ಅಮೆರಿಕದಲ್ಲಿ ಜಗ್ಗೇಶ್ ಅವ​ರನ್ನು ನೆನಪಿಸಿಕೊಂಡ ನಟಿ ಮೇಘನಾ; ಕಾರಣ...

ಬೆಂಗಳೂರು: ಸ್ಯಾಂಡಲ್​ವುಡ್​ ನಟಿ ಮೇಘನಾ ಗಾಂವ್ಕರ್ ಸದ್ಯ ವಿದೇಶ ಪ್ರವಾಸದಲ್ಲಿದ್ದು ಎಂಜಾಯ್ ಮಾಡುತ್ತಿದ್ದಾರೆ. ಈ ಮಧ್ಯೆ ಅವರು ಅಲ್ಲಿ ನವರಸ ನಾಯಕ ಜಗ್ಗೇಶ್​ ಅವರನ್ನೂ ನೆನಪಿಸಿಕೊಂಡಿದ್ದಾರೆ. ಆ ಬಗ್ಗೆ ಅವರೇ ಟ್ವೀಟ್ ಮಾಡಿ ಹೇಳಿಕೊಂಡಿದ್ದಾರೆ ಕೂಡ.

ಅಮೆರಿಕ ಪ್ರವಾಸದಲ್ಲಿರುವ ಮೇಘನಾ, ಭಾನುವಾರ ಅಲ್ಲಿನ ವಾಷಿಂಗ್ಟನ್​ ಡಿಸಿ ಬಳಿಯ ಫ್ರೆಡ್​ರಿಕ್​ ಸಿಟಿಯಲ್ಲಿನ ದೇವಸ್ಥಾನವೊಂದಕ್ಕೆ ತೆರಳಿದ್ದಾರೆ. ಅಲ್ಲಿನ ದೇವರನ್ನು ನೋಡುತ್ತಿದ್ದಂತೆ ಅವರಿಗೆ ನಟ ಜಗ್ಗೇಶ್​ ಅವರ ನೆನಪಾಗಿದೆ. ಅದಕ್ಕೆ ಕಾರಣ, ರಾಯರು.

ಶ್ರೀಗುರು ರಾಘವೇಂದ್ರರ ಪರಮಭಕ್ತರಾಗಿರುವ ನಟ ಜಗ್ಗೇಶ್​ ಆಗಾಗ್ಯೆ ಮಂತ್ರಾಲಯಕ್ಕೆ ಹೋಗಿ ಬರುತ್ತಿರುತ್ತಾರೆ. ಮಾತ್ರವಲ್ಲ, ಆಗಾಗ ರಾಯರನ್ನು ಸ್ಮರಿಸಿಕೊಂಡು ತಮ್ಮ ಭಕ್ತಿ-ಭಾವದ ಅನುಭವಗಳನ್ನು ಹೇಳಿಕೊಳ್ಳುತ್ತಿರುತ್ತಾರೆ. ಅಲ್ಲದೆ ಸುಮಾರು ಒಂದು ವರ್ಷದ ಹಿಂದೆ ಬಿಡುಗಡೆಯಾದ ಕವಿರಾಜ್ ನಿರ್ದೇಶನ 'ಕಾಳಿದಾಸ ಕನ್ನಡ ಮೇಷ್ಟ್ರು' ಸಿನಿಮಾದಲ್ಲಿ ಮೇಘನಾ-ಜಗ್ಗೇಶ್​ ಜತೆಯಾಗಿ ಅಭಿನಯಿಸಿದ್ದರು. ಹೀಗಾಗಿ ಅಮೆರಿಕದಲ್ಲಿ ರಾಯರನ್ನು ನೋಡಿದಾಕ್ಷಣ ಮೇಘನಾ ಅವರಿಗೆ ಜಗ್ಗೇಶ್​ ಅವರ ನೆನಪಾಗಿದೆ.