ಕೆರೆಯಲ್ಲಿ ಎಸ್​ಐ, ಲೇಡಿ ಕಾನ್ಸ್​ಟೆಬಲ್​, ಯುವಕನ ಶವ ಪತ್ತೆ​! ಪ್ರಕರಣ ಭೇದಿಸಲು ಪೊಲೀಸರ ಪರದಾಟ | Kamareddy Case

Kamareddy Case : ತೆಲಂಗಾಣದ ಕಾಮರೆಡ್ಡಿ ಜಿಲ್ಲೆಯಲ್ಲಿ ತೀವ್ರ ಸಂಚಲನ ಮೂಡಿಸಿರುವ ಸಬ್​ ಇನ್ಸ್​ಪೆಕ್ಟರ್​, ಲೇಡಿ ಕಾನ್‌ಸ್ಟೆಬಲ್ ಹಾಗೂ ಮತ್ತೊಬ್ಬ ಯುವಕನ ಸಾವಿನ ಪ್ರಕರಣದ ಸಸ್ಪೆನ್ಸ್ ಹಾಗೇ ಮುಂದುವರಿದಿದೆ. ಈ ಘಟನೆ ನಡೆದು ಏಳು ದಿನಗಳು ಕಳೆದರೂ ಈ ತ್ರಿಕೋನ ಸೂಸೈಡ್ ಮಿಸ್ಟರಿಯಲ್ಲಿ ಇನ್ನೂ ಯಾವುದೇ ಪ್ರಗತಿ ಕಂಡಿಲ್ಲ.

ಎಸ್‌ಐ ಸಾಯಿಕುಮಾರ್, ಲೇಡಿ ಕಾನ್ಸ್​ಟೆಬಲ್​ ಶ್ರುತಿ ಹಾಗೂ ಕಂಪ್ಯೂಟರ್​ ಆಪರೇಟರ್​ ನಿಖಿಲ್ ಸಾವಿನ ಬಗ್ಗೆ ಹಲವು ಅನುಮಾನಗಳು ಮೂಡಿವೆ. ಈ ಪ್ರಕರಣವನ್ನು ಪೊಲೀಸರು ವಿವಿಧ ಆಯಾಮಗಳಲ್ಲಿ ತನಿಖೆ ನಡೆಸುತ್ತಿದ್ದಾರೆ. ಸಾವಿನ ಘಟನೆಯನ್ನು ನೇರವಾಗಿ ಕಂಡ ಪ್ರತ್ಯಕ್ಷದರ್ಶಿಗಳು ಯಾರು ಇಲ್ಲ ಎಂದು ಕಾಮರೆಡ್ಡಿ ಪೊಲೀಸ್​ ವರಿಷ್ಠಾಧಿಕಾರಿ ಸಿಂಧು ಶರ್ಮಾ ಸ್ಪಷ್ಟಪಡಿಸಿದ್ದಾರೆ.

