Gujarat Liquor Ban: ಗುಜರಾತ್‌ನಲ್ಲಿ ಮದ್ಯ ನಿಷೇಧವಿದ್ದರೂ ಕಳ್ಳಸಾಗಣೆದಾರರು ಮಾಡುವ ಅತಿ ಬುದ್ಧಿವಂತಿಕೆಯ ಕೆಲಸಗಳು ಕೆಲವೊಮ್ಮೆ ಪೊಲೀಸರಷ್ಟೇ ಅಲ್ಲ, ಜನರನ್ನು ಬೆರಗುಗೊಳಿಸುತ್ತವೆ. ಅಂತಹುದೇ ಒಂದು ಘಟನೆ ಇಲ್ಲಿ ನಡೆದಿದೆ. ಈ ವಂಚಕರು ಪೊಲೀಸರ ಕಣ್ಣಿಗೆ ಮಣ್ಣೆ ಎರಚಲು ಮಾಡಿದ ಕಿತಾಪತಿ ನೋಡಿದರೆ ನೀವು ಕೂಡ ಹುಬ್ಬೇರಿಸುತ್ತೀರಿ.
ಗುಜರಾತ್‌ನ ವಡೋದರಾ ಗ್ರಾಮಾಂತರ ವ್ಯಾಪ್ತಿಯ ವಾಘೋಡಿಯಾ ತಾಲೂಕಿನ ಗೋರಜ್ ನರ್ಮದಾ ಕಾಲುವೆ ಬಳಿ ಈ ರೋಚಕ ಕಾರ್ಯಾಚರಣೆ ನಡೆದಿದೆ. ರಾಜ್ಯದಲ್ಲಿ ಮದ್ಯ ಮಾರಾಟವನ್ನು ಸಂಪೂರ್ಣವಾಗಿ ನಿಷೇಧಿಸಿರುವುದರಿಂದ, ಅಕ್ರಮ ಮದ್ಯದ ಸಾಗಣೆದಾರನೊಬ್ಬ ಬೋದೇಲಿಯಿಂದ ವಡೋದರಾ ಕಡೆಗೆ ಜುಪಿಟರ್ ಸ್ಕೂಟರ್‌ನಲ್ಲಿ ಕದ್ದುಮುಚ್ಚಿ ವಿದೇಶಿ ಮದ್ಯ ಕೊಂಡೊಯ್ಯುತ್ತಿದ್ದ. ಈ ಬಗ್ಗೆ ಖಚಿತ ಮಾಹಿತಿ ಪಡೆದ ಪೊಲೀಸರು ಸೇತುವೆ ಬಳಿ ಆತನ ಸ್ಕೂಟರ್ ತಡೆದು ತಪಾಸಣೆ ನಡೆಸಿದಾಗ ಪೊಲೀಸರಿಗೇ ದೊಡ್ಡ ಆಘಾತ ಕಾದಿತ್ತು
ದೇಹಕ್ಕೆ ಮದ್ಯದ ಬಾಟಲಿಗಳನ್ನೇ ಬಿಗಿದುಕೊಂಡಿದ್ದ ಖದೀಮರು
ಪೊಲೀಸರ ತಪಾಸಣೆಯಿಂದ ಹೇಗಾದರೂ ಮಾಡಿ ತಪ್ಪಿಸಿಕೊಳ್ಳಬೇಕೆಂದು ಆತ ವಿಚಿತ್ರ ಉಪಾಯ ಹೂಡಿದ್ದ. ತನ್ನ ಬಟ್ಟೆಯ ಒಳಭಾಗದಲ್ಲಿ, ಇಡೀ ದೇಹದ ಸುತ್ತಲೂ ಪ್ಲಾಸ್ಟಿಕ್ ಹಾಗೂ ಟೇಪ್ ಬಳಸಿ ಸಣ್ಣ ಸಣ್ಣ ವಿದೇಶಿ ಮದ್ಯದ ಬಾಟಲಿಗಳನ್ನು ಬಿಗಿಯಾಗಿ ಕಟ್ಟಿಕೊಂಡಿದ್ದರು. ಮೇಲ್ನೋಟಕ್ಕೆ ಆತ ಅತ್ಯಂತ ಸಾಮಾನ್ಯ ವ್ಯಕ್ತಿಯಂತೆ ಕಾಣಿಸುತ್ತಿದ್ದರೂ, ಪೊಲೀಸರು ಹತ್ತಿರ ಕರೆದು ಕೂಲಂಕುಷವಾಗಿ ತಪಾಸಣೆ ನಡೆಸಿದಾಗ ಆತನ ಈ ಕಳ್ಳಾಟ ಬಯಲಾಗಿದೆ.
