Aruna Irani: ಪತಿ ನಿಧನದ ಬಳಿಕ ಅರುಣಾ ಇರಾನಿ ಕಂಬ್ಯಾಕ್; ‘ಕೊನೆಯ ಉಸಿರಿರುವವರೆಗೂ ನನ್ನ ಜತೆ ಇರಿ’ ಎಂದ ನಟಿ!

Aruna Irani Resumes Work: ಕನ್ನಡದ ‘ಅಣ್ಣಯ್ಯ’ ಸಿನಿಮಾದಲ್ಲಿ ನಾಯಕ ರವಿಚಂದ್ರನ್ ಅವರ ಮಲತಾಯಿ ಪಾತ್ರದಲ್ಲಿ ನೆಗೆಟಿವ್ ಶೇಡ್ ಮೂಲಕ ಕನ್ನಡಿಗರ ಮನ ಗೆದ್ದಿದ್ದ ಬಾಲಿವುಡ್‌ನ ಹಿರಿಯ ನಟಿ ಅರುಣಾ ಇರಾನಿ ಮತ್ತೆ ಕೆಲಸಕ್ಕೆ ಮರಳಿದ್ದಾರೆ. ಪತಿ, ಚಿತ್ರ ನಿರ್ದೇಶಕ ಕುಕು ಕೊಹ್ಲಿ ನಿಧನರಾಗಿ ಎರಡು ತಿಂಗಳ ಬಳಿಕ ಅವರು ತಮ್ಮ ವೃತ್ತಿಜೀವನವನ್ನು ಮತ್ತೆ ಆರಂಭಿಸಿದ್ದಾರೆ.

ಈ ಬಗ್ಗೆ ಸೋಷಿಯಲ್ ಮೀಡಿಯಾದಲ್ಲಿ ಭಾವುಕ ವಿಡಿಯೋ ಹಂಚಿಕೊಂಡಿರುವ ಅರುಣಾ ಇರಾನಿ, ಕಷ್ಟದ ಸಮಯದಲ್ಲಿ ತಮ್ಮ ಜೊತೆ ನಿಂತ ಅಭಿಮಾನಿಗಳಿಗೆ ಧನ್ಯವಾದ ಹೇಳಿದ್ದಾರೆ. ಅಭಿಮಾನಿಗಳ ಪ್ರೀತಿ, ಬೆಂಬಲವೇ ಮತ್ತೆ ಕೆಲಸ ಶುರು ಮಾಡೋಕೆ ಧೈರ್ಯ ಕೊಟ್ಟಿದೆ ಅಂತ ಹೇಳಿದ್ದಾರೆ.

ಅಭಿಮಾನಿಗಳಿಗೆ ಅರುಣಾ ಇರಾನಿ ಭಾವುಕ ಸಂದೇಶ

ಇನ್‌ಸ್ಟಾಗ್ರಾಮ್‌ನಲ್ಲಿ ವಿಡಿಯೋ ಹಂಚಿಕೊಂಡಿರುವ ಅರುಣಾ ಇರಾನಿ, ಪತಿ ನಿಧನದ ಬಳಿಕ ಅಭಿಮಾನಿಗಳು ತೋರಿದ ಪ್ರೀತಿ ಮತ್ತು ಬೆಂಬಲವನ್ನು ನೆನಪಿಸಿಕೊಂಡಿದ್ದಾರೆ.

‘ಕುಕು ಜೀ ನಿಧನದ ಬಳಿಕ ನೀವು ನನಗೆ ತೋರಿದ ಪ್ರೀತಿ, ಬೆಂಬಲಕ್ಕೆ ನಾನು ಮನಸಾರೆ ಕೃತಜ್ಞಳಾಗಿದ್ದೇನೆ. ಕಷ್ಟದ ಸಮಯದಲ್ಲಿ ನೀವೆಲ್ಲ ನನ್ನ ಜತೆ ನಿಂತಿದ್ದು ನಿಜಕ್ಕೂ ವಿಶೇಷ. ನಿಮ್ಮ ಪ್ರೀತಿ, ಬೆಂಬಲದಿಂದಲೇ ಮತ್ತೆ ನಿಮ್ಮ ಮುಂದೆ ಬಂದು ಕೆಲಸ ಶುರು ಮಾಡಲು ಸಾಧ್ಯವಾಗಿದೆ. ನನ್ನ ಕೊನೆಯ ಉಸಿರಿರುವವರೆಗೂ ಇದೇ ರೀತಿ ನನ್ನ ಜತೆ ಇರುತ್ತೀರಿ ಎಂದು ಭಾವಿಸುತ್ತೇನೆ’ ಎಂದು ಅರುಣಾ ಇರಾನಿ ಭಾವುಕರಾಗಿ ಹೇಳಿದ್ದಾರೆ.