ಮೃತ ಮೂವರಲ್ಲಿ ಒಬ್ಬರು ಮೊದಲು ಹೊಂಡಕ್ಕೆ ಹಾರಿದಾಗ ಉಳಿದ ಇಬ್ಬರು ಆತನನ್ನು ರಕ್ಷಿಸಲು ಪ್ರಯತ್ನಿಸಿದಾಗ ಮೃತಪಟ್ಟಿದ್ದಾರೆ ಎಂದು ಪೊಲೀಸರು ಶಂಕಿಸಿದ್ದಾರೆ. ಮೃತ ನಿಖಿಲ್​ಗಿದ್ದ ಜೀವ ಬೆದರಿಕೆ ದೂರಿನ ಬಗ್ಗೆಯೂ ತನಿಖೆ ನಡೆಸುತ್ತಿದ್ದೇವೆ ಎಂದು ಪೊಲೀಸರು ಇದೇ ಸಂದರ್ಭದಲ್ಲಿ ತಿಳಿಸಿದ್ದಾರೆ. ಮತ್ತೊಂದೆಡೆ, ಈ ಪ್ರಕರಣದ ಪ್ರಗತಿಗಾಗಿ ಕಾಮರೆಡ್ಡಿ ಪೊಲೀಸರ ಮೇಲೆ ನಿರಂತರವಾಗಿ ಒತ್ತಡ ಹೆಚ್ಚಾಗುತ್ತದೆ. ಈ ಸಾವಿನ ಪ್ರಕರಣದಲ್ಲಿ ಸೈಬರ್ ಫೊರೆನ್ಸಿಕ್ ವರದಿ ನಿರ್ಣಾಯಕವಾಗಲಿದೆ. ಸದ್ಯ ಪ್ರಕರಣದ ತನಿಖೆಯಲ್ಲಿ ಊಹಾಪೋಹ ಬಿಟ್ಟರೆ ಬೇರೆ ಯಾವುದೇ ಬೆಳವಣಿಗೆ ಕಂಡುಬಂದಿಲ್ಲ. ಈ ಪ್ರಕರಣ ಭೇದಿಸಲು ಪೊಲೀಸರು ಪರದಾಡುತ್ತಿದ್ದಾರೆ. ಹೀಗಾಗಿ ಈ ಪ್ರಕರಣ ಇನ್ನೂ ನಿಗೂಢವಾಗಿದೆ.

ಇದನ್ನೂ ಓದಿ: ಅಲ್ಲು ಅರ್ಜುನ್​​ ಜತೆ ಸೊಂಟ ಬಳುಕಿಸಿರೋ ಈ ಬ್ಯೂಟಿ ಯಾರು ಗೊತ್ತಾ? ಈಕೆಯ ಟ್ಯಾಲೆಂಟ್ ಕೇಳಿದ್ರೆ ಬೆರಗಾಗ್ತೀರಿ!​ Allu Arjun

ಇನ್ನು ಫೋನ್ ಕರೆ ಮತ್ತು ವಾಟ್ಸ್​ಆ್ಯಪ್​ ಚಾಟ್​ ಡೇಟಾ ಕೂಡ ಈ ಪ್ರಕರಣಕ್ಕೆ ತುಂಬಾ ನಿರ್ಣಾಯಕವಾಗಿದೆ. ಭಿಕ್ಕನೂರು ಎಸ್‌ಐ ಸಾಯಿಕುಮಾರ್‌, ಬೀಬಿ ಪೇಟೆಯ ಕಾನ್‌ಸ್ಟೆಬಲ್‌ ಶ್ರುತಿ, ಕಂಪ್ಯೂಟರ್‌ ಆಪರೇಟರ್‌ ನಿಖಿಲ್‌ ಸಾವಿನ ದಿನ ಗಂಟೆಗಟ್ಟಲೆ ಫೋನ್‌ನಲ್ಲಿ ಮಾತನಾಡಿರುವುದು ಪೊಲೀಸರಿಗೆ ಗೊತ್ತಾಗಿದೆ. ಬುಧವಾರ ಮುಂಜಾನೆಯಿಂದ ಮೂವರು ಫೋನ್‌ನಲ್ಲಿ ಮಾತನಾಡುತ್ತಿದ್ದರು ಎಂದು ಕಾಲ್ ಡೇಟಾದಿಂದ ತಿಳಿದುಬಂದಿದೆ. ಸಾಯಿಕುಮಾರ್ ಅವರು ಎರಡು ಫೋನ್‌ಗಳಲ್ಲಿ ಮೂರು ಸಿಮ್ ಬಳಸಿದ್ದರೆ, ನಿಖಿಲ್ ಎರಡು ಫೋನ್ ಬಳಸಿದ್ದಾರೆ. ಶ್ರುತಿ ಒಂದು ಫೋನ್ ಬಳಸಿದ್ದಾರೆ. ಸಾವಿಗೂ ಒಂದು ವಾರದ ಹಿಂದಿನಿಂದಲೂ ಮೂವರು ಫೋನ್‌ನಲ್ಲಿ ಸಾಕಷ್ಟು ಮಾತನಾಡುತ್ತಿದ್ದರು ಎಂದು ಕಂಡುಬಂದಿದೆ. ಜಿಲ್ಲಾಧಿಕಾರಿಗಳ ಜೊತೆ ಫೋನ್ ಕಾನ್ಫರೆನ್ಸ್‌ನಲ್ಲಿದ್ದ ಸಮಯವನ್ನು ಹೊರತುಪಡಿಸಿ, ಇಡೀ ಸಮಯ ಸಾಯಿಕುಮಾರ್ ಶ್ರುತಿ ಮತ್ತು ನಿಖಿಲ್ ಅವರೊಂದಿಗೆ ಫೋನ್‌ನಲ್ಲಿ ಮಾತನಾಡುತ್ತಿದ್ದರಂತೆ.

