ಮತ್ತೆ ಬೆಲೆಯೇರಿಕೆ ಬರೆ: ತೆರಿಗೆ ಭಾರ ಹೆಚ್ಚಿಸಿದ ಜಿಎಸ್​ಟಿ; ಮಂಡಳಿ 47ನೇ ಸಭೆಯಲ್ಲಿ ನಿರ್ಧಾರ..

ಚಂಡೀಗಢ: ನಿಯಂತ್ರಣಕ್ಕೆ ಸಿಗದ ಹಣದುಬ್ಬರದಿಂದಾಗಿ ದಿನಬಳಕೆ ವಸ್ತುಗಳ ಬೆಲೆ ಗಗನಕ್ಕೇರುತ್ತಿರುವ ನಡುವೆಯೇ, ಕೇಂದ್ರ ಸರ್ಕಾರವೂ ಜನಸಾಮಾನ್ಯರ ಮೇಲೆ ತೆರಿಗೆ ಹೆಚ್ಚಳದ ಹೊರೆಯನ್ನು ಹೇರಿದೆ.

ಸರಕು ಮತ್ತು ಸೇವಾ ತೆರಿಗೆ (ಜಿಎಸ್​ಟಿ) ಮಂಡಳಿಯ 47ನೇ ಸಭೆ ಹಲವು ವಸ್ತು ಹಾಗೂ ಸೇವೆಗಳ ಮೇಲಿನ ತೆರಿಗೆಯನ್ನು ಬದಲಾವಣೆ ಮಾಡಿ ನಿರ್ಧಾರ ಕೈಗೊಂಡಿದೆ. ಪ್ರಿ-ಪ್ಯಾಕ್ ಮತ್ತು ಪ್ರಿ-ಪ್ಯಾಕ್ ಲೇಬಲ್ ಹಾಕಿರುವ ಆಹಾರ ಪದಾರ್ಥಗಳ ಮೇಲೆ ತೆರಿಗೆ ವಿಧಿಸಲಾಗಿದ್ದರೆ, ಕೆಲ ವಸ್ತುಗಳ ಕರ ಕಡಿಮೆ ಮಾಡಲಾಗಿದೆ. ಈ ಬದಲಾವಣೆಗಳು ಜುಲೈ 18ರಿಂದ ಜಾರಿಗೆ ಬರಲಿವೆ.

ಕೆಲವು ವಸ್ತು ಮತ್ತು ಸೇವೆಗಳ ತೆರಿಗೆ ಹೆಚ್ಚಳ ಮತ್ತು ತೆರಿಗೆ ವಿನಾಯಿತಿಯನ್ನು ರದ್ದು ಮಾಡುವುದಕ್ಕೆ ಎರಡು ಸಮಿತಿಗಳು ಸಲ್ಲಿಸಿದ್ದ ಮಧ್ಯಂತರ ವರದಿಗೆ ಸಭೆ ಸಮ್ಮತಿ ಸೂಚಿಸಿದೆ. ಕ್ಯಾಸಿನೊ, ಆನ್​ಲೈನ್ ಗೇಮ್ ಲಾಟರಿ, ಕುದುರೆ ರೇಸ್​ಗಳ ಮೇಲೆ ಶೇ.28ರಷ್ಟು ತೆರಿಗೆ ವಿಧಿಸಬೇಕು ಎಂಬ ಶಿಫಾರಸನ್ನು ಮರುಪರಿಶೀಲನೆ ನಡೆಸಿ ಜುಲೈ 15ಕ್ಕೆ ಹೊಸ ವರದಿ ಸಲ್ಲಿಸುವಂತೆ ಸಚಿವರ ಗುಂಪಿನ ಸಮಿತಿಗೆ ಸೂಚಿಸಿದೆ. ಹಾಗೆಯೇ ಜಿಎಸ್​ಟಿ ಸ್ಲ್ಯಾಬ್ ಪರಿಷ್ಕರಣೆ ಕುರಿತು ಮೂರು ತಿಂಗಳಲ್ಲಿ ವರದಿ ಸಲ್ಲಿಸಲು ತಿಳಿಸಿದೆ. ಗುರುವಾರಕ್ಕೆ ಕೊನೆಗೊಳ್ಳಲಿರುವ (ಜು.30) ರಾಜ್ಯಗಳಿಗೆ ನೀಡುವ ಪರಿಹಾರವನ್ನು ಮುಂದುವರಿಸಬೇಕು ಎಂಬ ಮನವಿಯ ಬಗ್ಗೆ ಯಾವುದೇ ನಿರ್ಧಾರ ಕೈಗೊಂಡಿಲ್ಲ. 12ಕ್ಕೂ ಹೆಚ್ಚು ರಾಜ್ಯಗಳು ಜಿಎಸ್​ಟಿ ಪರಿಹಾರ ಮುಂದುವರಿಸಲು ಒತ್ತಾಯಿಸಿವೆ.

