ಜೂಜು ಅಡ್ಡೆಯ ಮೇಲೆ ದಾಳಿ

ಕೋಲಾರ: ತಾಲೂಕಿನ ಕೂಟೇರಿ ಸಮೀಪದ ನೀಲಗಿರಿ ತೋಪಿನಲ್ಲಿ ಜೂಜಾಡುತ್ತಿದ್ದ ಅಡ್ಡೆಯ ಮೇಲೆ ಕೋಲಾರ ಗ್ರಾಮಾಂತರ ಠಾಣೆ ಪೊಲೀಸರು ಗುರುವಾರ ದಾಳಿ ಮಾಡಿ 8 ಮಂದಿಯನ್ನು ಬಂಧಿಸಿ, 35,150 ರೂ. ನಗದು ಹಾಗೂ 11 ದ್ವಿಚಕ್ರ ವಾಹನಗಳನ್ನು ವಶಪಡಿಸಿಕೊಂಡಿದ್ದಾರೆ.

ನಗರದ ಕೀಲಾರಿಪೇಟೆ ನಿವಾಸಿ ಕಿಶೋರ್​ ಜೂಜಾಡಿಸುತ್ತಿರುವುದು ಪೊಲೀಸರಿಗೆ ಬಂದ ಖಚಿತ ಮಾಹಿತಿಯ ಮೇರೆಗೆ ಎಸ್ಪಿ ಬಿ.ನಿಖಿಲ್​ ಮಾರ್ಗದರ್ಶನದಲ್ಲಿ, ಗ್ರಾಮಾಂತರ ಠಾಣೆ ಸಿಪಿಐ ಕೆ.ಕಾಂತರಾಜ್​, ಪಿಎಸ್​ಐ ಭಾರತಿ ಸಿಬ್ಬಂದಿಯೊಂದಿಗೆ ದಾಳಿ ಮಾಡಿದ್ದಾರೆ.

ತಾಲೂಕಿನ ಶಿಳ್ಳಂಗೆರೆ ಗಜೇಂದ್ರ (30), ಶೆಟ್ಟಹಳ್ಳಿ ಪುರುಷೋತ್ತಮ್​ (42), ಚಂಜಿಮಲೆ ಶ್ರೀನಿವಾಸ್​ (42), ಬಂಗಾರಪೇಟೆ ತಾಲೂಕು ನತ್ತಬೆಲೆ ರಂಗೋಜಿ (42), ನಾರಾಯಣಪುರ ಗ್ರಾಮದ ಮಂಜುನಾಥ್​ (33), ಜೆಸಿ ಹಳ್ಳಿ ಅರುಣ್​ (26), ಶ್ರೀನಿವಾಸಪುರ ತಾಲೂಕಿನ ಹಲಗಪಲ್ಲಿ ಮುನಿವೆಂಕಟಪ್ಪ (48), ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಹೊಸಕೋಟೆ ತಾಲೂಕಿನ ಚಿಕ್ಕನಹಳ್ಳಿ ವಿಜಯ್​ (35)ನನ್ನು ಬಂಧಿಸಿದ್ದಾರೆ. ಜೂಜಾಡಿಸುತ್ತಿದ್ದ ಕಿಲಾರಿಪೇಟೆ ಕಿಶೋರ್​ ಪರಾರಿಯಾಗಿದ್ದು, ಪೊಲೀಸರು ಪತ್ತೆಗೆ ತಂಡ ರಚಿಸಿದ್ದಾರೆ.