ಆಗಸ್ಟ್ 25ರಂದು ನಿಧನರಾಗಿದ್ದ ಕುಕು ಕೊಹ್ಲಿ

ಚಿತ್ರ ನಿರ್ದೇಶಕ ಕುಕು ಕೊಹ್ಲಿ ಅವರು 2026ರ ಆಗಸ್ಟ್ 25ರಂದು ಹೃದಯಾಘಾತದಿಂದ 77ನೇ ವಯಸ್ಸಿನಲ್ಲಿ ನಿಧನರಾಗಿದ್ದರು. ಅನಾರೋಗ್ಯದ ಹಿನ್ನೆಲೆಯಲ್ಲಿ ಮುಂಬೈನ ಆಸ್ಪತ್ರೆಗೆ ದಾಖಲಾಗಿದ್ದ ಅವರು, ಮರುದಿನ ಮೃತಪಟ್ಟಿದ್ದರು. ಪತಿಯ ಅಂತ್ಯಕ್ರಿಯೆ ವೇಳೆ ಅರುಣಾ ಇರಾನಿ ಭಾವುಕರಾಗಿದ್ದರು.

ಇದನ್ನೂ ಓದಿ: ದೆಹಲಿಯಲ್ಲಿ ಶಿಕ್ಷಕಿಯರ ಜತೆ ಗರ್ಬಾ ಆಡಿದ ಸಿಎಂ ರೇಖಾ ಗುಪ್ತಾ; ನವರಾತ್ರಿ ಸಂಭ್ರಮಕ್ಕೆ ವಿಶೇಷ ಮೆರುಗು! | CM Rekha Gupta Garba

ಅಜಯ್ ದೇವಗನ್‌ಗೆ ಮೊದಲ ಅವಕಾಶ ನೀಡಿದ್ದ ನಿರ್ದೇಶಕ

‘ಫೂಲ್ ಔರ್ ಕಾಂಟೆ’ ಸಿನಿಮಾ ಮೂಲಕ ನಟ ಅಜಯ್ ದೇವಗನ್ ಅವರನ್ನು ಚಿತ್ರರಂಗಕ್ಕೆ ಪರಿಚಯಿಸಿದವರು ಕುಕು ಕೊಹ್ಲಿ. ‘ಸುಹಾಗ್’, ‘ಹಕೀಕತ್’, ‘ಕೋಹ್ರಂ’ ಮತ್ತು ‘ಅನಾರಿ ನಂ. 1’ ಸೇರಿದಂತೆ ಹಲವು ಸಿನಿಮಾಗಳನ್ನು ಅವರು ನಿರ್ದೇಶಿಸಿದ್ದರು. ಮೊದಲ ಪತ್ನಿ ರೀಟಾ ಕೊಹ್ಲಿ ಅವರಿಂದ ಪೂಜಾ ಮತ್ತು ಕರಿಷ್ಮಾ ಎಂಬ ಇಬ್ಬರು ಪುತ್ರಿಯರನ್ನು ಹೊಂದಿದ್ದಾರೆ. ಪತಿ ನಿಧನದ ಬಳಿಕ ಅರುಣಾ ಇರಾನಿ ಮತ್ತೆ ಕೆಲಸಕ್ಕೆ ಮರಳಿರುವುದು ಅಭಿಮಾನಿಗಳ ಗಮನ ಸೆಳೆದಿದೆ.