ವಿಶಿಷ್ಟ ಮತ್ತು ಆಪ್ತ ಬರಹಶೈಲಿಯಿಂದ ಓದುಗರಿಗೆ ಪರಿಚಿತರಾಗಿರುವ ನಾರಾಯಣ ಶೇವಿರೆ ಅವರು ಪ್ರಸ್ತುತ ಅಖಿಲ ಭಾರತೀಯ ಸಾಹಿತ್ಯ ಪರಿಷತ್ತಿನ ರಾಜ್ಯ ಸಂಘಟನಾ ಕಾರ್ಯದರ್ಶಿಯಾಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ‘ವಿಹಿತವಿದ್ಯಾ’, ‘ಉಪಾಸನೆ’, ‘ಆಕೂತ’, ‘ಅವಿಖ್ಯಾತ ಸ್ವರಾಜ್ಯಕಲಿಗಳು’ ‘ದೇಶೀ ದಿಶೆ’, ‘ಬಿಡುಗಡೆಯ ಮಿಂಚು’ ಕೃತಿಗಳನ್ನು ರಚಿಸಿದ್ದಾರೆ. ಚರಿತಪಂಚಕ ಕೃತಿ ಭಾವಜಾಗರಣ ಅಭಿಯಾನಕ್ಕೆ ಆಕರಸಾಮಗ್ರಿಯೆಂಬಂತೆ ಸಿದ್ಧವಾಗಿದ್ದು, ಬೆಂಗಳೂರಿನ ರಾಷ್ಟ್ರೋತ್ಥಾನ ಸಾಹಿತ್ಯ ಇದನ್ನು ಪ್ರಕಟಿಸಿದೆ. ಕುಟುಂಬ ಪ್ರಬೋಧನದಲ್ಲಿ ಭಾವಸ್ವರೂಪೀ ಮನೆ, ಘಟಕವಾಗಿ ಮನೆಯ ವಿಸ್ತರಣೆ, ಸಂಸ್ಕಾರದ ಆಯಾಮ ಸೇರಿದಂತೆ ಆರು ಅಧ್ಯಾಯಗಳಿದ್ದು, ಪರಿಸರ ಸಂರಕ್ಷಣೆ ಬಗೆಗೂ ಆರು ಅಧ್ಯಾಯಗಳಿವೆ. ಒಟ್ಟಾರೆ ದೇಶದ ಸಾಂಸ್ಕೃತಿಕ ನೆಲೆಯನ್ನು, ಅದಕ್ಕೆ ಬೆಸೆದುಕೊಂಡಿರುವ ನಾಗರಿಕರ ಬದುಕನ್ನು ವಿವರಿಸುತ್ತ ನಮ್ಮತನದೆಡೆಗೆ ಸಾಗುವ ಅಗತ್ಯತೆ ಮತ್ತು ಅದರಲ್ಲಿ ಇರುವ ಸಾರ್ಥಕತೆಯನ್ನು ಈ ಕೃತಿ ಕಟ್ಟಿಕೊಟ್ಟಿದೆ.
