ಜಮ್ಮು-ಕಾಶ್ಮೀರದ ಪುಲ್ವಾಮಾ ಜಿಲ್ಲೆಯಲ್ಲಿ ಉಗ್ರರು ಅಡಗಿದ್ದಾರೆ ಎಂಬ ಖಚಿತ ಮಾಹಿತಿ ಮೇರೆಗೆ ಸೇನಾ ಸಿಬ್ಬಂದಿ ಕಾರ್ಯಾಚರಣೆ ಕೈಗೊಂಡಾಗ ಅದರ ಮುಂದಾಳತ್ವವನ್ನು 37ರ ಹರೆಯದ ಹವಾಲ್ದಾರ್ ಕಾಶೀರಾಯ ಬಮ್ಮನಹಳ್ಳಿ ವಹಿಸಿದ್ದರು. ಯೋಧರ ದಾಳಿಯಿಂದಾಗಿ ಉಗ್ರರು ತಾವು ಅಡಗಿರುವಲ್ಲೇ ಉಳಿಯುವಂತಾಗಿತ್ತು. ಉಗ್ರರು ಪ್ರತಿಯಾಗಿ ದಾಳಿ ನಡೆಸಿದಾಗ ಕಾಶೀರಾಯ ಗಾಯಗೊಂಡಿದ್ದರು. ದಾಳಿಯಿಂದ ಹಿಂದಕ್ಕೆ ಸರಿಯದೆ ಕಾಶಿರಾಯ ಅವರು ಉಗ್ರನೊಬ್ಬನ ಎದೆಗೆ ಗುಂಡಿಕ್ಕಿದ್ದರು. ಕಾಶೀರಾಯ ಅವರ ಗುಂಡಿನ ಎದುರೇಟಿಗೆ ಎದುರು ಪಡೆ ನಡುಗಿತ್ತು. ತನ್ನ ಪ್ರಾಣವನ್ನು ಒತ್ತೆಯಿಟ್ಟು ಯೋಧರ ಪಡೆ ರಕ್ಷಿಸಿದ ಹಿನ್ನೆಲೆಯಲ್ಲಿ ಕಾಶಿರಾಯ ಅವರ ಹೆಸರನ್ನು ಮರಣೋತ್ತರ ಶೌರ್ಯ ಪುರಸ್ಕಾರಕ್ಕೆ ಶಿಫಾರಸು ಮಾಡಲಾಗಿತ್ತು. ಕಾಶೀರಾಯ ಅವರ ವೀರಗಾಥೆ ಯುವ ಸಮುದಾಯಕ್ಕೆ ಸ್ಫೂರ್ತಿದಾಯಕ ಎಂದು ಜಿಲ್ಲಾಧಿಕಾರಿ ಡಾ.ವಿಜಯಮಹಾಂತೇಶ ದಾನಮ್ಮನವರ ತಿಳಿಸಿದ್ದಾರೆ.
