ಡೇ ಕೇರ್​ನಿಂದ ಮನೆಗೆ ಬಂದ ಮಗುವಿನ ಹೊಟ್ಟೆ ನೋಡಿ ಕೆಂಡಾಮಂಡಲವಾದ ಅಮ್ಮ; ಅಷ್ಟಕ್ಕೂ ಟೀಚರ್​ ಅಲ್ಲಿ ಏನು ಬರೆದಿದ್ದರು ಗೊತ್ತಾ?

ಫ್ಲೋರಿಡಾದಲ್ಲಿ ಮಹಿಳೆಯೋರ್ವರು ತಮ್ಮ ಪುಟ್ಟ ಮಗನ ಡೇ ಕೇರ್​ ಟೀಚರ್​ ವಿರುದ್ಧ ಸಿಕ್ಕಾಪಟೆ ಕೋಪಗೊಂಡಿದ್ದಾರೆ. ಡೇ ಕೇರ್​ನ ಶಿಕ್ಷಕಿ ಮಾಡಿದ ಒಂದು ಕೆಲಸದಿಂದ ಸಿಡಿಮಿಡಿಗೊಂಡಿರುವ ಮಹಿಳೆ ಅದನ್ನು ಫೇಸ್​ಬುಕ್​ನಲ್ಲಿ ಕೂಡ ಬರೆದುಕೊಂಡಿದ್ದಾರೆ. ಅಷ್ಟಕ್ಕೂ ಆ ಶಿಕ್ಷಕಿ ಮಾಡಿದ್ದೇನು? ಅಮ್ಮ ಯಾಕೆ ಕೋಪಗೊಂಡ್ರು ಅಂತ ಗೊತ್ತಾಗಬೇಕಾದರೆ ಈ ಸ್ಟೋರಿ ಓದಿ...

ಹೀದರ್​ ಚಿಸಮ್​ ಎಂಬುವರು ಸಿಂಗಲ್ ಫೇರೆಂಟ್​​. ಪತಿ ಇಲ್ಲದ ಕಾರಣ ದುಡಿಯುವುದು ಅನಿವಾರ್ಯವಾಗಿದ್ದರಿಂದ ಬೆಳಗ್ಗೆಯಿಂದ ಸಂಜೆವರೆಗೂ ಕೆಲಸ ಮಾಡುತ್ತಾರೆ. ಈ ವೇಳೆ ತಮ್ಮ ಪುಟ್ಟ ಮಗನನ್ನು ಡೇ ಕೇರ್​ನಲ್ಲಿ ಬಿಡುತ್ತಾರೆ. ಅವರು ತುಂಬ ಬಿಜಿ ಇರುವ ಕಾರಣ ತಮ್ಮ ಮಗನ ಡೇ ಕೇರ್​ನ ಶಿಕ್ಷಕಿ ಬರೆದು ಕಳಿಸುತ್ತಿದ್ದ ಟಿಪ್ಪಣಿಗಳನ್ನು ಅವರು ನೋಡಲು ಸಾಧ್ಯವಾಗುತ್ತಿರಲಿಲ್ಲ.

ಟೀಚರ್​ ಆ ಟಿಪ್ಪಣಿಗಳನ್ನು ಬರೆದು ಬ್ಯಾಗ್​ನಲ್ಲಿ ಕಳಿಸುತ್ತಿದ್ದರು. ಆದರೆ ಹೀದರ್​ಗೆ ಅದನ್ನು ಓದುವಷ್ಟು ಪುರುಸೊತ್ತು ಇರುತ್ತಿರಲಿಲ್ಲ. ಒಂದು ದಿನ, ಮಗುವಿನ ಡೈಪರ್​ಗಳು ಖಾಲಿಯಾಗಿವೆ. ಕಳಿಸಿಕೊಡಿ, ಒಂದೆರಡು ಹೆಚ್ಚಿಗೆ ಕಳಿಸಿ ಎಂದು ಟಿಪ್ಪಣಿ ಬರೆದು ಕಳಿಸಿದ್ದರು. ಆದರೆ ಅದನ್ನು ಕೂಡ ಹೀದರ್​ ನೋಡಿರಲಿಲ್ಲ.

