ಅನಂತ್ ನಾಗ್ ಅವರ ವೃತ್ತಿಜೀವನವು ನಂತರ ಭಾರತೀಯ ಚಿತ್ರೋದ್ಯಮಕ್ಕೆ ವಿಸ್ತಾರಗೊಂಡಿತು. 'ಬಯಲು ದಾರಿ', 'ಕನ್ನೇಶ್ವರ ರಾಮ', 'ನಾ ನಿನ್ನ ಬಿಡಲಾರೆ', 'ಚಂದನದ ಗೊಂಬೆ' ಮತ್ತು 'ಬೆಂಕಿಯ ಬಲೆ' ಮುಂತಾದ ಚಿತ್ರಗಳು ಅವರನ್ನು ಚಿತ್ರರಂಗದಲ್ಲಿ ಉನ್ನತ ಸ್ಥಾನಕ್ಕೆ ಕೊಂಡೊಯ್ಯಿತು. ಕನ್ನಡ ಮಾತ್ರವಲ್ಲದೇ, ಹಿಂದಿ, ತೆಲುಗು, ತಮಿಳು, ಮಲಯಾಳಂ, ಮರಾಠಿ ಮತ್ತು ಇಂಗ್ಲಿಷ್ ಭಾಷೆಗಳು ಸೇರಿದಂತೆ 300ಕ್ಕೂ ಹೆಚ್ಚು ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ.
ಅಭಿನಯದ ವಿಸ್ತಾರ
ಸಿನಿಮಾಗಳ ಜತೆ ಜತೆಯಲ್ಲೇ ಅಂದಿನ ದೂರದರ್ಶನದ ಜನಪ್ರಿಯ ಸಿರೀಸ್ 'ಮಾಲ್ಗುಡಿ ಡೇಸ್'ನಲ್ಲಿಯೂ ನಟಿಸಿದ್ದಾರೆ. ಆರ್.ಕೆ ನಾರಾಯಣನ್ ಅವರ ಕಥೆಗಳನ್ನು ಆಧರಿಸಿದ ಹಾಗೂ ತಮ್ಮ ಕಿರಿಯ ಸಹೋದರ, ನಟ ಶಂಕರ್ ನಾಗ್ ನಿರ್ದೇಶಿಸಿದ ಸರಣಿ ಇದಾಗಿದೆ. ಹಲವಾರು ಭಾರತೀಯ ಭಾಷೆಗಳಲ್ಲಿ ಪ್ರಸಾರವಾದ ಈ ಧಾರಾವಾಹಿಯ ಮೂಲಕ, ಅವರ ನಟನಾ ಕೌಶಲ್ಯವು ಕನ್ನಡ ಭಾಷೆ, ಚಲನಚಿತ್ರಗಳ ಪರಿಚಯವಿಲ್ಲದ ಅನೇಕ ಪ್ರೇಕ್ಷಕರ ಮನ, ಮನೆಯನ್ನು ತಲುಪಿದ್ದು ಇಂದಿಗೂ ಅವಿಸ್ಮರಣೀಯ.
ಪೋಷಕ ಪಾತ್ರಗಳಿಗೂ ಸೈ
ಸ್ಟಾರ್ ನಟನಾಗಿ ಮಿಂಚಿದ ಬಳಿಕವು ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದ ಅವರು, 'ಮುಂಗಾರು ಮಳೆ', 'ಗೋಧಿ ಬಣ್ಣ ಸಾಧಾರಣ ಮೈಕಟ್ಟು', 'ಗಾಳಿಪಟ', 'ಗೂಗ್ಲಿ' ಮತ್ತು 'ಕೆಜಿಎಫ್'ನಂತಹ ಮುಂತಾದ ಸೂಪರ್ಹಿಟ್ ಚಿತ್ರಗಳಲ್ಲಿ ಪೋಷಕ ಪಾತ್ರಗಳಲ್ಲಿ ನಟಿಸಿದ್ದಾರೆ. 'ಕೆಜಿಎಫ್: ಚಾಪ್ಟರ್ 1' ಸಿನಿಮಾದಲ್ಲಿನ ಅವರ ಅಭಿನಯವು ಅನೇಕ ಯುವ ಜನತೆಯ ಮೆಚ್ಚುಗೆಗೆ ಪಾತ್ರವಾಯಿತು. ಹಲವು ವಿಭಿನ್ನ ಪಾತ್ರಗಳಲ್ಲಿ ನಟಿಸುವ ಮೂಲಕ ಆಯಾ ಪಾತ್ರಗಳಿಗೆ ಜೀವ ತುಂಬಿದ ನಟನಿಗೆ ಕನ್ನಡಿಗರು ಹೃದಯ ತುಂಬಿ ಅಭಿನಂದನೆ ಸಲ್ಲಿಸಿದ್ದಾರೆ.
