"ಮಾದೇವ' ಚಿತ್ರದ ಯಶಸ್ಸಿನ ಬಳಿಕ ವಿನೋದ್ ಪ್ರಭಾಕರ್ ನಟಿಸಿರುವ "ಬಲರಾಮನ ದಿನಗಳು' ಇಂದು ರಿಲೀಸ್ ಆಗಿದೆ. "ಆ ದಿನಗಳು' ನಂತರ ಕೆ.ಎಂ. ಚೈತನ್ಯ ನಿರ್ದೇಶನದ ಬೆಂಗಳೂರು ಭೂಗತ ಲೋಕದ ಕುರಿತ ಕಥೆಯಾದ ಕಾರಣ ಈ ಚಿತ್ರದ ಬಗ್ಗೆ ಮೊದಲಿನಿಂದಲೂ ನಿರೀಕ್ಷೆ ಇತ್ತು. ಹಾಡು, ಟೀಸರ್, ಟ್ರೇಲರ್ಗಳು ಆ ನಿರೀಕ್ಷೆಯನ್ನು ಹೆಚ್ಚಿಸಿದ್ದವು. ವಿನೋದ್ಗೆ ಇಲ್ಲಿ ಪ್ರಿಯಾ ಆನಂದ್ ನಾಯಕಿಯಾಗಿದ್ದು ಆಶಿಶ್ ವಿದ್ಯಾರ್ಥಿ, ಅತುಲ್ ಕುಲಕರ್ಣಿ, ರಮೇಶ್ ಇಂದಿರ, ವಿನಯ್ ಗೌಡ, ಪ್ರತಾಪ್ ನಾರಾಯಣ್ ಪ್ರಮುಖ ತಾರಾಗಣದಲ್ಲಿದ್ದಾರೆ. ಚಿತ್ರದ ಬಗ್ಗೆ ವಿನೋದ್, "ಹಾಸನ ಮೂಲದ ನಿರ್ಮಾಪಕ ಶ್ರೇಯಸ್ ನನ್ನ ಅಭಿಮಾನಿ. "ಆ ದಿನಗಳು' ಚಿತ್ರವನ್ನು ಟಿವಿಯಲ್ಲಿ ನೋಡಿ ಅದರ ಫ್ಯಾನ್ ಆಗಿದ್ದರು. ಬಲರಾಮ ಕೂಡ ಹಾಸನ್ನವರೇ ಆದ ಕಾರಣ ಅವರ ಕುರಿತ ಕಥೆಯನ್ನು ಕೆ.ಎಂ.ಚೈತನ್ಯ ಮತ್ತು ನನ್ನ ಕಾಂಬಿನೇಷನ್ನಲ್ಲಿ ಮಾಡುವ ಬಗ್ಗೆ ನನ್ನ ಬಳಿ ಹೇಳಿಕೊಂಡರು. ನಾನು ಚೈತನ್ಯರನ್ನು ಸಂಪರ್ಕಿಸಲು ತಿಳಿಸಿದೆ. ಅವರು, ಬಯೋಪಿಕ್ ಬೇಡ ಅಂದರು. ಒಬ್ಬೊಬ್ಬರ ದೃಷ್ಟಿಯಲ್ಲಿ ಬಲರಾಮ ಒಂದೊಂದು ರೀತಿ ಇದ್ದ. ಆ ಎಲ್ಲ ಮಾಹಿತಿಗಳನ್ನೂ ಕಲೆ ಹಾಕಿ, ಅದಕ್ಕೊಂದು ಲವ್ಸ್ಟೋರಿ ಸೇರಿಸಿ, ನೈಜ ಪಾತ್ರಗಳ ಸುತ್ತ ಕಾಲ್ಪನಿಕ ಕಥೆ ಮಾಡಿದರು' ಎಂದು ಸಿನಿಮಾ ಪ್ರಾರಂಭವಾದ ಬಗ್ಗೆ ಮಾಹಿತಿ ನೀಡುತ್ತಾರೆ.
