ಹಣ ದ್ವಿಗುಣ ನೆಪದಲ್ಲಿ ಮಹಿಳೆಯಿಂದ ವಂಚನೆ

ಬೆಂಗಳೂರು: ಹಣ ದ್ವಿಗುಣ ಮಾಡಿಕೊಡುವುದಾಗಿ ವ್ಯಕ್ತಿಗೆ ನಂಬಿಸಿ ಸ್ನೇಹಿತೆಯೇ 20 ಲಕ್ಷ ರೂ. ಪಡೆದು ವಂಚಿಸಿದ್ದಾಳೆ. ಕೆಂಗೇರಿಯ ಮೇಗಲ ಬೀದಿ ನಿವಾಸಿ ಮಂಜುನಾಥ್ ವಂಚನೆಗೆ ಒಳಗಾದವರು. ಕೃತ್ಯ ಎಸಗಿ ಪರಾರಿಯಾಗಿರುವ ರಮ್ಯಾ ಹಾಗೂ ಆಕೆಯ ಸಹಚರರ ಬಂಧನಕ್ಕೆ ಕೆಂಗೇರಿ ಠಾಣೆ ಪೊಲೀಸರು ಬಲೆಬೀಸಿದ್ದಾರೆ.

3 ವರ್ಷದ ಹಿಂದೆ ನನಗೆ ಸ್ನೇಹಿತ ಪ್ರಸನ್ನ ಎಂಬಾತನ ಮೂಲಕ ರಮ್ಯಾಳ ಪರಿಚಯವಾಯಿತು. ಇತ್ತೀಚೆಗೆ ಕರೆ ಮಾಡಿದ್ದ ಆಕೆ, ನಿಮ್ಮ ಬಳಿ ಇರುವ ಹಣವನ್ನು ಕೊಟ್ಟರೆ ನಾವು ಅದಕ್ಕೆ ಎರಡು ಪಟ್ಟು ಮರಳಿಸುತ್ತೇವೆ ಎಂದು ತಿಳಿಸಿದಳು. ಅದನ್ನು ನಂಬಿ ಜೂ.27 ರಂದು ಬೆಳಗ್ಗೆ 8 ಗಂಟೆಗೆ ರಮ್ಯಾಳ ಜತೆ 20 ಲಕ್ಷ ರೂ. ಸಮೇತ ಉತ್ತರಹಳ್ಳಿ ರಸ್ತೆಗೆ ಹೋದೆ. ಅಲ್ಲಾಗಲೇ ಮತ್ತೊಂದು ಕಾರಿನಲ್ಲಿ ಅಪರಿಚಿತರು ಕುಳಿತಿದ್ದರು. ತಕ್ಷಣವೇ ನನ್ನ ಕಾರಿನಿಂದ ಹಣ ತೆಗೆದುಕೊಂಡ ಇಳಿದ ರಮ್ಯಾ, ನಿಮಗೆ ಕರೆ ಮಾಡುವುದಾಗಿ ಹೇಳಿ ಆ ಕಾರಿನಲ್ಲಿ ಹೊರಟಳು. ಆದರೆ ಆಕೆಯಿಂದ ಯಾವುದೇ ಕರೆ ಬರಲಿಲ್ಲ. ನಾನು ಕರೆ ಮಾಡಿದಾಗ ಆಕೆಯ ಮೊಬೈಲ್ ಸಂಖ್ಯೆ ಸ್ವಿಚ್ ಆಫ್ ಆಗಿತ್ತು ಎಂದು ಮಂಜುನಾಥ್ ದೂರಿನಲ್ಲಿ ತಿಳಿಸಿದ್ದಾರೆ.

ಇದನ್ನೂ ಓದಿ: 4ರಿಂದ ಕರ್ನಾಟಕ-ಕೇರಳ ಗಡಿ ಬಂದ್: ಕೇರಳ ಸರ್ಕಾರದಿಂದ ಕಟ್ಟುನಿಟ್ಟಿನ ಕ್ರಮ

ಕೆಂಗೇರಿ ಪೊಲೀಸರು ಎಫ್​ಐಆರ್ ದಾಖಲಿಸಿದ್ದಾರೆ. ಕರೊನಾ ಸೋಂಕು ಹಿನ್ನೆಲೆಯಲ್ಲಿ ಕೆಂಗೇರಿ ಠಾಣೆ ಸೀಲ್​ಡೌನ್ ಆಗಿ ಸಿಬ್ಬಂದಿ ಕ್ವಾರಂಟೈನ್​ಗೊಳಗಾಗಿದ್ದರು. ಹೀಗಾಗಿ ತನಿಖೆಗೆ ಆಡಚರಣೆಯಾಗಿತ್ತು. ಠಾಣೆ ಮತ್ತೆ ಕಾರ್ಯಾರಂಭಿಸಿದ ಕೂಡಲೇ ವಂಚಕರನ್ನು ಪತ್ತೆಹಚ್ಚಲಾಗುತ್ತದೆ ಎಂದು ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.

https://www.vijayavani.net/covid-difficulties-officials-also-gets-responsibility/