ಗಾಂಜಾ ಮಾರುತ್ತಿದ್ದ 8 ಆರೋಪಿಗಳ ಬಂಧನ

ಕೋಲಾರ: ಅಕ್ರಮವಾಗಿ ಗಾಂಜಾ ಸಾಗಾಟ ಮತ್ತು ಮಾರಾಟ ಮಾಡುತ್ತಿದ್ದ 8 ಮಂದಿಯನ್ನು ಬಂಧಿಸಿ, 20,580 ಕೆಜಿ ಗಾಂಜಾವನ್ನು ನಗರದ ಗಲ್​ಪೇಟೆ ಠಾಣೆ ಪೊಲೀಸರು ವಶಪಡಿಸಿಕೊಂಡಿದ್ದಾರೆ.

ಟಮಕ ಕೈಗಾರಿಕಾ ಪ್ರದೇಶದಲ್ಲಿ ಅಕ್ರಮವಾಗಿ ಗಾಂಜಾ ಮಾರಾಟ ಮಾಡಲು ಗಾಂಜಾ ಸಾಗಿಸುತ್ತಿದ್ದ ಬಗ್ಗೆ ಬಂದ ಖಚಿತ ಮಾಹಿತಿ ಮೇರೆಗೆ ಗಲ್​ಪೇಟೆ ವೃತ್ತ ನಿರೀಕ್ಷಕ ಲೋಕೇಶ್​ ನೇತೃತ್ವದಲ್ಲಿ ಕಾರ್ಯಾಚರಣೆ ನಡೆಸಿ, ಕಾರು ತಪಾಸಣೆ ನಡೆಸಿದಾಗ ಗಾಂಜಾ ಪತ್ತೆಯಾಗಿದೆ.

ಹರಿಯಾಣದ ಮೊಹಮ್ಮದ್​ ಆಜಾದ್​ (45), ವಾರಿಸ್​ ಬಿನ್​ (30), ರಾಜು (32) ಮುಬಾರಕ್​ (32), ಹಸೀನ್​ (20), ಜಾವಿದ್​ (26), ರಾಹಿಲ್​ (28) ರಾಜಸ್ಥಾನದ ಮೊಹಮ್ಮದ್​ ಅಪ್ಸರ್​ (30) ಅವರನ್ನು ಬಂಧಿಸಿ ನ್ಯಾಯಾಲಯ ಬಂಧನಕ್ಕೆ ಒಪ್ಪಿಸಲಾಗಿದೆ. ಇನ್ನು ಪ್ರಮುಖ ಆರೋಪಿಗಳಾದ ಕೋಲಾರ ನಗರದ ಬ್ಯಾಮತ್​ ಬಿ ದರ್ಗಾ ನಿವಾಸಿ ನಿಜಾಮುದ್ಧೀನ್​ ಮತ್ತು ಮುಬಾರಕ್​ ತಲೆಮರಿಸಿಕೊಂಡಿದ್ದು, ತನಿಖೆ ಕೈಗೊಂಡಿದ್ದಾರೆ.

ವಾಹನದಲ್ಲಿ ಹೊರರಾಜ್ಯಗಳ ನೋಂದಣೆ ಸಂಖ್ಯೆ ನಂಬರ್​ ಪ್ಲೇಟ್​ ಆಧಾರದ ಮೇರೆಗೆ ಆರೋಪಿಗಳನ್ನು ವಿಚಾರಣೆಗೆ ಒಳಪಡಿಸಿದಾಗ ಹೊರರಾಜ್ಯಗಳಲ್ಲಿ ಹಸುಗಳ ಕಳವು ಮಾಡುವುದು ಹಾಗೂ ಗಾಂಜಾ ಸಾಗಾಟ, ಮಾರಾಟ ಸಮಯದಲ್ಲಿ ನಂಬರ್​ ಪ್ಲೇಟ್​ ಬದಲಾಯಿಸಿ ಕೃತ್ಯ ಎಸಗುವುದಾಗಿ ಒಪ್ಪಿಕೊಂಡಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಡಿವೈಎಸ್​ಪಿ ಎಚ್​.ಎಂ.ನಾಗ್ತೆ, ಸಿಪಿಐ ಎಂ.ಜೆ.ಲೋಕೇಶ್​, ಪಿಎಸ್​ಐ ವಿಠ್ಠಲ್​ ವೈ.ತಳವಾರ್​ ಸೇರಿ ಸಿಬ್ಬಂದಿ ಕಾರ್ಯಾಚರಣೆಯನ್ನು ಜಿಲ್ಲಾ ಪೊಲೀಸ್​ ವರಿಷ್ಠಾಧಿಕಾರಿ ಬಿ.ನಿಖಿಲ್​ ಶ್ಲಾಘಿಸಿದ್ದಾರೆ.