ಟಿಬೆಟ್, ಹಾಂಕಾಂಗ್​ಗೆ ಸ್ವತಂತ್ರ ದೇಶದ ಮನ್ನಣೆ ನೀಡಿದ ಅಮೆರಿಕ

ವಾಷಿಂಗ್ಟನ್: ಕರೊನಾ ವಿಷಯದಲ್ಲಿ ಆರೋಪ ಮತ್ತು ಪ್ರತ್ಯಾರೋಪ ಮಾಡುತ್ತಿರುವ ಅಮೆರಿಕ ಹಾಗೂ ಚೀನಾ ಮಧ್ಯೆ ರಾಜಕೀಯ ವೈಷಮ್ಯ ಹೆಪು್ಪಗಟ್ಟುತ್ತಿದೆ. ಚೀನಾದ ಭಾಗವಾಗಿರುವ ಸ್ವಾಯತ್ತ ಟಿಬೆಟ್ ಮತ್ತು ಹಾಂಕಾಂಗ್​ಗಳನ್ನು ಸ್ವತಂತ್ರ ದೇಶವೆಂದು ಮನ್ನಣೆ ನೀಡುವ ಎರಡು ಮಸೂದೆ ಕಾಂಗ್ರೆಸ್​ನಲ್ಲಿ (ಸಂಸತ್) ಮಂಡನೆಯಾಗಿದೆ.

ಇದರಿಂದ ಚೀನಾ ಕಣ್ಣು ಕೆಂಪಗಾಗಿದೆ. ಪೀಪಲ್ಸ್ ರಿಪಬ್ಲಿಕ್ ಚೀನಾದ ಅಂಕೆಯಲ್ಲಿರುವ ಟಿಬೆಟ್ ಸ್ವಾಯತ್ತ ಭೂಪ್ರದೇಶ ಮತ್ತು ‘ಒಂದು ದೇಶ, ಎರಡು ವ್ಯವಸ್ಥೆ’ ಆಧಾರದಲ್ಲಿ ಸ್ವಯಂ ಆಡಳಿತ ಹೊಂದಿರುವ ಹಾಂಕಾಂಗ್​ನನ್ನು ಸ್ವತಂತ್ರ ದೇಶವೆಂದು ಮಾನ್ಯ ಮಾಡುವ ಅಧಿಕಾರವನ್ನು ಅಧ್ಯಕ್ಷರಿಗೆ ನೀಡುವ ಮಸೂದೆಯನ್ನು ಆಡಳಿತಾರೂಢ ರಿಪಬ್ಲಿಕನ್ ಪಕ್ಷದ ಸಂಸದ ಸ್ಕಾಟ್ ಪೆರ್ರಿ ಮಂಡಿಸಿದ್ದಾರೆ. ಈ ಎರಡೂ ಮಸೂದೆಗಳನ್ನು ವಿದೇಶಾಂಗ ವ್ಯವಹಾರ ಕುರಿತು ಸದನ ಸಮಿತಿಯ ಪರಿಶೀಲನೆಗೆ ಒಪ್ಪಿಸಲಾಗಿದೆ. ಸಮಿತಿಯು ವರದಿ ನೀಡಿದ ನಂತರ ಮಸೂದೆಯು ಪ್ರತಿನಿಧಿಗಳ ಸಭೆ (ಸಂಸತ್​ನ ಕೆಳಮನೆ) ಮತ್ತು ಸೆನೆಟ್ (ಮೇಲ್ಮನೆ) ಮುಂದೆ ಅನುಮೋದನೆಗೆ ಬರಲಿದೆ.

ಸ್ವಾತಂತ್ರ್ಯ ಪ್ರಿಯರ ಸ್ವಾಗತ

ಟಿಬೆಟ್​ಗೆ ಸ್ವತಂತ್ರ ದೇಶದ ಸ್ಥಾನಮಾನ ನೀಡುವ ಅಮೆರಿಕದ ಈ ಮಸೂದೆಯನ್ನು ಟಿಬೆಟ್ ದೇಶಾಂತರ ಸರ್ಕಾರದ ಬೆಂಬಲಿಗರು ಸ್ವಾಗತಿಸಿದ್ದಾರೆ. ಇದು ಈಗ ಅಥವಾ ನಂತರದಲ್ಲಿ ಯಾವಾಗ ಬೇಕಾದರೂ ಆಗಲಿ. ಆದರೆ, ಮಸೂದೆ ಮಂಡನೆ ಸ್ವಾಗತಾರ್ಹ. ಟಿಬೆಟ್ ಅನ್ನು ಸ್ವತಂತ್ರ ದೇಶವೆಂದು ಗುರುತಿಸುವುದಕ್ಕಿಂತ ದೊಡ್ಡ ನಿರ್ಬಂಧ ಚೀನಾ ಮೇಲೆ ಬೇರಾವುದು ಇಲ್ಲ ಎಂದಿದ್ದಾರೆ.

https://www.vijayavani.net/we-should-never-let-differences-overshadow-our-relations/