ಬೆಂಗಳೂರು : ಕಿರುತೆರೆ ಹಾಗೂ ಹಿರಿತೆರೆಯಲ್ಲಿ ತಮ್ಮದೇ ಛಾಪು ಮೂಡಿಸಿರುವ ನಟಿ ಅಂಕಿತಾ ಅಮರ್. ಕಿರುತೆರೆಯ ‘ನಮ್ಮನೆ ಯುವರಾಣಿ’, ‘ಮಂಗಳಗೌರಿ ಮದುವೆ’ಯಲ್ಲಿ ಖ್ಯಾತಿ ಗಳಿಸಿದ ಬಳಿಕ ಬೆಳ್ಳಿತೆರೆಗೆ ಎಂಟ್ರಿಯಾದರು. ಈ ವರ್ಷ ಅಂಕಿತಾ ನಟಿಸಿರುವ ‘ಮೈ ಹೀರೋ’, ‘ಇಬ್ಬನಿ ತಬ್ಬಿದ ಇಳೆಯಲಿ’ ಬಿಡುಗಡೆಗೊಂಡು ಯಶಸ್ಸು ಕಂಡಿವೆ. ಜತೆಗೆ ಅಂಕಿತಾ ಕೂಡ ಸಾಲು ಸಾಲು ಸಿನಿಮಾಗಳಲ್ಲಿ ಬಿಜಿಯಾಗಿದ್ದಾರೆ. ಇದೇ ಖುಷಿಯಲ್ಲಿ ನವರಾತ್ರಿ ಆಚರಣೆಯ ಬಗ್ಗೆ ಅವರು, ‘ನಾಡಹಬ್ಬ ದಸರಾ ಎಂದಾಗ ನನಗೆ ನೆನಪಾಗುವುದು ತಾಯಿ ಚಾಮುಂಡೇಶ್ವರಿ. ಈ ಹಬ್ಬದಲ್ಲಿ ಒಬ್ಬ ಹೆಣ್ಣು ಮಗಳನ್ನು ಒಂಬತ್ತು ದಿನಗಳ ಕಾಲ ಆರಾಧಿಸಲಾಗುತ್ತದೆ. ಹೀಗಾಗಿ ಹೆಣ್ಣು ಮಕ್ಕಳಿಗೆ ನವರಾತ್ರಿ ಬಹು ವಿಶೇಷ. ಮೊದಲ ದಿನ ಶೈಲಪುತ್ರಿ, ಎರಡನೇ ದಿನ ಬ್ರಹ್ಮಚಾರಿಣಿ, ಮೂರನೇ ದಿನ ಚಂದ್ರಘಂಟಾ ಹೀಗೆ ಒಂಬತ್ತು ದಿನಗಳ ಕಾಲ ದೇವಿಯನ್ನು ವಿವಿಧ ಹೆಸರಿನಲ್ಲಿ ಆರಾಧಿಸುತ್ತೇವೆ. ಇದು ಹೆಣ್ಣಿನ ಬೆಳವಣಿಗೆಯ ಹಂತವನ್ನು ಸೂಚಿಸುತ್ತದೆ. ಇನ್ನು, ಯಾವುದೇ ಹಬ್ಬವಾಗಲಿ ದೇವಿಯ ಆರಾಧನೆ ಮಾಡಿದರೆ, ಜೀವನದಲ್ಲಿ ಸಾರ್ಥಕತೆ ಸಿಗುತ್ತದೆ. ನಮ್ಮ ಮನೆಯಲ್ಲಿ ಹಬ್ಬದ ಪ್ರತಿ ದಿನ ದೀಪ ಹಚ್ಚಿ, ಲಲಿತಾ ಸಹಸ್ರನಾಮ ಪಠಣ ಮಾಡುತ್ತೇವೆ’ ಎಂದು ಮಾಹಿತಿ ನೀಡುತ್ತಾರೆ.
