ಅಮೆರಿಕ ಅಧ್ಯಕ್ಷ-ಉಪಾಧ್ಯಕ್ಷರ ಪ್ರಮಾಣ ಸಮಾರಂಭದ ಕಾರಣ ತಮಿಳುನಾಡಿನ ತಿರುವರೂರ್ ಜಿಲ್ಲೆಯ ಮನ್ನಾರ್ಗುಡಿ ಮತ್ತು ತುಳಸೇಂತಿರಪುರಂ-ಪೈನಂಗಾಡು ಗ್ರಾಮಗಳ ವ್ಯಾಪ್ತಿಯಲ್ಲಿ ಸಂಭ್ರಮ ನೆಲೆಸಿದೆ. 10 ಕಿ.ಮೀ. ರಸ್ತೆ ಉದ್ದಕ್ಕೂ ಕಮಲಾ ಅವರ ಬಾಲ್ಯದ ಫೋಟೋಗಳು, ಅಮೆರಿಕದಲ್ಲಿನ ಇತ್ತೀಚಿನ ಫೋಟೋಗಳಿರುವ ಡಿಜಿಟಲ್ ಫ್ಲೆಕ್ಸ್ ರಾರಾಜಿಸುತ್ತಿವೆ. ಕಮಲಾ ಹ್ಯಾರಿಸ್ ಅವರ ತಾಯಿ ಶ್ಯಾಮಲಾ ಗೋಪಾಲನ್ ತವರು ಇದಾಗಿದ್ದು, ಸಂಬಂಧಿಕರು ಇಲ್ಲೇ ನೆಲೆಸಿದ್ದಾರೆ. ಮನೆಗಳ ಎದುರು ರಂಗೋಲಿ ಹಾಕಿದ್ದು, ಅಭಿಮಾನಿಗಳು ಪಟಾಕಿ ಸಿಡಿಸಿ ಸಂಭ್ರಮಾಚರಣೆಯಲ್ಲಿ ತೊಡಗಿದ್ದಾರೆ. ಕಮಲಾ ಫೋಟೋಗಳಿರುವ ಫಲಕಗಳು ರಾರಾಜಿಸುತ್ತಿವೆ. ಕಮಲಾ ಅಜ್ಜ ಪಿ.ವಿ.ಗೋಪಾಲನ್ ತುಳಸೇಂತಿಪುರಂ ಗ್ರಾಮದಿಂದ ಯೌವನದಲ್ಲೇ ಕೆಲಸದ ನಿಮಿತ್ತ ತೆರಳಿದವರು. ಅಜ್ಜಿ ರಾಜಮ್ಮ ಪೈನಂಗಾಡು ಗ್ರಾಮದವರು. ಆದಾಗ್ಯೂ, ಗ್ರಾಮದಲ್ಲಿ ಇನ್ನೂ ಸಂಬಂಧಿಕರಿದ್ದು, ಸಂಭ್ರಮಿಸುತ್ತಿದ್ದಾರೆ.
