ಗೋಲ್ಡನ್ ಪಿನಾಕ: ಗಣೇಶ್ ಅಭಿನಯದ ಚಿತ್ರದ ಅದ್ದೂರಿ ಟೀಸರ್ ರಿಲೀಸ್, ಎರಡು ಶೇಡ್‌ನಲ್ಲಿ ನಟ

ಬರ್ತ್‌ಡೇ ಸಂಭ್ರಮದಲ್ಲಿ ‘ಪಿನಾಕ’ ಚಿತ್ರದ ಟೀಸರ್ ರಿಲೀಸ್ ಆದ ಖುಷಿಯಲ್ಲಿ ನಟ ಗಣೇಶ್, ‘ದೇವರ ಆಶೀರ್ವಾದದಿಂದ ಇಂತಹ ಸಿನಿಮಾ ಮಾಡಲು ಸಾಧ್ಯವಾಯಿತು. ಮಕ್ಕಳು ‘ಕಾರ್ತಿಕೇಯ 2’ ನೋಡಿ ಚೆನ್ನಾಗಿದೆ ಅಂದರು. ಆಗ ನಾನು ಆ ಸಿನಿಮಾ ನೋಡಿ, ಈ ರೀತಿಯ ಪ್ರಯತ್ನ ನಾವು ಕೂಡ ಮಾಡಬಹುದಲ್ವಾ ಅನಿಸಿತು. ಅದರ ಪ್ರಯತ್ನವೇ ‘ಪಿನಾಕ’. ಇದು ದೊಡ್ಡ ಬಜೆಟ್‌ನ ಸಿನಿಮಾ. ಪ್ರತಿ ಶೆಡ್ಯೂಲ್ ಮುಗಿದ ಮುಂದಿನ ಹಂತದ ಚಿತ್ರೀಕರಣ ಆರಂಭವಾಗುತ್ತಿದೆಂದರೆ ಭಯ ಜತೆಗೆ ಹೊಸದೇನೂ ಮಾಡುತ್ತಾರೆ ಎಂಬ ಕುತೂಹಲ ಇರುತ್ತಿತ್ತು. 12 ನಿಮಿಷದ ಕ್ಲೈಮ್ಯಾಕ್ಸ್‌ಗಾಗಿ 22 ದಿನಗಳ ಕಾಲ ಶೂಟಿಂಗ್ ಮಾಡಿದ್ದೇವೆ. ಈವರೆಗೂ ನಾನು ಯಾವ ಸಿನಿಮಾದಲ್ಲೂ ಆ ರೀತಿಯ ಕ್ಲೈಮ್ಯಾಕ್ಸ್ ನೋಡಿಲ್ಲ. ಪ್ರೇಕ್ಷಕರಿಗೆ ಅಷ್ಟು ದೈವಿಕ ಅನುಭೂತಿ ನೀಡಲಿದೆ. ‘ಚಾರುಕೇಶ ಪಿನಾಕ’ ರಾಜನ ಕಥೆಯನ್ನು ಫ್ಲಾಷ್‌ಬ್ಯಾಕ್ ಜತೆಗೆ ವಿಎಫ್ಎಕ್ಸ್ ಬಳಕೆ ಮಾಡಿಕೊಂಡು ಚೆನ್ನಾಗಿ ತೆರೆ ಮೇಲೆ ತರಲಾಗಿದೆ’ ಎಂದು ಮಾಹಿತಿ ಹಂಚಿಕೊಂಡರು.

ಈ ಬಾರಿಯ ಅಕ್ಟೋಬರ್ ನಟ ಗಣೇಶ್‌ಗೆ ಹಬ್ಬವಾಗಿರಲಿದೆ. ಈ ತಿಂಗಳ ಹದಿನೈದು ದಿನಗಳ ಅಂತರದಲ್ಲಿ ನಟನ ಎರಡು ಸಿನಿಮಾಗಳು ರಿಲೀಸ್ ಆಗುತ್ತಿವೆ. ಅ. 2ರ ಗಾಂಧಿ ಜಯಂತಿಯಂದು ‘ಪಿನಾಕ’ ತೆರೆಗೆ ಬಂದರೆ, ಅದೇ ತಿಂಗಳ 16ರಂದು ಶ್ರೀನಿವಾಸರಾಜು ನಿರ್ದೇಶನದ ನಟನ ‘ಬೃಂದಾವಿಹಾರಿ’ ತೆರೆಗೆ ಬರಲಿದೆ. ಈ ಮೂಲಕ ನಟನಿಗೆ ಅಕ್ಟೋಬರ್ ಡಬಲ್ ಧಮಾಕಾ.