ಮಧ್ಯರಾತ್ರಿ ತಾಯಿ ಜತೆಗೆ ಮಲಗಿದ್ರೂ ಬಿಡಲಿಲ್ಲ! ಆಘಾತಕಾರಿಯಾಗಿದೆ ನಟಿ ಶ್ರೀದೇವಿಕಾ ಆರೋಪ

ಕೇರಳ: ಕಳೆದ ಕೆಲವು ದಿನಗಳಿಂದ ಕೆ. ಹೇಮಾ ಸಮಿತಿ ವರದಿ ಬಿಡುಗಡೆಯಾದ ಬಳಿಕ ಮಲಯಾಳಂ ಚಿತ್ರರಂಗದ ಅನೇಕ ಸ್ಟಾರ್​ ನಟಿಯರು ತಮಗಾದ ಕಾಸ್ಟಿಂಗ್ ಕೌಚ್​ ಅನುಭವಗಳ ಬಗ್ಗೆ ಮುಕ್ತವಾಗಿ ಕ್ಯಾಮರಾ ಮುಂದೆ ಮಾತನಾಡುತ್ತಿದ್ದಾರೆ. ಚಿತ್ರರಂಗದಲ್ಲಿ ಯಾರಿಂದ ತಾವು ಇಂತಹ ಕೆಟ್ಟ ಪರಿಸ್ಥಿತಿ ಎದುರಿಸಿದೆವು ಎಂಬುದನ್ನು ಎಳೆ ಎಳೆಯಾಗಿ ಬಿಚ್ಚಿಡುವ ಮೂಲಕ ಇಂಡಸ್ಟ್ರಿಯ ಕರಾಳ ಮುಖವನ್ನು ಬಟಾಬಯಲು ಮಾಡ್ತಿದ್ದಾರೆ. ಸದ್ಯ ಈ ಸಾಲಿಗೆ ಇದೀಗ ಮಲಯಾಳಂ ನಟಿ ಶ್ರೀದೇವಿಕಾ ಸೇರ್ಪಡೆಗೊಂಡಿದ್ದಾರೆ.

ಇದನ್ನೂ ಓದಿ: ಕೋಪದಿಂದ ಮೊಹಮ್ಮದ್​ ರಿಜ್ವಾನ್​ ಮುಖಕ್ಕೆ ಬಾಲ್​ ಎಸೆದ ಶಕೀಬ್ ಅಲ್​ ಹಸನ್​ಗೆ​​ ಐಸಿಸಿ ಶಾಕ್!​

ಇತ್ತೀಚೆಗಷ್ಟೇ ನಟಿ ಮಿನು ಮುನೀರ್, ಗೀತಾ ವಿಜಯನ್​ ಮಾಡಿದ ಆರೋಪಗಳನ್ನು ಆಲಿಸಿದ ನಟಿ ಶ್ರೀದೇವಿಕಾ, ತಾನು ಅನುಭವಿಸಿದ ಕೆಟ್ಟ ಅನುಭವಗಳನ್ನು ಹಂಚಿಕೊಳ್ಳುವುದಕ್ಕೆ ಇದೇ ಸೂಕ್ತ ಸಮಯವೆಂದು ಭಾವಿಸಿ, ಇದೀಗ ಕ್ಯಾಮರಾ ಮುಂದೆ ಬಹಿರಂಗವಾಗಿ ಇಂಥ ವ್ಯಕ್ತಿಯಿಂದಲೇ ನನಗೆ ತುಂಬ ನೋವು ಪಡುವಂತ ಪರಿಸ್ಥಿತಿ ಎದುರಾಗಿತ್ತು ಎಂದಿದ್ದಾರೆ. ಅಸಲಿಗೆ ಚಿತ್ರ ನಿರ್ದೇಶಕ ತುಳಸಿದಾಸ್​ ಅಂದು ನನ್ನೊಂದಿಗೆ ತೀರ ಅಸಭ್ಯವಾಗಿ ನಡೆದುಕೊಂಡಿದ್ದ ಎಂದು ನಟಿ ಗಂಭೀರ ಆರೋಪ ಎಸಗಿದ್ದಾರೆ.

"2006ರಲ್ಲಿ 'ಅವನ ಚಂಡಿಯುದೆ ಮಗನ್' ಚಿತ್ರದ ಚಿತ್ರೀಕರಣದಲ್ಲಿ ನಾನು ಭಾಗಿಯಾಗಿದ್ದೆ. ಶೂಟಿಂಗ್ ಸಮಯದಲ್ಲಿ ಆತ ನನ್ನೊಂದಿಗೆ ತೀರ ಕೆಟ್ಟದಾಗಿ ನಡೆದುಕೊಳ್ಳುತ್ತಿದ್ದ. ನಾನು ಹಲವು ಬಾರಿ ಎಚ್ಚರಿಸಿದ್ದೆ, ಆದ್ರೂ ಇದು ಅಂತ್ಯ ಕಾಣಲಿಲ್ಲ. ನಾನು ಮಲಗಿದ್ದ ಕೋಣೆಯ ಬಾಗಿಲನ್ನು ಮಧ್ಯರಾತ್ರಿಯಂದು ಜೋರಾಗಿ ಬಡಿಯುತ್ತಿದ್ದ. ತದನಂತರ ನನ್ನ ತಾಯಿ ಕೂಡ ಅದೇ ರೂಮ್​ನಲ್ಲಿ ನನ್ನೊಂದಿಗೆ ನಿದ್ರಿಸಲು ಬಯಸಿದರು. ಇಷ್ಟಾದರೂ ಸಹ ತಡರಾತ್ರಿಯಲ್ಲಿ ಕೋಣೆಯ ಬಾಗಿಲ ಬಡಿಯುವುದನ್ನು ಆತ ಮುಂದುವರೆಸಿದ್ದ. ನಿರಂತರವಾಗಿ ಮುಂದಿನ ನಾಲ್ಕು ದಿನಗಳು ಅದೇ ರೀತಿ ಮಾಡಿದ್ದ" ಎಂದು ನಟಿ ಆರೋಪಿಸಿದ್ದಾರೆ.

