ಸದಾಶಿವ ನಗರದ ತಮ್ಮ ನಿವಾಸದ ಬಳಿ ಸುದ್ದಿಗಾರರೊಂದಿಗೆ ಶುಕ್ರವಾರ ಮಾತನಾಡಿದ ಸುಧಾಕರ್, ಮೊದಲ ಮತ್ತು ಎರಡನೇ ಅಲೆಯಲ್ಲಿ ಸೋಂಕಿತರು ಆಸ್ಪತ್ರೆಗೆ ದಾಖಲಾಗುವ ಪ್ರಮಾಣ ಹೆಚ್ಚಿತ್ತು. ತೀವ್ರ ಉಸಿರಾಟದ ತೊಂದರೆ, ಎರಡರಿಂದ ನಾಲ್ಕು ವಾರಗಳ ತನಕ ಚಿಕಿತ್ಸೆ ಪಡೆದ ನಿದರ್ಶನಗಳಿವೆ. ಈ ಬಾರಿ ಆಸ್ಪತ್ರೆಗಿಂತ ಮನೆಯಲ್ಲೇ ಚಿಕಿತ್ಸೆ ಪಡೆಯುವವರ ಸಂಖ್ಯೆ ಜಾಸ್ತಿಯಿದೆ. ಹೆಚ್ಚೆಂದರೆ ಐದು ದಿನಗಳಲ್ಲಿ ಚೇತರಿಸಿಕೊಳ್ಳುತ್ತಿದ್ದಾರೆ. ಐಸಿಯು, ವೆಂಟಿಲೇಟರ್, ಆಮ್ಲಜನಕ ಸಹಿತ ಹಾಸಿಗೆಗಳನ್ನು ಬಳಸುತ್ತಿಲ್ಲ. ವೈರಾಣು ಮೂಗಿನ ಮೂಲಕ ಗಂಟಲುವರೆಗೆ ತಲುಪುತ್ತದೆ. ಕೆಲವು ಪ್ರಕರಣಗಳಲ್ಲಿ ಶ್ವಾಸಕೋಶದ ಮೇಲ್ಭಾಗಕ್ಕೆ ತಲುಪಿದ್ದು, ಹಿಂದಿನಂತೆ ಶ್ವಾಸಕೋಶದ ಒಳಗೆ ಪ್ರವೇಶಿಸುತ್ತಿಲ್ಲವಾದ ಕಾರಣ ತೀವ್ರತೆ ಕಡಿಮೆಯಿದೆ ಎಂದು ವಿವರಿಸಿದರು.
