ಸುಪಾರಿ ಹಂತಕಿ, ಪ್ರಿಯಕರನ ಸೆರೆ; ಹತ್ಯೆಗೆ 1 ಲಕ್ಷ ರೂ.ಡೀಲ್​; ಅಪರಿಚಿತ ಶವ ಪ್ರಕರಣ ಭೇದಿಸಿದ ನಂದಗುಡಿ ಪೊಲೀಸರು

ಬೆಂ.ಗ್ರಾಮಾಂತರ/ಕೋಲಾರ: ಹೊಸಕೋಟೆ ತಾಲೂಕು ಬಿ.ಮಾಕನಹಳ್ಳಿ ಬಳಿ ನ.21ರಂದು ಪತ್ತೆಯಾಗಿದ್ದ ಅಪರಿಚಿತ ಶವದ ಪ್ರಕರಣ ಭೇದಿಸಿದ ನಂದಗುಡಿ ಠಾಣೆ ಪೊಲೀಸರು ಪತ್ನಿ ಹಾಗೂ ಪ್ರಿಯಕರನನ್ನು ಬಂಧಿಸಿದ್ದಾರೆ.

ಕೋಲಾರ ತಾಲೂಕು ಚಂಬೆ ಗ್ರಾಮದ ಆನಂದ್​ (32) ಮೃತ. ಪತ್ನಿ ಚೈತ್ರಾ(28) ಹಾಗೂ ಪ್ರಿಯಕರ ಚಲಪತಿ (31) ಜೈಲು ಸೇರಿದ್ದು, ಇದಕ್ಕೆ ಸಹಕರಿಸಿದ ಮತ್ತೊಬ್ಬ ಅರೋಪಿ ನವೀನ್​ ತಲೆಮರೆಸಿಕೊಂಡಿದ್ದಾನೆ.

ಆನಂದ್​ ಹಾಗೂ ಚೈತ್ರಾ ಪ್ರೇಮವಿವಾಹವಾಗಿದ್ದು, ಇವರಿಗೆ ಇಬ್ಬರು ಮಕ್ಕಳಿದ್ದಾರೆ. ಕೆಲ ವರ್ಷ ಅನ್ಯೋನ್ಯವಾಗಿದ್ದ ದಂಪತಿ ನಡುವೆ ಪಕ್ಕದ ಮನೆಯ ಚಲಪತಿ ಎಂಬುವನಿಂದ ಕಂದಕ ಏರ್ಪಟ್ಟಿತ್ತು.

ಚೈತ್ರಾಳೊಂದಿಗೆ ಸಲುಗೆ ಬೆಳೆಸಿಕೊಂಡಿದ್ದ ಚಲಪತಿ ವಿಚಾರವಾಗಿ ಪತಿ ಆನಂದ್​ ವ್ಯಗ್ರನಾಗಿದ್ದ. ಆತನೊಂದಿಗೆ ಅಂತರ ಕಾಯ್ದುಕೊಳ್ಳುವಂತೆ ಪತ್ನಿಗೆ ತಾಕೀತು ಮಾಡಿದ್ದ.

ಮಾಸ್ಟರ್​ ಪ್ಲಾನ್​: ಸಂಬಂಧಕ್ಕೆ ಅಡ್ಡಿಯಾಗಿದ್ದ ಪತಿಯನ್ನು ಮುಗಿಸಲು ಸಂಚು ರೂಪಿಸಿದ ಪತ್ನಿ 1 ಲಕ್ಷ ರೂ.ಡೀಲ್​ ನೀಡಿದ್ದಳು ಎಂಬುದು ತನಿಖೆಯಲ್ಲಿ ತಿಳಿದುಬಂದಿದೆ. ಸಹೋದರನ ಸ್ನೇಹಿತನಾಗಿದ್ದ ಮತ್ತೊಬ್ಬ ಆರೋಪಿ ನವೀನ್​ ಎಂಬುವನ ಸಹಕಾರ ಕೇಳಿದ್ದ ಚೈತ್ರಾ ಪ್ರಿಯಕರ ಚಲಪತಿಯೊಂದಿಗೆ ಸೇರಿ ಕೊಲೆ ಸಂಚು ರೂಪಿಸಿದ್ದಳು.

