ಉತ್ತರಾಖಂಡದ 51 ದೇವಾಲಯ ಸರ್ಕಾರದಿಂದ ಮುಕ್ತ; ನಿರ್ಧಾರ ಪ್ರಕಟಿಸಿದ ಸಿಎಂ ತೀರಥ್ ರಾವತ್

ಡೆಹ್ರಾಡೂನ್: ಬದರಿನಾಥ, ಕೇದಾರನಾಥ, ಗಂಗೋತ್ರಿ, ಯಮುನೋತ್ರಿ ಸೇರಿ 51 ಪ್ರಮುಖ ದೇವಾಲಯಗಳನ್ನು ಉತ್ತರಾಖಂಡ ಸರ್ಕಾರ ತನ್ನ ಸುಪರ್ದಿನಿಂದ ಮುಕ್ತಗೊಳಿಸಿದೆ. ಚಾರ್​ಧಾಮ್ ದೇವಸ್ಥಾನಂ ಮಂಡಳಿ ರಚನೆ ಬಗ್ಗೆಯೂ ಮರುಪರಿಶೀಲನೆ ನಡೆಯಲಿದೆ ಎಂದು ಮುಖ್ಯಮಂತ್ರಿ ತೀರಥ್ ಸಿಂಗ್ ರಾವತ್ ಹೇಳಿದ್ದಾರೆ.

ವಿಶ್ವ ಹಿಂದು ಪರಿಷ್ (ವಿಎಚ್​ಪಿ) ಕೇಂದ್ರೀಯ ಮಾರ್ಗದರ್ಶಕ ಮಂಡಲದ ಜತೆ ಹರಿದ್ವಾರದಲ್ಲಿ ಶುಕ್ರವಾರ ಸಭೆ ನಡೆಸಿದ ನಂತರ ತೀರಥ್ ಸಿಂಗ್ ರಾವತ್ 51 ದೇವಾಲಯಗಳನ್ನು ಸರ್ಕಾರದ ಸುಪರ್ದಿನಿಂದ ಕೈಬಿಡುವ ನಿರ್ಧಾರವನ್ನು ಪ್ರಕಟಿಸಿದ್ದಾರೆ.

ಚಾರ್​ಧಾಮ್ ದೇವಸ್ಥಾನ ನಿರ್ವಹಣಾ ಮಸೂದೆಯನ್ನು ಉತ್ತರಾಖಂಡ ವಿಧಾನಸಭೆ ಕಳೆದ ಚಳಿಗಾಲದ ಅಧಿವೇಶನದಲ್ಲಿ ಅಂಗೀಕರಿಸಿತ್ತು. ಇದರ ಅನ್ವಯ ಚಾರ್​ಧಾಮ್ ಮಂಡಳಿ ರಚನೆ ಆಗಲಿದ್ದು, ಧಾರ್ವಿುಕ ಸ್ಥಳಗಳ ಆಡಳಿತವು ವೃತ್ತಿಪರವಾಗಲಿದೆ ಎಂದು ಹಿಂದಿನ ಸಿಎಂ ತ್ರಿವೇಂದ್ರ ಸಿಂಗ್ ರಾವತ್ ವಿಧಾನಸಭೆಯಲ್ಲಿ ಸಮರ್ಥಿಸಿಕೊಂಡಿದ್ದರು. ಈ ಮಂಡಳಿಗೆ ಮುಖ್ಯಮಂತ್ರಿಯೇ ಪದನಿಮಿತ್ತ ಅಧ್ಯಕ್ಷರಾಗಿರುತ್ತಾರೆ. ಹಿರಿಯ ಐಎಎಸ್ ಅಧಿಕಾರಿಯನ್ನು ಮಂಡಳಿಯ ಸಿಇಒ ಆಗಿ ನೇಮಿಸಲಾಗುತ್ತದೆ. ತಪ್ಪೆಸಗುವ ಅರ್ಚಕರನ್ನು ಸೇವೆಯಿಂದ ವಜಾ ಮಾಡಬಹುದು ಎಂಬ ಪ್ರಸ್ತಾಪಗಳಿದ್ದ ಈ ಮಸೂದೆಗೆ ರಾಜ್ಯಪಾಲೆ ಬೇಬಿ ರಾಣಿ ಮೌರ್ಯ ಸಹಿ ಮಾಡಿದ ನಂತರ ಕಾಯ್ದೆ ಆಗಿತ್ತು. ಆದರೆ, ಪ್ರಮುಖ ದೇವಾಲಯಗಳ ಆಡಳಿತವನ್ನು ಸರ್ಕಾರವೇ ವಹಿಸಿಕೊಳ್ಳುವುದನ್ನು ವಿರೋಧಿಸಿ ರಾಜ್ಯದಲ್ಲಿ ವ್ಯಾಪಕ ಪ್ರತಿಭಟನೆ ವ್ಯಕ್ತವಾಗಿತ್ತು. ಗಂಗೋತ್ರಿಯ ಮುಖ್ಯ ಅರ್ಚಕ ವಿಶ್ವ ಹಿಂದು ಪರಿಷದ್ ಮತ್ತು ಆರ್​ಎಸ್​ಎಸ್ ಮುಖಂಡನ್ನು ಭೇಟಿಯಾಗಿ ಈ ಮಸೂದೆಯನ್ನು ತೀವ್ರವಾಗಿ ಟೀಕಿಸಿದ್ದರು. ತಲೆತಲಾಂತರಗಳಿಂದ ದೇವಾಲಯಗಳನ್ನು ಅರ್ಚಕರ ಮನೆತನದವರು ನಡೆಸಿಕೊಂಡು ಬರುತ್ತಿದ್ದಾರೆ. ದೇವಾಲಯದ ಆಡಳಿತವನ್ನು ಈ ಕುಟುಂಬಗಳಿಗೆ ಬಿಟ್ಟಕೊಡಬೇಕು ಎಂದು ಆಗ್ರಹಿಸಿದ್ದರು.

