ಬಿಜೆಪಿ ಕುರಿತು ಜನರಲ್ಲಿ ಒಲವು ಹೆಚ್ಚಿರುವುದು ಈಚಿನ ಸಮಾವೇಶಗಳಲ್ಲೂ ದೃಢಪಟ್ಟಿದೆ. ರಾಜ್ಯಾಧ್ಯಕ್ಷ ಎಲ್. ಮುರುಗನ್, ಮಾಜಿ ಪೊಲೀಸ್ ಅಧಿಕಾರಿ ಕೆ. ಅಣ್ಣಾಮಲೈ ಸೇರಿ ಕೆಲ ನಾಯಕರ ಬಗ್ಗೆ ಮತದಾರರಲ್ಲಿ ಭರವಸೆ ಕಾಣುತ್ತಿದೆ. ಸದ್ಯ ತಮಿಳುನಾಡಿನಲ್ಲಿ ಬಿಜೆಪಿಗೆ ಒಂದೇ ಒಂದು ಶಾಸಕ ಅಥವಾ ಸಂಸದ ಸ್ಥಾನ ಇಲ್ಲದಿದ್ದರೂ, ರಾಜ್ಯ ಚುನಾವಣೆಯಲ್ಲಿ ಖಾತೆ ತೆರೆಯುವ ಜತೆಗೆ ಕೆಲ ಕ್ಷೇತ್ರಗಳನ್ನು ಗೆಲ್ಲುವ ಗುರಿ ಇಟ್ಟುಕೊಂಡಿದೆ. ಒಂದುವೇಳೆ ಮೈತ್ರಿ ಮೂಲಕ ಚುನಾವಣೆ ಗೆದ್ದರೆ, ಅಧಿಕಾರ ಹಂಚಿಕೆಯಲ್ಲಿ ಬಿಜೆಪಿಗೆ ಪಾಲು ಇರಬೇಕು ಎಂದು ಒತ್ತಾಯಿಸುವುದು ಖಂಡಿತ. ಹೀಗಾಗಿಯೇ, ‘ನಿಮ್ಮ ಮಿತಿಯಲ್ಲಿ ನೀವಿರಬೇಕು’ ಎಂದು ಎಐಎಡಿಎಂಕೆ ಸಹ ಸಂಯೋಜಕ, ರಾಜ್ಯಸಭೆ ಮಾಜಿ ಸದಸ್ಯ ಕೆ.ಪಿ. ಮುನುಸ್ವಾಮಿ ಬಿಜೆಪಿ ವಿರುದ್ಧ ನೀಡಿರುವ ಈ ಹೇಳಿಕೆ ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ.
