ನುಡಿಗಳ ಮೂಲಕ ಅಂಬೇಡ್ಕರ್​ ಅರಿವು ಸಾಧ್ಯ

ಕೋಲಾರ: ಸಂವಿಧಾನ ಶಿಲ್ಪಿ ಅಂಬೇಡ್ಕರ್​ ಅವರನ್ನು ನುಡಿಗಳ ಮೂಲಕ ಅರಿಯಬೇಕೇ ಹೊರತು ವಿಗ್ರಹಗಳ ಆರಾಧನೆ ಮೂಲಕವಲ್ಲ ಎಂಬ ಧ್ಯೇಯದೊಂದಿಗೆ "ಅಂಬೇಡ್ಕರ್​ ಗ್ರಂಥಾಲಯ ಚಳವಳಿ' ಪ್ರಾರಂಭಿಸಲಾಗಿದ್ದು, ಮುಂದಿನ ದಿನಗಳಲ್ಲಿ ಪ್ರತಿ ಗ್ರಾಮದಲ್ಲಿ ಸ್ಥಾಪನೆ ಮಾಡಲಾಗುವುದು ಎಂದು ಸಾಹಿತಿ ಕೋಟಿಗಾನಹಳ್ಳಿ ರಾಮಯ್ಯ ಹೇಳಿದರು.

ಬುಡ್ಡೀದಿಪ ಸಾಂಸತಿಕ ಕೇಂದ್ರದಲ್ಲಿ ಆಯೋಜಿಸಲಾಗಿದ್ದ ಗಣರಾಜ್ಯೋತ್ಸವದಲ್ಲಿ ಅಂಬೇಡ್ಕರ್​ ಲೈಬ್ರರಿ ಮೂವ್​ಮೆಂಟ್​ನ ಮೊದಲ ಗ್ರಂಥಾಲಯ ಉದ್ಘಾಟಿಸಿ ಮಾತನಾಡಿದ ಅವರು, ಅಂಬೇಡ್ಕರ್​ ಓದು ಸುಲಭವಾಗುವಂತೆ ಪ್ರತಿ ವಯೋಮಾನದವರಿಗೆ ಪ್ರತ್ಯೇಕವಾಗಿ ಅಂಬೇಡ್ಕರ್​ ಓದಿನ ಮಹತ್ವ ಅರಿವು ಮಾಡಿಸಲು ಕೃತಿಗಳ ರಚನೆಯೂ ಗ್ರಂಥಾಲಯದ ಭಾಗವಾಗಿರುತ್ತದೆ ಎಂದು ವಿವರಿಸಿದರು.

ಸುಮಾರು 50 ವರ್ಷಗಳ ದಲಿತ ಚಳವಳಿಯ ಹೋರಾಟದ ಹಾದಿಯಲ್ಲಿ ಕಂಡುಕೊಂಡ ಅನುಭವದ ಆಧಾರದ ಮೇಲೆ, ಅಂಬೇಡ್ಕರ್​ ಅವರನ್ನು ಓದುವ ಮುಂದಿನ ದಾರಿಗಳನ್ನು ರೂಪಿಸುವ ಬೆಳಕಿನ ಕೇಂದ್ರಗಳಾಗಿ ಪ್ರತಿ ಗ್ರಾಮದಲ್ಲಿಯೂ ಅಂಬೇಡ್ಕರ್​ ಗ್ರಂಥಾಲಯಗಳನ್ನು ತೆರೆದು ನಿತ್ಯವೂ ಮಕ್ಕಳಾದಿಯಾಗಿ ಪ್ರತಿಯೊಬ್ಬರು ಅಲ್ಲಿನ ಪುಸ್ತಕಗಳನ್ನು ಓದುವಂತಾಗಬೇಕೆಂಬ ವಾತಾವರಣ ನಿಮಾರ್ಣ ಮಾಡಲಾಗುತ್ತಿದೆ ಎಂದು ವಿವರಿಸಿದರು.

ಅಂಬೇಡ್ಕರ್​ ಅವರನ್ನು ವಿಗ್ರಹವಾಗಿಸಿ ಆಶಯಗಳನ್ನು ಸ್ಥಿರವಾಗಿಸದೆ ಗ್ರಂಥಾಲಯಗಳ ಮೂಲಕ ಅವರ ಆಶಯಗಳನ್ನು ನೆಲೆಗೊಳಿಸಲು ವೈವಿಧ್ಯಮ ಕಾರ್ಯಕ್ರಮಗಳನ್ನು ರೂಪಿಸಲಾಗಿದ್ದು, ಅಂಬೇಡ್ಕರ್​ ಗ್ರಂಥಾಲಯಗಳ ಮೂಲಕ ಅನುಷ್ಠಾನಗೊಳಿಸಲು ಉದ್ದೇಶಿಸಲಾಗಿದೆ. ಇದರ ಮೊದಲ ಹೆಜ್ಜೆ ಬುಡ್ಡೀದಿಪ ಅಂಬೇಡ್ಕರ್​ ಗ್ರಂಥಾಲಯದಿಂದ ಆರಂಭವಾಗಿದೆ. ಪ್ರತಿ ಗ್ರಂಥಾಲಯದಲ್ಲಿಯೂ ವರ್ಷಕ್ಕೆ ಆರು ವಿಶೇಷ ಉಪನ್ಯಾಸ ಹಾಗೂ ಇತರ ಕಾರ್ಯಕ್ರಮಗಳನ್ನು ಏರ್ಪಡಿಸಲು ಅವಕಾಶವಿರುತ್ತದೆ ಎಂದರು.