51 ದೇಗುಲಗಳ ಆಡಳಿತವನ್ನು ಅವುಗಳಿಗೇ ಬಿಡುವ ಸರ್ಕಾರದ ನಿರ್ಧಾರವನ್ನು ಬಿಜೆಪಿ ಸಂಸದ ಸುಬ್ರಮಣಿಯನ್ ಸ್ವಾಮಿ ಶ್ಲಾಘಿಸಿದ್ದಾರೆ. ಇದು ಪ್ರಜಾಪ್ರಭುತ್ವಕ್ಕೆ ಸ್ಪಂದಿಸುವ ಸರ್ಕಾರದ ಲಕ್ಷಣ ಎಂದಿದ್ದಾರೆ. ವಿಎಚ್​ಪಿ ಪ್ರಧಾನ ಕಾರ್ಯದರ್ಶಿ ಮಿಲಿಂದ್ ಪರಾಂಡೆ ಸರ್ಕಾರದ ನಿರ್ಧಾರವನ್ನು ಸ್ವಾಗತಿಸಿದ್ದಾರೆ.

ವಿಎಚ್​ಪಿ ಮಾರ್ಗದರ್ಶಕ ಮಂಡಲದ ಮೂರು ನಿರ್ಣಯ

• ದೇವಾಲಯಗಳ ಮೇಲೆ ರಾಜ್ಯ ಸರ್ಕಾರಗಳ ಹಿಡಿತ ತಪ್ಪಬೇಕು.
• ರಾಮಸೇತುವನ್ನು ವಿಶ್ವ ಪಾರಂಪರಿಕ ಪಟ್ಟಿಗೆ ಸೇರಿಸಲು ಸರ್ಕಾರ ಕ್ರಮ ಕೈಗೊಳ್ಳಬೇಕು.
• ಯಾವ ರಾಜ್ಯಗಳಲ್ಲಿ ಮತಾಂತರ ತಡೆ ಕಾನೂನು ಇಲ್ಲವೋ ಅಂತಹ ರಾಜ್ಯಗಳು ಕೂಡಲೇ ಇದನ್ನು ರಚಿಸಬೇಕು.

https://www.vijayavani.net/boy-and-girl-fought-on-road-for-pet-dog-finally-dog-went-with-girl/

https://www.vijayavani.net/gas-cylinder-blast-two-including-a-girl-is-burnt-alive/