ಆಯ್ಕೆಗೆ ಅವಕಾಶ: ರಸ್ತೆ ಸಾರಿಗೆ ಸೇವಾದಾತರಿಗೆ ಐಟಿಸಿ ಹೊರತಾಗಿ ಶೇ.5, ಐಟಿಸಿಸಹಿತವಾಗಿ ಶೇ.12ರಷ್ಟು ತೆರಿಗೆ ವಿಧಿಸುವ ಆಯ್ಕೆ ನೀಡಲಾಗಿದೆ. ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅಧ್ಯಕ್ಷೆಯಲ್ಲಿ ಮಂಗಳವಾರ ಮತ್ತು ಬುಧವಾರ ನಡೆದ ಈ ಸಭೆಯಲ್ಲಿ ರಾಜ್ಯಗಳ ಹಣಕಾಸು ಮಂತ್ರಿಗಳು ಹಾಗೂ ರಾಜ್ಯಗಳಿಂದ ನಿಯೋಜಿತರಾಗಿದ್ದ ಪ್ರತಿನಿಧಿಗಳು ಭಾಗಿಯಾಗಿದ್ದರು. ಕರ್ನಾಟಕ ಸಿಎಂ ಬಸವರಾಜ ಬೊಮ್ಮಾಯಿ ಮತ್ತು ಮೇಘಾಲಯ ಸಿಎಂ ಕಾನ್ರಾಡ್ ಸಂಗ್ಮಾ ನೇತೃತ್ವದ ಸಮಿತಿಗಳು ತೆರಿಗೆ ಪರಿಷ್ಕರಣೆ ಕುರಿತು ಮಧ್ಯಂತರ ವರದಿಯನ್ನು ಮಂಡಿಸಿದ್ದವು.

ತೆರಿಗೆ ಇಳಿಕೆ

• ಶೇ. 12ರಿಂದ 5: ಅಸ್ಟೋಮಿ (ಶಸ್ತ್ರಚಿಕಿತ್ಸೆ) ವೈದ್ಯಕೀಯ ಪರಿಕರ, ವಸ್ತುಗಳು, ಮೂಳೆ ಸಂಬಂಧಿ ರೋಗಗಳ ಚಿಕಿತ್ಸೆಗೆ ಬಳಸುವ ವಸ್ತುಗಳು ಹಾಗೂ ಕೃತಕ ಅಂಗ.
• ಶೇ. 18ರಿಂದ 5: ರೋಪ್ ವೇ ಪಯಣ ಅಥವಾ ಸರಕು ಸಾಗಣೆ (ಸೇವೆ ಇನ್​ಪುಟ್ ಕ್ರೆಡಿಟ್ ನೀಡಲಾಗಿದೆ)
• ಶೇ.18ರಿಂದ 12: ಇಂಧನ ವೆಚ್ಚವನ್ನು ಒಳಗೊಂಡ ನಿರ್ವಾಹಕರಸಹಿತ ಸರಕು ಸಾಗಣೆ

ಐಜಿಎಸ್​ಟಿಯಿಂದ ವಿನಾಯಿತಿ: ಕ್ರಿಮಿ-ಕೀಟಗಳಿಂದ ಹರಡುವ ಸಾಂಕ್ರಾಮಿಕ ರೋಗಗಳ ತಡೆಯ ರಾಷ್ಟ್ರೀಯ ಕಾರ್ಯಕ್ರಮಕ್ಕೆ ವಿದೇಶದಿಂದ ಪೂರೈಕೆಯಾಗುವ ಮಾತ್ರೆಗಳು, ಖಾಸಗಿ ಸಂಸ್ಥೆಗಳು ಆಮದು ಮಾಡಿಕೊಳ್ಳುವಂತಹ ಮತ್ತು ರಕ್ಷಣಾ ಪಡೆಗಳ ಬಳಕೆಗೆ ನೀಡುವಂತಹ ಉಪಕರಣಗಳನ್ನು ಐಜಿಎಸ್​ಟಿಯಿಂದ ಹೊರಗಿಡಲಾಗಿದೆ. ಪ್ಯಾಕ್ ಮಾಡದ, ಲೇಬಲ್ ಇಲ್ಲದ ಆಹಾರ ಪದಾರ್ಥಗಳಿಗೆ ತೆರಿಗೆ ಇಲ್ಲ.