ಬುಡ್ಡೀದಿಪ ಅಂಬೇಡ್ಕರ್​ ಗ್ರಂಥಾಲಯ ಚಳವಳಿ ಭಾಗವಾಗಿರುವ ಹೈದರಾಬಾದ್​ನ ಕಾರ್ತಿಕ್​ ಮಾತನಾಡಿ, ಅಂಬೇಡ್ಕರ್​ ಗ್ರಂಥಾಲಯ ಓದಿನ ಮೂಲಕ ಭವಿಷ್ಯದ ಮಕ್ಕಳಿಗೆ ಸಾಂಸತಿಕ ಪಠ್ಯಗಳನ್ನು ರೂಪಿಸುವ, ಮಕ್ಕಳ ವ್ಯಕ್ತಿತ್ವ ವಿಕಸನಗೊಳಿಸುವ ರಂಗಭೂಮಿ ಚಟುವಟಿಕೆಗಳನ್ನು ನಡೆಸಲಾಗುವುದು ಎಂದರು.

ಕಲಾವಿದೆ ದುರ್ಗಕೋಟಿ ಮಾತನಾಡಿ, ಭಾರತೀಯ ಸಂವಿಧಾನ ಅನುಷ್ಠಾನಕ್ಕೆ ಬಂದ ಗಣರಾಜ್ಯೋತ್ಸವದಂದು ಅಂಬೇಡ್ಕರ್​ ಲೈಬ್ರರಿ ಮೂವ್​ಮೆಂಟ್​ ಉದ್ಘಾಟನೆಯಾಗುತ್ತಿದ್ದು, ಮಕ್ಕಳ ಭವಿಷ್ಯದ ಬೆಳವಣಿಗೆಯ ಉದ್ದೇಶವನ್ನಿಟ್ಟುಕೊಂಡು ಸಾಂಸತಿಕ ಚಟುವಟಿಕೆಗಳ ಮೂಲಕ ಅವರಲ್ಲಿರುವ ಕಲೆಯನ್ನು ಹೇಗೆ ಗುರುತಿಸಿಕೊಳ್ಳಬೇಕು ಮತ್ತು ಬೌದ್ಧಿಕವಾಗಿ ಹೇಗೆ ಬೆಳೆಯಬೇಕು ಎಂಬ ಕಾರಣಕ್ಕೆ ಅಂಬೇಡ್ಕರ್​ ಅವರ ಅನಿಹಿಲೇಷನ್​ ಆಫ್​ ಕ್ಯಾಸ್ಟ್​ ಪುಸ್ತಕ ಓದುವುದರೊಂದಿಗೆ ಕಾರ್ಯಕ್ರಮ ಆರಂಭಿಸಲಾಗುತ್ತಿದೆ ಎಂದರು.

ಕಾರ್ಯಕ್ರಮದಲ್ಲಿ ಚಳ್ಳಕೆರೆ ಕೆಂಪುಟವೆಲ್​ ಕರಿಯಣ್ಣ, ಮೈಸೂರು ಮಹಾದೇವ್​, ಮಂಡ್ಯ ರಾಮಚಂದ್ರ, ಸೋಮಣ್ಣ, ಡಾ.ಬೈರಪ್ಪ, ಗಂಗಪ್ಪ ತಳವಾರ್​, ಶಿವಪ್ಪ ಅರಿವು, ಚಾಮರಹಳ್ಳಿ ರಮೇಶ್​, ರಾಮನಗರ ಅಕ್ಷಯ್​, ಸಿಎಂಆರ್​ ಶ್ರೀನಾಥ್​, ಗಡ್ಡಂ ವೆಂಕಟೇಶ್​, ಚಂದನಗೌಡ, ನಾಯಂಡಹಳ್ಳಿ ಮುನಿರಾಂ, ಮೈಸೂರಿನ ಕಾವಾ ವಿದ್ಯಾರ್ಥಿ ಶಿವರಂಜನ್​, ಡಾ.ನೇತ್ರಾವತಿ, ಅಂಜಲಿ, ಡಾ.ವಿವೇಕ್​ ಹಾಜರಿದ್ದರು.