ಜಾಲಿಹಾಳದ ಬಾಳಂಭಟ್ಟ-ಜೀವೂ ಬಾಯಿ ದಂಪತಿ ಪುತ್ರನಾಗಿ ಜನಿಸಿದ ಅನಂತ ಭಟ್ಟರು (ಬ್ರಹ್ಮಾನಂದರ ಪೂರ್ವಾಶ್ರಮದ ಹೆಸರು) ಬಾಲ್ಯದಲ್ಲಿ ತುಂಟರಾಗಿದ್ದರು. ಜನರಿಂದ ನಿಂದಾವಚನಗಳನ್ನು ಕೇಳಿದರೂ, ತಂದೆಯ ಹಿತವಚನದಂತೆ ಏಕಾಂತದಲ್ಲಿ ಬನಶಂಕರಿಯ ಅನನ್ಯ ಸ್ಮರಣೆ ಮಾಡುತ್ತ ಸರಿರಾತ್ರಿಯಲ್ಲಿ ಹೊಂಡಕ್ಕೆ ಹಾರಲುದ್ಯುಕ್ತರಾಗಿದ್ದರು. ಯಾರೋ ತಡೆದಂತಾಗಿ ಒಂದು ಕ್ಷಣ ಹಾಗೇ ನಿಂತರು. ಕನಸಲ್ಲಿ ಬಂದ ಆ ದೇವಿ, ‘ಇನ್ನಾದರೂ ತುಂಟಾಟ ಬಿಟ್ಟು ವೇದಾಧ್ಯಯನ ಮಾಡು. ನನ್ನ ಸಂಪೂರ್ಣ ಕೃಪಾಶೀರ್ವಾದವಿದೆ’ ಎಂದು ಹೇಳಿದಂತಾಯಿತು. ನೇರವಾಗಿ ಮೆಣಸಿಗಿಗೆ, ಮುಳುಗುಂದಕ್ಕೆ ಬಂದು ವೇದ, ಆರು ಶಾಸ್ತ್ರಗಳ ಅಧ್ಯಯನ ಮಾಡಿದರು. ತೃಪ್ತಿಯಾಗಲಿಲ್ಲ. ಅಲ್ಲಿಂದ ಬೆಳದಡಿಗೆ ತೆರಳಿ ಭಾಗವತ ಶ್ರವಣ ಮಾಡಿದರು. ಒಂದು ರೀತಿಯ ವಿಲಕ್ಷಣ ಅನುಭವವಾಯಿತು. ಕಪ್ಪತಗುಡ್ಡ ಮತ್ತು ವೆಂಕಟಾಪುರದಲ್ಲಿ ಘೊರ ತಪಸ್ಸನ್ನಾಚರಿಸಿದರು. ಆಗ ವೆಂಕಟರಮಣನು ಪ್ರತ್ಯಕ್ಷನಾಗಿ ವರ ಬೇಡು ಎಂದಾಗ ಆತ್ಮೋದ್ಧಾರದ ಗುರುವನ್ನು ತೋರಿಸೆಂದು ಕೇಳಿಕೊಂಡರು. ‘ತಥಾಸ್ತು’ ಎಂಬವರ ಪಡೆದು ಅಂಥ ಗುರುವಿಗಾಗಿ ಹುಡುಕಾಟ ಆರಂಭಿಸಿದ ಅವರಿಗೆ ಇಂದೋರಿನಲ್ಲಿ ಬ್ರಹ್ಮಚೈತನ್ಯರ ದರ್ಶನವಾದಾಗಲೂ, ತಾನು ಹುಡುಕುತ್ತಿರುವ ಗುರು ಇವರೇ ಎಂದೆನಿಸಲೇ ಇಲ್ಲ. ಆದರೆ ನರಸೋಬವಾಡಿಯಲ್ಲಿ ಬ್ರಹ್ಮಚೈತನ್ಯ ಸ್ವಾಮೀಜಿ ಕನಸಿನಲ್ಲಿ ಬಂದು ‘ಇವರೇ ನೀನು ಹುಡುಕುತ್ತಿರುವ ನಿನ್ನ ಆತ್ಮೋದ್ಧಾರದ ಗುರು’ ಎಂದಾಗ ಮತ್ತೆ ಅವರನ್ನು ಹುಡುಕಿ ಶರಣಾದರು.
