ನಮ್ಮ ದುಃಖಕ್ಕೆ ನಮ್ಮ ಅಜ್ಞಾನವೇ ಕಾರಣ. ಜ್ಞಾನದತ್ತ ನಮ್ಮ ಪ್ರಯಾಣ ಸಾಗಬೇಕು. ಇದರ ಅರಿವೇ ದೊಡ್ಡ ಸಾಧನೆ. ಎಷ್ಟೋ ಜನರಿಗೆ ಇದರ ಬಗ್ಗೆ ತಿಳಿದಿರುವುದಿಲ್ಲ. ತಾವು ದುಃಖಿಗಳಾಗುವುದಕ್ಕೆ ಇತರರು ಕಾರಣವೆಂದು ತಿಳಿದು ಹೊರಜಗತ್ತನ್ನು ತಿದ್ದಲು ಹೋಗು ತ್ತಾರೆ. ಅಂತಹ ಜನರಿಗೆ ನೆಮ್ಮದಿಯ ಮಾತು ದೂರವೇ ಸರಿ. ನಮ್ಮ ಶಾಸ್ತ್ರದಲ್ಲಿ ಈ ವಿಚಾರದ ಪ್ರಸ್ತಾಪ ಹಲವಾರು ಕಡೆ ಬಂದಿದೆ. ನಮ್ಮ ಅಜ್ಞಾನಕ್ಕೆ ಅಂದರೆ ದುಃಖಕ್ಕೆ ಕಾರಣವೇನು ಎಂಬುದನ್ನು ಶ್ರೀಕೃಷ್ಣ ಪರಮಾತ್ಮನು ಭಗವದ್ಗೀತೆಯ ಎರಡನೇ ಅಧ್ಯಾಯದಲ್ಲಿ ಹೀಗೆ ತಿಳಿಸಿದ್ದಾನೆ: ಅಜ್ಞಾನದಿಂದ ಹೊರಜಗತ್ತಿನ ವಿಷಯಗಳನ್ನು ಸತ್ಯವೆಂದು ಭ್ರಮಿಸಿದಾಗ ಅವುಗಳಿಂದಲೇ ನಿಜವಾದ ಆನಂದ ಸಿಗುತ್ತಿದೆ ಎಂಬ ಭ್ರಮೆಯುಂಟಾಗುತ್ತದೆ.