ಇದನ್ನೂ ಓದಿ: ‘ಪ್ರೀತಿ ಯಾರನ್ನೂ ಅವಮಾನಿಸುವುದಿಲ್ಲ’ ಪಾಂಡ್ಯನಿಂದ ದೂರವಾಗಿ ಪ್ರೀತಿ ಪಾಠ ಮಾಡಿದ ನತಾಶಾ

"ಮಗಳ ಸುರಕ್ಷತೆಯ ಬಗ್ಗೆ ಚಿಂತಿಸಿದ ನನ್ನ ತಾಯಿ ನಂತರ ಮತ್ತೊಬ್ಬ ನಟನಿಗೆ ಈ ವಿಷಯ ಮುಟ್ಟಿಸಿದರು. ಅವರ ಸಹಾಯದಿಂದ ನಾನು ಮತ್ತು ನನ್ನಮ್ಮ ಬೇರೆ ರೂಮ್​ಗೆ ಸ್ಥಳಾಂತರಗೊಂಡೆವು. 2018ರಲ್ಲಿ ಮಲಯಾಳಂ ಚಲನಚಿತ್ರ ಕಲಾವಿದರ ಸಂಘವು (ಅಮ್ಮ) ನಾನು ಈ ವಿಷಯಕ್ಕೆ ಸಂಬಂಧಿಸಿದಂತೆ ಕೊಟ್ಟ ದೂರನ್ನು ಲೆಕ್ಕಿಸದೆ, ಆತನ ವಿರುದ್ಧ ಕ್ರಮ​ ತೆಗೆದುಕೊಳ್ಳುವಲ್ಲಿ ವಿಫಲವಾಯಿತು" ಎಂದು ಶ್ರೀದೇವಿಕಾ ಆರೋಪಿಸಿದ್ದಾರೆ.

ಏನಿದು ಹೇಮಾ ಸಮಿತಿ ವರದಿ? ಮಲಯಾಳಂ ಚಿತ್ರರಂಗದ ಖ್ಯಾತ ನಟಿಯ ಮೇಲೆ 2017ರಲ್ಲಿ ನಡೆದ ಲೈಂಗಿಕ ದೌರ್ಜನ್ಯ ರಾಷ್ಟ್ರವ್ಯಾಪಿ ಭಾರಿ ಆಕ್ರೋಶಕ್ಕೆ ಕಾರಣವಾಯಿತು. ಇಂದಿಗೂ ಈ ಪ್ರಕರಣದ ವಿಚಾರಣೆ ನಡೆಯುತ್ತಲೇ ಇದೆ. ಈ ಪ್ರಕರಣ ಬೆನ್ನಲ್ಲೇ ನ್ಯಾಯಾಮೂರ್ತಿ ಕೆ. ಹೇಮಾ (ನಿವೃತ್ತ) ಅವರ ನೇತೃತ್ವದಲ್ಲಿ ಮಾಜಿ ಅಧಿಕಾರಿ ಕೆಬಿ ವಲ್ಸಲಕುಮಾರಿ ಮತ್ತು ಹಿರಿಯ ನಟಿ ಶಾರದಾ ಅವರನ್ನೊಳಗೊಂಡ ತ್ರಿಸದಸ್ಯ ಸಮಿತಿಯನ್ನು ಕೇರಳ ಸರ್ಕಾರ ರಚನೆ ಮಾಡಿತ್ತು. ಈ ಸಮಿತಿ 2019ರ ಡಿಸೆಂಬರ್​ನಲ್ಲಿ ಸರ್ಕಾರಕ್ಕೆ ವರದಿ ಸಲ್ಲಿಸಿತ್ತು. ನಾಲ್ಕೂವರೆ ವರ್ಷಗಳ ಬಳಿಕ ವರದಿಯನ್ನು ಸಾರ್ವಜನಿಕವಾಗಿ ಬಹಿರಂಗಗೊಳಿಸಿದ್ದು, ಮಲಯಾಳಂ ಚಿತ್ರರಂಗದ ಕರಾಳ ಮುಖ ಅನಾವರಣವಾಗಿದೆ. ಮಲಯಾಳಂ ಸಿನಿರಂಗದ ಒಂದೊಂದೆ ಕರಾಳ ಮುಖವಾಡ ಕಳಚಿ ಬೀಳುತ್ತಿದೆ. ಸಿನಿಮಾದಲ್ಲಿ ಮಾತ್ರವಲ್ಲದೆ ಎಲ್ಲ ಕ್ಷೇತ್ರಗಳಲ್ಲೂ ಲೈಂಗಿಕ ಶೋಷಣೆ ನಡೆಯುತ್ತಿದೆ. ಆದರೆ, ಸಿನಿಮಾರಂಗದಲ್ಲಿ ವ್ಯಾಪಕವಾಗಿದೆ ಎನ್ನುತ್ತಾರೆ ನೊಂದ ಮಹಿಳೆಯರು. ಸಿನಿಮಾದಲ್ಲಿ ಅವಕಾಶ ಬೇಕಾದರೆ ಕಾಮತೃಷೆ ತೀರಿಸಬೇಕು ಎನ್ನುತ್ತಾರೆ ನೊಂದ ಕಲಾವಿದೆಯರು. (ಏಜೆನ್ಸೀಸ್​).

https://www.vijayavani.net/this-three-indian-cricketers-who-strictly-avoid-alcohol