರ’ಕ್ಕೆ ಅನ್​ಲಿಮಿಟೆಡ್​ ಆಫರ್​; ವಿಧಾನಸಭೆ ಅಧಿವೇಶನ ನಿಗದಿ ಬಳಿಕ ಬೆಲೆಯಲ್ಲಿ ಭಾರಿ ಏರಿಕೆ

ಸುಶಾಂತ್​ ಅವರ ಮಾಜಿ ಗರ್ಲ್​ಫ್ರೆಂಡ್​ ಅಂಕಿತಾ ಲೋಖಂಡೆ ಅವರ ಮನೆಗೆ ಗುರುವಾರ ಸಂಜೆ ತೆರಳುವಾಗ ಬಿಹಾರ ಪೊಲೀಸರ ತಂಡ ಐಷಾರಾಮಿ ಜಾಗ್ವಾರ್​ ಕಾರಿನಲ್ಲಿ ತೆರಳಿತ್ತು.

ಬುಧವಾರದಂದು ಸುಶಾಂತ್​ ಸಿಂಗ್​ ರಜಪೂತ್​ ಅವರ ಆತ್ಮಹತ್ಯೆ ಪ್ರಕರಣದ ತನಿಖೆಯ ವಿವರ ಪಡೆದುಕೊಳ್ಳಲು ಬಿಹಾರ ಪೊಲೀಸರ ತಂಡ ಮುಂಬೈ ಕ್ರೈಂ ಬ್ರ್ಯಾಂಚ್​ ಅಧಿಕಾರಿಗಳನ್ನು ಭೇಟಿಯಾಗಲು ಬಂದಿತ್ತು. ಆದರೆ, ಹಿರಿಯ ಅಧಿಕಾರಿಗಳು ಇವರನ್ನು ಭೇಟಿಯಾಗಲು ನಿರಾಕರಿಸಿದರು. ಆ ಸಂದರ್ಭದಲ್ಲಿ ಸುದ್ದಿಗಾರರು ಇವರನ್ನು ಸುತ್ತುವರಿದಿದ್ದರು. ಅವರಿಂದ ತಪ್ಪಿಸಿಕೊಂಡು ಅವರೆಲ್ಲರೂ ಮೋಟಾರ್​ಸೈಕಲ್​ನಲ್ಲಿ ಪರಾರಿಯಾಗಿದ್ದರು.

ಸುಶಾಂತ್​ ಜತೆ ಲಿವಿನ್​ ರಿಲೇಷನ್​ಶಿಪ್​ನಲ್ಲಿದ್ದ ರಿಯಾ ಚಕ್ರವರ್ತಿ ಸುಶಾಂತ್​ ಅವರ ಬ್ಯಾಂಕ್​ ಖಾತೆಯಿಂದ 15 ಕೋಟಿ ರೂ.ಅನ್ನು ಅಕ್ರಮವಾಗಿ ತಮಗೆ ಬೇಕಾದವರ ಖಾತೆಗಳಿಗೆ ವರ್ಗಾವಣೆ ಮಾಡಿಕೊಂಡಿದ್ದಾರೆ ಎಂದು ಆರೋಪಿಸಿ ಸುಶಾಂತ್​ ಅವರ ತಂದೆ ಕೆ.ಕೆ. ಸಿಂಗ್​ ಅವರು ಬಿಹಾರ ಪೊಲೀಸರಿಗೆ ದೂರು ನೀಡಿದ್ದಾರೆ. ಅದರ ವಿಚಾರಣೆಗಾಗಿ ಬಿಹಾರ ಪೊಲೀಸರು ಮುಂಬೈಗೆ ಬಂದಿದ್ದಾರೆ.

https://www.vijayavani.net/legal-notice-issued-to-siddaramaiah-and-dk-sivakumar-form-bjp/