ಸಣ್ಣ ಉದ್ದಿಮೆಗಳಿಗೆ ನಿರಾಳ: ವಾರ್ಷಿಕವಾಗಿ 40 ಲಕ್ಷ ರೂಪಾಯಿ ವಹಿವಾಟು ನಡೆಸುವ ಉದ್ದಿಮೆ, ಸರಕು, ಸೇವೆ ಕಲ್ಪಿಸುವ ಹಾಗೂ ಆನ್​ಲೈನ್ ಮೂಲಕ ಸರಕು ಮಾರಾಟ ಮಾಡುವ 20 ಲಕ್ಷ ರೂಪಾಯಿಯೊಳಗಿನ ಕಂಪನಿಗಳಿಗೆ ಜಿಎಸ್​ಟಿ ಕಡ್ಡಾಯ ನೋಂದಣಿಯಿಂದ ವಿನಾಯಿತಿ ನೀಡಲಾಗಿದೆ. ಚಿನ್ನಾಭರಣ, ಹರಳುಗಳ ಸಾಗಣೆಯ ಇ-ವೇ ಬಿಲ್​ಗಳ ಬಗ್ಗೆ ರಾಜ್ಯ ಸರ್ಕಾರಗಳು ತೆರಿಗೆ ನಿರ್ಧಾರ ಮಾಡಲಿ ಎಂದು ಜಿಎಸ್​ಟಿ ಮಂಡಳಿ ಸಲಹೆ ನೀಡಿದೆ.

ಶ್ರೇಣಿವಾರು ಕರ ಹೆಚ್ಚಳ

• ಶೇ.5: ಮೊಸರು, ಲಸ್ಸಿ, ಮಜ್ಜಿಗೆ, ಜೇನುತುಪ್ಪ, ಒಣಕಾಳು, ತರಕಾರಿ, ಮಾಂಸ, ಮೀನು.
• ಶೇ.12: ನಕ್ಷೆ, (ಮ್ಯಾಪ್), ಅಟ್ಲಾಸ್
• ಶೇ.18: ಚೆಕ್ ಬುಕ್ ವಿತರಣೆಗೆ ಬ್ಯಾಂಕ್​ಗಳು ವಿಧಿಸುವ ಸೇವಾ ಶುಲ್ಕ.
• ಶೇ.5ರಿಂದ 12: ಪೆಟ್ರೋಲಿಯಂ/ಕೋಲ್​ಬೆಡ್ ಮಿಥೇನ್, ವೈಜ್ಞಾನಿಕ ಮತ್ತು ತಾಂತ್ರಿಕ ಉಪಕರಣಗಳು.
• ಶೇ.5ರಿಂದ 18: ಇ-ತ್ಯಾಜ್ಯ
• ಶೇ.12ರಿಂದ 18: ಎಲ್​ಇಡಿ ಲೈಟ್, ಪ್ರಿಂಟಿಂಗ್ ಇಂಕ್, ಚಾಕು, ಪೇಪರ್ ಕಟಿಂಗ್ ಬ್ಲೇಡ್, ಪೆನ್ಸಿಲ್ ಶಾರ್ಪನರ್, ಚಮಚ, ಫೋರ್ಕ್, ಸೌಟು, ಜಾಲರಿ ಸೌಟು, ಕೇಕ್ ಸರ್ವರ್ ಸಾಧನ, ವಾಟರ್ ಪಂಪ್, ಆಳದ ಬಾವಿಯ ಟರ್ಬೆನ್ ಪಂಪ್, ಸಬ್​ವುರ್ಸಿಬಲ್ ಪಂಪ್, ಬೈಸಿಕಲ್ ಪಂಪ್, ಬೀಜ, ಧಾನ್ಯಗಳನ್ನು ಸ್ವಚ್ಛಗೊಳಸುವ/ಸಂಸ್ಕರಣಾ ಯಂತ್ರ, ರುಬ್ಬುವ ಯಂತ್ರ.

ವಿನಾಯಿತಿ ಕೈಬಿಟ್ಟ ಸೇವೆ

• ಆರ್​ಬಿಐ, ಐಆರ್​ಡಿಐ, ಸೆಬಿ, ಎಫ್​ಎಸ್​ಎಸ್​ಎಐಗಳ ಸೇವೆಗಳು
• ಒಂದು ಸಾವಿರ ರೂ.ಗಿಂತ ಕಡಿಮೆ ಬಾಡಿಗೆ ಇರುವ ಹೋಟೆಲ್ ರೂಮ್ (ಶೇ.12 ತೆರಿಗೆ ಅನ್ವಯ)
• ಐದು ಸಾವಿರ ರೂ. ಮೇಲ್ಪಟ್ಟ ಆಸ್ಪತ್ರೆ ವಾರ್ಡ್ (ಶೇ.5 ಟ್ಯಾಕ್ಸ್ ಪಾವತಿ)

https://www.vijayavani.net/dr-bro-kannada-interview-continued-part-is-here/

https://www.vijayavani.net/father-killed-his-two-children-and-surrendered-to-police/