ಆದರೆ ಶಿಕ್ಷಕಿ ಮರುದಿನ ಮಗುವಿನ ಹೊಟ್ಟೆಯ ಮೇಲೆ ಮಾರ್ಕರ್​ನಲ್ಲಿ ಅದನ್ನೇ ಬರೆದು ಕಳಿಸಿದ್ದರು. 'ಅಮ್ಮಾ, ಡೈಪರ್ಸ್​ ಖಾಲಿಯಾಗಿದೆ. ಸ್ಕೂಲ್​ನಿಂದ ಬಂದಿರುವ ವರದಿಯನ್ನು ಓದಿ' ಎಂದು ಹೊಟ್ಟೆಮೇಲೆ ಬರೆದುಕೊಂಡು ಇತ್ತು.

ನೋಡಿದ್ದೇ ಹೀದರ್​ ಸಿಕ್ಕಾಪಟೆ ಕೋಪಗೊಂಡಿದ್ದಾರೆ. ಮಗುವಿನ ಹೊಟ್ಟೆಯ ಮೇಲೆ ಮಾರ್ಕರ್​ನಿಂದ ಬರೆಯಲಾಗಿರುವ ಫೋಟೋವನ್ನು ಫೇಸ್​ಬುಕ್​ನಲ್ಲಿ ಶೇರ್​ ಮಾಡಿದ್ದಾರೆ. ಅಲ್ಲದೆ, ನೀವೇ ಹೇಳಿ ಈ ಘಟನೆಗೆ ನಾನು ಸಿಟ್ಟು ಮಾಡಿಕೊಳ್ಳುವುದು ನ್ಯಾಯ ತಾನೆ? ಅಥವಾ ನಾನು ಓವರ್​ ರಿಯಾಕ್ಟ್​ ಮಾಡುತ್ತಿದ್ದೇನೆ ಎಂದೆನಿಸುತ್ತಿದೆಯಾ? ಎಂದು ಫೇಸ್​ಬುಕ್​ನಲ್ಲಿ ಪ್ರಶ್ನಿಸಿದ್ದಾರೆ.

ಅಲ್ಲದೆ ಘಟನೆಯ ಬಗ್ಗೆ ಸವಿವರ ಪೋಸ್ಟ್ ಹಾಕಿದ್ದಾರೆ. ನಾನು ಸಿಂಗಲ್​ ಪೇರೆಂಟ್​. ಒಬ್ಬಳೇ ಎಲ್ಲವನ್ನೂ ನಿಭಾಯಿಸಬೇಕು. ಈ ಒತ್ತಡದಲ್ಲಿ ಪ್ರತಿದಿನ ಟೀಚರ್​ ಕಳಿಸುವ ಟಿಪ್ಪಣಿಗಳನ್ನು ಓದಲಾಗುತ್ತಿರಲಿಲ್ಲ ಎಂಬುದನ್ನೂ ಆಕೆ ಒಪ್ಪಿಕೊಂಡಿದ್ದಾರೆ. ಹಾಗೇ ಮಗುವಿನ ಹೊಟ್ಟೆ ಮೇಲಿನ ಅಕ್ಷರ ಎಷ್ಟೇ ಉಜ್ಜಿ ತೊಳೆದರೂ ಹೋಗುತ್ತಿಲ್ಲ ಎಂದು ದೂರಿದ್ದಾರೆ.

ಹೀದರ್​ ಅವರ ಪೋಸ್ಟ್​ಗೆ ಈಗಾಗಲೇ 21 ಸಾವಿರಕ್ಕೂ ಅಧಿಕ ಲೈಕ್ಸ್​ ಬಂದಿವೆ. 29 ಸಾವಿರ ಬಾರಿ ಶೇರ್​ ಆಗಿ, ಸಿಕ್ಕಾಪಟೆ ವೈರಲ್​ ಆಗುತ್ತಿದೆ.

ಬಹುತೇಕರು ಟೀಚರ್​ ಕ್ರಮವನ್ನು ಖಂಡಿಸಿದ್ದಾರೆ. ನೀವು ದಿನದ ಟಿಪ್ಪಣಿಗಳನ್ನು ಓದಬೇಕಿತ್ತು. ಆದರೆ ಶಿಕ್ಷಕಿ ಮಾಡಿದ್ದು ತುಂಬ ದೊಡ್ಡ ತಪ್ಪು. ನಮಗೂ ಕೋಪ ಬರುತ್ತಿದೆ ಎಂದು ನೆಟ್ಟಿಗರು ಕಾಮೆಂಟ್​ ಮಾಡಿದ್ದಾರೆ. (ಏಜೆನ್ಸೀಸ್​)