ಓದು ಮತ್ತು ಬರವಣಿಗೆ ಬಗ್ಗೆ ತುಂಬಾ ತುಡಿತ ಹೊಂದಿದ್ದ ಬಾನುಗೆ ಪತಿ ಮುಷ್ತಾಕ್ ಬೆಂಬಲವಾಗಿ ನಿಂತರು. ಆಗ ಸಿಕ್ಕ ಲಂಕೇಶ್ ಅವರ ಸಂಪರ್ಕ ಅವರ ಅಕ್ಷರ ಲೋಕದ ಪಯಣದ ಜೊತೆಗೆ ಅದೃಷ್ಟದ ಬಾಗಿಲು ತೆರೆಸಿತು. ಹಾಸನದಿಂದ ಲಂಕೇಶ್ ಪತ್ರಿಕೆಗೆ ಒಂದು ದಶಕಗಳ ಕಾಲ ವರದಿಗಾರ್ತಿಯಾಗಿ ಕೆಲಸ ಮಾಡಿದ ಬಾನುಮುಷ್ತಾಕ್, ಕತೆ, ಕವನ ಬರೆಯಲಾರಂಭಿಸಿದ್ದರು. ಬಂಡಾಯ ಸಾಹಿತ್ಯ ಅವರ ಬರವಣಿಗೆಗೆ ಮತ್ತೊಂದು ಮೆರಗು ನೀಡಿತು. ಪ್ರೊ.ಎಂ.ಎನ್.ನಂಜುಂಡಸ್ವಾಮಿ ಸಂಪರ್ಕ ಮೂಲಕ ರೈತ ಸಂಘಟನೆಯಲ್ಲಿ ಗುರುತಿಸಿಕೊಂಡಿದ್ದು ಅಷ್ಟೆ ಅಲ್ಲ, ದಲಿತ ಸಂಘಟನೆಯಲ್ಲಿಯೂ ತೊಡಗಿಸಿಕೊಂಡಿದ್ದು, ಅವರ ವ್ಯಕ್ತಿತ್ವ ಇನ್ನಷ್ಟು ಮಾಗಲು ಕಾರಣ. ವಕೀಲರಾಗಿ ಅಷ್ಟೆ ಅಲ್ಲ, ಹಾಸನದ ನಗರಸಭೆ ಚುನಾವಣೆಗೆ ಪಕ್ಷೇತರವಾಗಿ ಸ್ಪರ್ಧೆ ಮಾಡಿ ಎರಡು ಬಾರಿ ಸದಸ್ಯರಾಗಿ ಆಯ್ಕೆಯಾಗಿ ಸೇವೆ ಸಲ್ಲಿಸಿದ್ದು ವಿಶೇಷ.
