ಬೆಂಗಳೂರು: ನಟ ರವಿಚಂದ್ರನ್ಗೆ ಜೋಡಿಯಾಗಿ ‘ಅಪೂರ್ವ’ ಚಿತ್ರದ ಮೂಲಕ ಚಂದನವನಕ್ಕೆ ಆಗಮಿಸಿದ ನಟಿ ಅಪೂರ್ವ ಬಳಿಕ ಹಿಟ್ ಸಿನಿಮಾಗಳಲ್ಲಿ ನಟಿಸಿದರು.‘ವಿಕ್ಟರಿ-2’, ‘ಕೃಷ್ಣ ಟಾಕೀಸ್’, ‘ಪೆಂಟಗಾನ್’ ಸೇರಿ ಇತ್ತೀಚೆಗೆ ತೆರೆಕಂಡ ಕಿರಣ್ರಾಜ್ ನಟನೆಯ ‘ರಾನಿ’ ಚಿತ್ರದಲ್ಲಿ ಸೂಪರ್ ಕಾಪ್ ಆಗಿ ಕಾಣಿಸಿಕೊಂಡಿದ್ದರು. ಸದ್ಯ, ಅವರ ಕೈಯಲ್ಲಿ ನಾಲ್ಕು ಚಿತ್ರಗಳಿವೆ. ಶೂಟಿಂಗ್ ಬಿಜಿ ನಡುವೆಯೂ ಅಪೂರ್ವ ದಸರಾ ಹಬ್ಬವನ್ನು ಅದ್ದೂರಿಯಾಗಿ ಆಚರಿಸುತ್ತಿದ್ದಾರೆ. ಈ ಬಾರಿ ಕಠಿಣ ವ್ರತ ಕೈಗೊಂಡಿರುವ ನಟಿ, ಈ ವರ್ಷವೂ ಶುಭದಾಯಕವಾಗಲಿ ಎಂದು ಪ್ರಾರ್ಥಿಸುತ್ತಿದ್ದಾರೆ. ಈ ಬಗ್ಗೆ, ‘ಕಳೆದ ಮೂರು-ನಾಲ್ಕು ವರ್ಷಗಳಿಂದ ಕಠಿಣ ವ್ರತದೊಂದಿಗೆ ನವರಾತ್ರಿ ಆಚರಿಸುತ್ತಿದ್ದೇನೆ. ಹಬ್ಬದ ಒಂಬತ್ತು ದಿನವೂ ದೇವರ ಮನೆಯಲ್ಲಿ ಕಳಸ ಸ್ಥಾಪನೆ ಮಾಡಿ, ದೇವರಿಗೆ ಅಖಂಡ ದೀಪ ಬೆಳಗುತ್ತೇವೆ. ಈ ದೀಪ ಬೆಳಗ್ಗೆಯಿಂದ ಸಂಜೆವರೆಗೆ ಆರದಂತೆ ಕಾಯಬೇಕು. ಹಾಗೆಯೇ ಉಪವಾಸ ಮಾಡುತ್ತೇವೆ.ಈ ಅವಧಿಯಲ್ಲಿ ನೀರು ಮಾತ್ರವಷ್ಟೇ ಸೇವಿಸುವುದು. ಈ ನಡುವೆ ಶೂಟಿಂಗ್ ಕೆಲಸಗಳಲ್ಲಿ ಭಾಗವಹಿಸುತ್ತೇನೆ. ಯಾವುದೇ ಕಷ್ಟ ಎನಿಸುತ್ತಿಲ್ಲ ದೇಹ ಚೈತನ್ಯಮಯವಾಗಿರುತ್ತದೆ. ಶೂಟಿಂಗ್ನಿಂದ ಬಂದ ಬಳಿಕ ಸಂಜೆ ನಾಗರಬಾವಿಯ ದುರ್ಗಾಪರಮೇಶ್ವರಿ ದೇವಸ್ಥಾನಕ್ಕೆ ತೆರಳಿ ಪೂಜೆ ಸಲ್ಲಿಸುವೆ. ವ್ರತವೂ ಸ್ವಲ್ಪ ಕಠಿಣ ಎನಿಸಬಹುದು ಆದರೆ, ದೇಹ ಮತ್ತು ಮನಸ್ಸು ಪರಿಶುದ್ಧವಾಗಿರಲು ಸಹಾಯವಾಗುತ್ತದೆ’ ಎನ್ನುತ್ತಾರೆ.
