4 ದಿನಗಳಲ್ಲಿ 5 ಲಕ್ಷ ಫಾಸ್ಟ್ಯಾಗ್ ವಾರ್ಷಿಕ ಪಾಸ್ ಮಾರಾಟ

ನವದೆಹಲಿ: ಹೊಸದಾಗಿ ಪರಿಚಯಿಸಲಾಗಿರುವ ಫಾಸ್ಟ್ಯಾಗ್ ವಾರ್ಷಿಕ ಪಾಸ್ ಬಳಕೆದಾರರ ಸಂಖ್ಯೆ ಕಳೆದ ನಾಲ್ಕೇ ದಿನಗಳಲ್ಲಿ ಐದು ಲಕ್ಷ ದಾಟಿದೆ. ಇದನ್ನು ಆ. 15ರಂದು ಬಿಡುಗಡೆ ಮಾಡಲಾಗಿದೆ. ಈ ಪಾಸ್ ತಮಿಳುನಾಡಿನಲ್ಲಿ ಅತಿ ಹೆಚ್ಚು ಮಾರಾಟವಾಗಿದ್ದು, ನಂತರದ ಸ್ಥಾನಗಳಲ್ಲಿ ಕರ್ನಾಟಕ ಮತ್ತು ಹರಿಯಾಣಾ ಇವೆ.

ವಾರ್ಷಿಕ ಫಾಸ್ಟ್ಯಾಗ್ ಪಾಸ್​ನ ಅತಿ ಹೆಚ್ಚು ವಹಿವಾಟುಗಳು ತಮಿಳುನಾಡು, ಕರ್ನಾಟಕ ಮತ್ತು ಆಂಧ್ರಪ್ರದೇಶದ ಟೋಲ್ ಪ್ಲಾಜಾಗಳಲ್ಲಿ ದಾಖಲಾಗಿವೆ. ಕಾರು, ವ್ಯಾನ್, ಜೀಪ್ ಮುಂತಾಗಿ ಎಲ್ಲ ವಾಣಿಜ್ಯೇತರ ವೈಯಕ್ತಿಕ ವಾಹನಗಳಿಗೆ ಈ ಪಾಸನ್ನು ಬಳಸಬಹುದಾಗಿದೆ. ರಾಜ್​ವಾರ್ಗ್ ಯಾತ್ರಾ ಆಪ್ ಅಥವಾ ಎನ್​ಎಚ್​ಎಐ ವೆಬ್​ಸೈಟ್ ಮೂಲಕ ಇದನ್ನು ಆಕ್ಟಿವೇಟ್ ಮಾಡಿಕೊಳ್ಳಬಹುದಾಗಿದೆ.

ರಾಷ್ಟ್ರೀಯ ಹೆದ್ದಾರಿಗಳು ಮತ್ತು ಎಕ್ಸ್​ಪ್ರೆಸ್​ವೇಗಳ ಸುಮಾರು 1,150 ಟೋಲ್ ಬೂತ್​ಗಳಿಗೆ ಈ ಪಾಸ್ ಅನ್ವಯವಾಗುತ್ತದೆ. ಇದರ ಬೆಲೆ 3 ಸಾವಿರ ರೂ. ಆಗಿದ್ದು, ಇದರಲ್ಲಿ 200 ಟೋಲ್ ಪ್ಲಾಜಾಗಳನ್ನು ದಾಟಲು ಅವಕಾಶವಿದೆ. ಒಂದು ವರ್ಷದ ಅವಧಿಯಲ್ಲಿ ಇನ್ನೂ ಸಮಯವಿದ್ದರೂ 200 ಟೋಲ್ ಪ್ಲಾಜಾ ದಾಟಿದ್ದರೆ, ಹೊಸದಾಗಿ ರಿಚಾರ್ಜ್ ಮಾಡಿಕೊಳ್ಳಬೇಕಾಗುತ್ತದೆ.