ಆನಂದ್​ನನ್ನು ಮದ್ಯದ ಪಾರ್ಟಿಗೆ ಬರುವಂತೆ ಪುಸಲಾಯಿಸಿದ ಹಂತಕರು ನೀಲಗಿರಿ ತೋಪಿಗೆ ಕರೆದೊಯ್ದು ಕಂಠಪೂರ್ತಿ ಕುಡಿಸಿ ಜಗಳ ತೆಗೆದಿದ್ದಾರೆ. ಮಾತಿನ ಚಕಮಕಿ ವೇಳೆ ಬಿಯರ್​ ಬಾಟಲಿಯಿಂದ ಹಲ್ಲೆ ನಡೆಸಿ ಹತ್ಯೆ ಮಾಡಿದ್ದಾರೆ.

ಕಲ್ಲುಕ್ವಾರಿಗೆ ಶವ ರವಾನೆ: ಈ ಹಿಂದೆ ಕಲ್ಲುಕ್ವಾರಿಯಲ್ಲಿ ಚಾಲಕನಾಗಿದ್ದ ಕ್ರಿಮಿನಲ್​ ಹಿನ್ನೆಲೆಯ ನವೀನ್​ ಪ್ಲಾನ್​ನಂತೆ ಬೊಲೆರೋ ವಾಹನವೊಂದರಲ್ಲಿ ಶವ ಸಾಗಿಸಿದ ಹಂತಕರು ಬಿ.ಮಾಕನಹಳ್ಳಿ ಬಳಿಯ ರ್ನಿಜನ ಪ್ರದೇಶದಲ್ಲಿರುವ ಕಲ್ಲುಕ್ವಾರಿಯಲ್ಲಿ ಶವ ಎಸೆದಿದ್ದರು.

ಟ್ಯಾಟು ಮೂಲಕ ಪತ್ತೆ: ಕೊಳೆತ ಸ್ಥಿತಿಯಲ್ಲಿ ಪತ್ತೆಯಾಗಿದ್ದ ಅಪರಿಚಿತ ಶವದ ಗುರುತು ಪತ್ತೆ ಹಚ್ಚುವುದು ಪೊಲೀಸರಿಗೆ ಸವಾಲಾಗಿತ್ತು. ಆದರೆ ಶವದ ಕೈಮೇಲಿದ್ದ ಹಚ್ಚೆ ಗುರುತನ್ನುಫೋಟೋ ತೆಗೆದು ರಾಜ್ಯದ ಎಲ್ಲ ಪೊಲೀಸ್​ ಠಾಣೆಗಳಿಗೆ ರವಾನಿಸಲಾಗಿತ್ತು. ಸಾಮಾಜಿಕ ಜಾಲತಾಣಗಳಿಗೂ ಹರಿಬಿಡಲಾಗಿತ್ತು. ಈ ವೇಳೆ ಮಾಸ್ತಿ ಠಾಣೆಯಲ್ಲಿ ನಾಪತ್ತೆ ಪ್ರಕರಣ ದಾಖಲಾಗಿದ್ದ ವಿಷಯ ತಿಳಿದ ನಂದಗುಡಿ ಠಾಣೆ ಇನ್​ಸ್ಪೆಕ್ಟರ್​ ರಂಗಸ್ವಾಮಿ ಹಾಗೂ ಪೊಲೀಸರ ತಂಡ ಶವದ ವಾರಸುದಾರರನ್ನು ಪತ್ತೆ ಹಚ್ಚಿದ್ದರು.

ತನಿಖೆ ನಡೆಸಿದ ಪೊಲೀಸರಿಗೆ ಈಗಾಗಲೇ ಮಾಸ್ತಿ ಠಾಣೆಯಲ್ಲಿ ಚಲಪತಿ ಹಾಗೂ ಚೈತ್ರಾ ದಂಪತಿ ನಡುವಿನ ಜಗಳ, ಹಾಗೂ ಅಕ್ರಮ ಸಂಬಂಧ ಆರೋಪದ ಪ್ರಕರಣದ ಮಾಹಿತಿ ಇತ್ತು. ಈ ಹಿನ್ನೆಲೆಯಲ್ಲಿ ಪತ್ನಿ ಹಾಗೂ ಪ್ರಿಯಕರನನ್ನು ವಿಚಾರಣೆ ನಡೆಸಿ ಹತ್ಯೆ ರಹಸ್ಯ

ಬಾಯಿ ಬಿಡಿಸಿದ್ದಾರೆ.