ಕರೊನಾ, ಡೆಂಘ, ಮಲೇರಿಯಾ ಇದೀಗ ಕಾಳಿಂಗ ಸರ್ಪ ಕಚ್ಚಿದರೂ ಬದುಕಿದ!

ಜೋಧ್​ಪುರ: ಭಾರತ ಭೇಟಿಯಲ್ಲಿದ್ದಾಗ ಕೋವಿಡ್-19, ಡೆಂಘ ಮತ್ತು ಮಲೇರಿಯಾ ರೋಗಪೀಡಿತರಾಗಿ ಗುಣಮುಖರಾದ ಬ್ರಿಟನ್ ಪ್ರಜೆ ಇಯಾನ್ ಜೋನ್ಸ್ ಇದೀಗ ಕಾಳಿಂಗ ಸರ್ಪ ಕಡಿತಕ್ಕೆ ಒಳಗಾಗಿ ಚೇತರಿಸಿಕೊಳ್ಳುತ್ತಿದ್ದಾರೆ.

ರಾಜಸ್ಥಾನದ ಜೋಧ್​ಪುರ ಸಮೀಪದ ಹಳ್ಳಿಯೊಂದರಲ್ಲಿ ಕಳೆದ ವಾರ ಕಾಳಿಂಗ ಸರ್ಪವೊಂದು ಜೋನ್ಸ್​ರನ್ನು ಕಚ್ಚಿದ್ದು, ಅವರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ದಕ್ಷಿಣ ಇಂಗ್ಲೆಂಡ್​ನ ಐಸ್ಲ್ ವೈಟ್​ನವರಾದ ಜೋನ್ಸ್, ಹಾವು ಕಡಿತ ಬಳಿಕ ಮಂದ ದೃಷ್ಟಿ ಹಾಗೂ ನಡೆಯಲು ಸಮಸ್ಯೆ ಎದುರಿಸಿದ್ದರು. ಈ ಸಮಸ್ಯೆ ಕ್ರಮೇಣ ಗುಣಮುಖವಾಗುವುದೆಂದು ಹೇಳಿದ್ದಾರೆ.

ಜೋನ್ಸ್ ಎರಡನೇ ಬಾರಿ ಕೋವಿಡ್​ಗೆ ಒಳಗಾಗಿರಬಹುದು ಎಂಬ ಶಂಕೆ ವ್ಯಕ್ತವಾಗಿತ್ತು. ಆದರೆ ಪರೀಕ್ಷೆಯಲ್ಲಿ ನೆಗೆಟಿವ್ ಬಂದಿದೆ ಎಂದು ಸ್ಥಳೀಯ ಆಸ್ಪತ್ರೆಯ ವೈದ್ಯ ಅಭಿಷೇಕ್ ಟೇಟರ್ ಹೇಳಿದ್ದಾರೆ. ಬ್ರಿಟನ್​ನಲ್ಲಿ ಆರೋಗ್ಯ ಕಾರ್ಯಕರ್ತರಾಗಿದ್ದ ಜೋನ್ಸ್, ರಾಜಸ್ಥಾನದ ಸಾಂಪ್ರದಾಯಿಕ ಕುಶಲಕರ್ವಿುಗಳಿಗೆ ನೆರವಾಗುವ ಸ್ವಯಂಸೇವಾ ಸಂಸ್ಥೆಯೊಂದನ್ನು ನಡೆಸಲು ಭಾರತಕ್ಕೆ ಬಂದಿದ್ದಾರೆ. ಜೋನ್ಸ್​ರ ಆಸ್ಪತ್ರೆ ವೆಚ್ಚ ಭರಿಸಲು ಹಾಗೂ ಸ್ವದೇಶಕ್ಕೆ ಮರಳಲು ಅನುಕೂಲವಾಗಲು ಅವರ ಕುಟುಂಬ 12,000 ಪೌಂಡ್ ಹಣ ಸಂಗ್ರಹ ಮಾಡಿದೆ.