ಬೆಂಗಳೂರು: ಕನ್ನಡದ ‘ಮೇರಿ’, ‘ಇಂಗ್ಲೀಷ್ ಮಂಜ’ ಖ್ಯಾತಿಯ ನಟಿ ತೇಜಸ್ವಿನಿ ಶರ್ಮಾಗೆ ಮಡಿಕೇರಿ ಹಾಗೂ ಮೈಸೂರು ದಸರಾದ ನಂಟು ಮೊದಲಿನಿಂದಲೂ ಇದೆ. ಅವರು ಮೂಲತಃ ಕೊಡಗಿನವರಾಗಿದ್ದು, ಚಿಕ್ಕಂದಿನಿಂದಲೂ ಮಡಿಕೇರಿ ದಸರಾವನ್ನು ಕಣ್ತುಂಬಿಕೊಂಡೆ ಬೆಳೆದಿದ್ದಾರೆ. ಇನ್ನು, ಓದಿದ್ದು ಮೈಸೂರಿನಲ್ಲಿ. ಹೀಗಾಗಿ ಅವರಿಗೆ ಮೈಸೂರು ದಸರಾದ ಅವಿಸ್ಮರಣೀಯ ನೆನಪುಗಳಿವೆ. ಸದ್ಯ ಮಾಡೆಲಿಂಗ್ ಹಾಗೂ ಎರಡು ಸಿನಿಮಾಗಳಲ್ಲಿ ಬಿಜಿ ಇರುವ ಅವರಿಗೆ ಈ ಬಾರಿಯ ದಸರಾ ವಿಶೇಷವಾಗಿದೆ. ‘ನಮ್ಮ ಕುಟುಂಬದವರೆಲ್ಲರೂ ದೇವಿ ಭಕ್ತರಾಗಿದ್ದು, ಶ್ರದ್ಧೆಯಿಂದ ನವರಾತ್ರಿ ಆಚರಿಸುತ್ತೇವೆ. ಪ್ರತಿ ವರ್ಷವೂ ನಾನು ಹಬ್ಬದಲ್ಲಿ ಆ ದಿನದ ಬಣ್ಣದ ಸೀರೆ ಧರಿಸಿ, ದೇವಸ್ಥಾನಗಳಿಗೆ ತೆರಳಿ ಪೂಜೆ ಸಲ್ಲಿಸುತ್ತೇನೆ. ಒಂಬತ್ತು ದಿನಾನೂ ಧ್ಯಾನ ಮಾಡುತ್ತೇನೆ. ಹಣ್ಣುಗಳನ್ನಷ್ಟೇ ಸೇವಿಸುತ್ತೇನೆ. ಈ ಬಾರಿ ಹಬ್ಬದ ಮೊದಲ ದಿನವೇ ನನಗೆ ಕೊಲ್ಲೂರು ಮೂಕಾಂಬಿಕಾ ದೇವಿ ದರ್ಶನ ಸಿಕ್ಕಿರುವುದು ಪುಣ್ಯ ಎಂದು ಭಾವಿಸುವೆ. ನಂತರ ನಾಲ್ಕು ದಿನ ಊರಿನಲ್ಲಿದ್ದು ಅಲ್ಲಿ ಹಬ್ಬ ಆಚರಿಸಿದೆ. ಸದ್ಯ ಎರಡು-ಮೂರು ದಿನದಿಂದ ಬೆಂಗಳೂರಿನಲ್ಲಿದ್ದೇನೆ. ಶೂಟಿಂಗ್ ಜತೆ ಜತೆ ಹಬ್ಬ ನಡೆಯುತ್ತಿದೆ’ ಎನ್ನುತ್ತಾರೆ.
