ವಚನಕಾರರು, ಇಷ್ಟಲಿಂಗವನ್ನು ಧರಿಸಿದವರು ಮಾತ್ರ ಇಷ್ಟಲಿಂಗ ಪೂಜೆಯನ್ನು ಮಾಡಬೇಕೆಂದು ಆದೇಶಿಸುತ್ತಾರೆ. ಸಾಮಾನ್ಯವಾಗಿ ಊರಿನ ಗುಡಿಗಳಲ್ಲಿ ಸ್ಥಾವರಲಿಂಗದ ಪೂಜೆಯನ್ನು ಪೂಜಾರಿ ಮಾಡುವಾಗ, ಉಳಿದವರು ಭಕ್ತಿಯಿಂದ ನೋಡುತ್ತಾರೆ. ಅವರು ಸ್ಥಾವರಲಿಂಗದ ಪೂಜೆಯನ್ನು ಮಾಡಲಾರರು. ಇಷ್ಟಲಿಂಗದ ಪೂಜೆಗೆ ಸಮಸ್ತರೂ ಅರ್ಹರು. ಇಲ್ಲಿ ಜಾತಿ, ಮತ, ಲಿಂಗಭೇದವಾಗಲಿ ಇಲ್ಲ. ಆದರೆ, ಸ್ಥಾವರಲಿಂಗ ಪೂಜಕರಿಗೆ ಈ ಸ್ವಾತಂತ್ರ್ಯವಿಲ್ಲ. ಆದರೆ, ಪ್ರಾಣಲಿಂಗಿಗಳಾದವರು, ಆಧ್ಯಾತ್ಮಿಕ ಸಾಧನೆಯಲ್ಲಿ ಮುಂದುವರಿದವರು ತಮ್ಮ ಇಂದ್ರಿಯ, ಮನಸ್ಸು, ದೇಹಗಳಲ್ಲೇ ಲಿಂಗವನ್ನು ಪ್ರತಿಷ್ಠಾಪಿಸಿಕೊಳ್ಳುತ್ತಾರೆ. ಅಂಥ ಅಧ್ಯಾತ್ಮ ಸಾಧಕರಿಗೆ ಇಷ್ಟಲಿಂಗವು ತಮ್ಮಲ್ಲಿ ಅಂತಸ್ಥವಾಗಿರುವ ಚಿತ್ಸ್ವರೂಪವೇ ಲಿಂಗದ ಕುರುಹು ಆಗುತ್ತದೆ. ಶಿವಯೋಗದ ಸಾಧಕರು ಇಷ್ಟಲಿಂಗ, ಪ್ರಾಣಲಿಂಗ ಮತ್ತು ಭಾವಲಿಂಗ-ಇವು ಮೂರು ಒಂದೇ ಎಂದು ತಿಳಿಯುತ್ತಾರೆ.
