ಬಿಹಾರದಲ್ಲಿ ಸಿಂಹಪಾಲು ಬೇಕೆಂದ ಚುನಾವಣಾ ಚಾಣಕ್ಯ ಪ್ರಶಾಂತ್​ ಕಿಶೋರ್​ಗೆ ಬಿಜೆಪಿ ತಿರುಗೇಟು!

ಪಟನಾ: ಮುಂಬರುವ ಬಿಹಾರ ವಿಧಾನಸಭಾ ಚುನಾವಣೆಯಲ್ಲಿ ಸಿಂಹಪಾಲು ಸ್ಥಾನಗಳು ಬೇಕೆಂದು ಪಟ್ಟು ಹಿಡಿದಿರುವ ಬಿಹಾರದ ಜನತಾದಳ ಸಂಯುಕ್ತ ಮೈತ್ರಿ ಪಕ್ಷದ ಉಪಾಧ್ಯಕ್ಷ ಮತ್ತು ಚುನಾವಣಾ ಚಾಣಕ್ಯ ಎಂದೇ ಹೆಸರಾಗಿರುವ ಪ್ರಶಾಂತ್​ ಕಿಶೋರ್​ ವಿರುದ್ಧ ಬಿಜೆಪಿ ಹರಿಹಾಯ್ದಿದೆ.

ಚುನಾವಣಾ ದತ್ತಾಂಶ ಸಂಗ್ರಹಿಸಿಕೊಂಡು ಚೌಕಟ್ಟು ರೂಪಿಸುವಂತಹ ಕಂಪನಿಯನ್ನು ನಡೆಸುವುದರೊಂದಿಗೆ ರಾಜಕೀಯಕ್ಕೆ ಪ್ರವೇಶ ಪಡೆದವರು ತಮ್ಮ ಟೀಕೆಗಳ ಮೂಲಕ ರಾಷ್ಟ್ರೀಯ ಪ್ರಜಾಸತ್ತಾತ್ಮಕ ಒಕ್ಕೂಟ(ಎನ್​ಡಿಎ)ಕ್ಕೆ ನೋವುಂಟು ಮಾಡುತ್ತಿದ್ದಾರೆ. ವೈಯಕ್ತಿಕ ಲಾಭಕ್ಕಾಗಿ ಬಿಸಿನೆಸ್​ ನಡೆಸುವವರು ಮೊದಲು ತಮ್ಮ ಮಾರುಕಟ್ಟೆಯನ್ನು ನಿರ್ಮಿಸಿಕೊಳ್ಳಲು ಪ್ರಯತ್ನ ಪಡುತ್ತಾರೆ. ಬಳಿಕ ದೇಶದ ಕಲ್ಯಾಣದ ಬಗ್ಗೆ ಚಿಂತಿಸುತ್ತಾರೆ ಎಂದು ಪ್ರಶಾಂತ್​ ಕಿಶೋರ್​ ಹೆಸರು ಹೇಳದೆ ಬಿಜೆಪಿ ನಾಯಕ ಸುಶೀಲ್​ ಮೋದಿ ಟ್ವೀಟ್​ ಮೂಲಕ ತಿರುಗೇಟು ನೀಡಿದ್ದಾರೆ.

ಬಿಹಾರದಲ್ಲಿ ನಡೆದ ವಿಧಾನಸಭಾ ಚುನಾವಣಾ ವೇಳೆ ಬಿಜೆಪಿ ಮತ್ತು ಜೆಡಿಯು ಸಮಾನವಾದ ಸ್ಥಾನಗಳಲ್ಲಿ ಸ್ಪರ್ಧಿಸಿದ್ದವು. ಇದನ್ನೇ ಮುಂದುವರಿಸಲು ಬಿಜೆಪಿ ಅಪೇಕ್ಷಿಸಿತ್ತು ಎನ್ನಲಾಗಿದೆ. ಆದಾಗ್ಯೂ ಪ್ರಶಾಂತ್​ ಕಿಶೋರ್, ಹಿಂದಿನ ಚುನಾವಣೆಯ ಪಾಲುದಾರಿಕೆಯ ಆಧಾರಕ್ಕಿಂತ ಜೆಡಿಯು ಹೆಚ್ಚಿನ ಅಭ್ಯರ್ಥಿಗಳನ್ನು ಪಡೆಯಬೇಕೆಂದು ಹೇಳಿಕೆ ನೀಡಿದ್ದರು.​

ಪ್ರಧಾನಿ ನರೇಂದ್ರ ಮೋದಿ ಮತ್ತು ಸಿಎಂ ನಿತೀಶ್​ ಕುಮಾರ್​ ನೇತೃತ್ವದಲ್ಲಿ ಮುಂದಿನ ಚುನಾವಣೆ ನಡೆಯುವುದಾಗಿ ಈಗಾಗಲೇ ನಿರ್ಧಾರವಾಗಿದೆ. ಸಮಯ ಬಂದಾಗ ಸ್ಥಾನ ಹಂಚಿಕೆಯ ಬಗ್ಗೆ ನಾಯಕರು ನಿರ್ಧಾರ ತೆಗೆದುಕೊಳ್ಳುತ್ತಾರೆ. ಸದ್ಯ ಯಾವುದೇ ತೊಂದರೆ ಇಲ್ಲವೆಂದು ಟ್ವೀಟ್​ ಮೂಲಕ ಪ್ರಶಾಂತ್​ಗೆ ಟಾಂಗ್​ ನೀಡಿದ್ದಾರೆ. (ಏಜೆನ್ಸೀಸ್​)