ಶ್ರುತಿ ಮತ್ತು ನಿಖಿಲ್ ಅವರ ವಾಟ್ಸ್​ಆ್ಯಪ್​ ಸಂದೇಶಗಳನ್ನು ಪೊಲೀಸರು ಪರಿಶೀಲಿಸಿದ್ದಾರೆ. ಇವರಿಬ್ಬರ ನಡುವೆ ಪ್ರೇಮ ಸಂಬಂಧ ಇರುವುದನ್ನು ವಾಟ್ಸ್​ಆ್ಯಪ್​ ಸಂದೇಶಗಳು ಸ್ಪಷ್ಟಪಡಿಸಿವೆ ಎನ್ನುತ್ತವೆ ಪೊಲೀಸ್ ಮೂಲಗಳು. ಆದರೆ, ಇವರಿಬ್ಬರ ಪ್ರೇಮ ಪ್ರಕರಣಕ್ಕೆ ಸಾಯಿಕುಮಾರ್ ಏಕೆ ಅಡ್ಡಿ ಪಡಿಸಿದರು ಎಂಬುದು ಈಗ ನಿರ್ಣಾಯಕವಾಗಿದೆ. ನಿಖಿಲ್ ಮತ್ತು ಶ್ರುತಿ ಮದುವೆಯಾಗಲು ಬಯಸಿದ್ದರು ಎಂಬ ಪ್ರಚಾರವೂ ಇದೆ. ಆದರೆ ಭಿನ್ನಾಭಿಪ್ರಾಯಗಳು ಉಂಟಾಗಿ ಮದುವೆಯನ್ನು ಮುಂದೂಡಲಾಯಿತು, ಇದು ಜಗಳಕ್ಕೆ ಕಾರಣವಾಯಿತು ಎನ್ನಲಾಗಿದೆ.

ಅಂದಹಾಗೆ ಈ ತಿಂಗಳ 25ರಂದು ಕಾಮರೆಡ್ಡಿ ಜಿಲ್ಲಾಸ್ಪತ್ರೆ ಸಮೀಪದ ಅಡ್ಲೂರು ಯಲ್ಲರೆಡ್ಡಿ ಎಂಬಲ್ಲಿನ ದೊಡ್ಡ ಹೊಂಡದಲ್ಲಿ ಮೂವರೂ ಮುಳುಗಿ ಮೃತಪಟ್ಟರು. ಈ ಸುದ್ದಿ ಜಿಲ್ಲೆಯಾದ್ಯಂತ ಮಾತ್ರವಲ್ಲದೆ, ತೆಲಂಗಾಣದಲ್ಲೇ ದೊಡ್ಡ ಸುದ್ದಿಯಾಗಿದೆ. (ಏಜೆನ್ಸೀಸ್​)

https://www.vijayavani.net/si-female-constable-nikhil-dead-what-happened-to-police-officers-at-the-pond

https://www.vijayavani.net/do-you-know-who-this-beauty-is-next-to-allu-arjun-youll-be-shocked-to-know-her-talent