ಕನ್ನಡದ "ಗಣಪ' ಮೂಲಕ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದವರು ನಟಿ ಪ್ರಿಯಾಂಕಾ ತಿಮ್ಮೇಶ್. ನಂತರ ಕನ್ನಡದ ಜತೆಗೆ ತಮಿಳು, ಮಲಯಾಳಂನಲ್ಲೂ ಮಿಂಚಿ, ಬಿಗ್ಬಾಸ್ ಕನ್ನಡ ರಿಯಾಲಿಟಿ ಶೋನಲ್ಲೂ ಕಾಣಿಸಿಕೊಂಡು ಗಮನ ಸೆಳೆದಿದ್ದಾರೆ. ಆದರೆ, 2022ರ "ಶುಗರ್ಲೆಸ್' ಬಳಿಕ ಅವರು ಕನ್ನಡ ಸಿನಿಮಾಗಳಲ್ಲಿ ಕಾಣಿಸಿಕೊಂಡಿಲ್ಲ. ಹಾಗಂತ ಅವರು ಬ್ರೇಕ್ ತೆಗೆದುಕೊಂಡಿದ್ದಾರೆ ಅಂತಲ್ಲ. ಬದಲಾಗಿ "ರುದ್ರಾಭಿಷೇಕಂ', "ಕೌಂತೇಯ', "ಕುಟೀರ' ಹೀಗೆ ಬ್ಯಾಕ್ ಟು ಬ್ಯಾಕ್ ಚಿತ್ರಗಳಲ್ಲಿ ನಟಿಸುತ್ತಿದ್ದು, ಈ ವರ್ಷ ಎರಡು ಸಿನಿಮಾ ತೆರೆಗೆ ಬರಲಿವೆ. "ಕನ್ನಡದಲ್ಲಿ ಸದ್ಯ ಮೂರು ಚಿತ್ರಗಳಿವೆ. "ರುದ್ರಾಭಿಷೇಕಂ'ನಲ್ಲಿ ಎರಡು ಶೇಡ್ಗಳಲ್ಲಿ ಕಾಣಿಸಿಕೊಳ್ಳಲಿದ್ದೇನೆ. ಒಂದೇ ಚಿತ್ರದಲ್ಲಿ ಎರಡು ಪಾತ್ರಗಳಲ್ಲಿ ನಟಿಸುವ ಅವಕಾಶ ಸಿಗುವುದೇ ಅಪರೂಪ. ನನಗೆ ಈ ಆರ್ ಸಿಕಕ ಖುಷಿಯಿದೆ. ಒಂದರಲ್ಲಿ ಸಿಟಿ ಹುಡುಗಿ ಇನ್ನೊಂದು ಶೇಡ್ನಲ್ಲಿ ಹಳ್ಳಿ ಹುಡುಗಿಯಾಗಿದ್ದೇನೆ. ಕೆಲವೊಮ್ಮೆ ಶೂಟಿಂಗ್ ಸಮಯದಲ್ಲಿ ಒಂದೇ ದಿನ ಎರಡೂ ಲುಕ್ಗಳಲ್ಲಿ ನಟಿಸಬೇಕಿತ್ತು. ಆಗ ಮಾನಸಿಕವಾಗಿ ಬದಲಾಗಬೇಕಿತ್ತು. ಹಾಗೇ ಕೆಲವೊಮ್ಮೆ ಬೆಳಗ್ಗಿನ ಸಮಯದಲ್ಲಿ ಒಂದು ರೀತಿ ಇರುತ್ತಿದ್ದೆ, ರಾತ್ರಿ ಸಮಯದಲ್ಲಿ ಹಾರರ್ ಅಂಶಗಳ ಶೂಟಿಂಗ್ ನಡೆಸುತ್ತಿದ್ದ ಕಾರಣ, ಅಲ್ಲೂ ಮಾನಸಿಕ ಸಿದ್ಧತೆ ಬೇಕಾಗುತ್ತಿತ್ತು. ಸವಾಲಿನ, ಸಮಾಧಾನ ನೀಡಿದ ಪಾತ್ರದಲ್ಲಿ ನಟಿಸಿದ ಖುಷಿಯಿದೆ. ಹಾಗೇ "ಕೌಂತೇಯ'ದಲ್ಲಿ ಪೊಲೀಸ್ ಪಾತ್ರದಲ್ಲಿ ನಟಿಸುತ್ತಿದ್ದೇನೆ. ಜತೆಗೆ ಇನ್ನೊಂದು ಸಿನಿಮಾ ಕೂಡ ಇದೆ' ಎಂದು ಮಾಹಿತಿ ನೀಡುತ್ತಾರೆ.
