ನಿರ್ಭಯಾ ಅತ್ಯಾಚಾರ ಅಪರಾಧಿಗಳಿಗೆ ಈ ಬಾರಿ ಮಿಸ್​ ಆಗಲ್ಲ ಗಲ್ಲು...; ದೆಹಲಿ ಪಟಿಯಾಲಾ ಕೋರ್ಟ್​ ತೀರ್ಪು ಕೇಳಿ ಮೂರ್ಛೆ ಹೋದ ಅಪರಾಧಿಯ ಪತ್ನಿ

ನವದೆಹಲಿ: ಬರೋಬ್ಬರಿ ಏಳು ವರ್ಷಗಳ ನಂತರ ನಿರ್ಭಯಾ ಅತ್ಯಾಚಾರ ಪ್ರಕರಣದ ಅಪರಾಧಿಗಳು ನೇಣುಗಂಬಕ್ಕೆ ಏರುತ್ತಿದ್ದಾರೆ. ದೆಹಲಿ ಪಟಿಯಾಲಾ ಕೋರ್ಟ್​ ಜಾರಿ ಮಾಡಿದ ಡೆತ್​ ವಾರಂಟ್ ಅನ್ವಯ ಮಾ.20ರಂದು ಮುಂಜಾನೆ 5.30ಕ್ಕೆ ಮುಕೇಶ್​ ಸಿಂಗ್​ (32), ವಿನಯ್​ ಶರ್ಮಾ (26), ಪವನ್​ ಗುಪ್ತಾ (25) ಹಾಗೂ ಅಕ್ಷಯ್​ ಕುಮಾರ್ ಸಿಂಗ್​ (31)ರನ್ನು ನೇಣಿಗೇರಿಸಲು ತಿಹಾರ್ ಜೈಲ್​ ಸಕಲ ಸಿದ್ಧತೆಯನ್ನೂ ಮಾಡಿಕೊಂಡಿದೆ.

ಮಾ.20ರ ಮರಣದಂಡನೆ ತಪ್ಪಿಸಿಕೊಳ್ಳಲು ಅಪರಾಧಿಗಳು ಪ್ರಯತ್ನ ಮಾಡಿದ್ದರು. ತಮ್ಮನ್ನು ನೇಣಿಗೇರಿಸಬಾರದು. ಗಲ್ಲುಶಿಕ್ಷೆಗೆ ತಡೆ ನೀಡಬೇಕು. ನಮಗಿನ್ನೂ ಕಾನೂನು ಪ್ರಕ್ರಿಯೆಗಳನ್ನು ನಡೆಸುವುದು ಬಾಕಿ ಇದೆ ಎಂದು ದೆಹಲಿ ಪಟಿಯಾಲಾ ಹೌಸ್ ಕೋರ್ಟ್​ಗೆ ಅರ್ಜಿ ಸಲ್ಲಿಸಿದ್ದರು. ಆದರೆ ದೆಹಲಿ ಕೋರ್ಟ್​ ಅರ್ಜಿಗಳನ್ನು ವಜಾ ಮಾಡಿದೆ. ಹಾಗೇ ಅಪರಾಧಿಗಳಲ್ಲೋರ್ವನಾದ ಪವನ್​ ಗುಪ್ತಾ ಸುಪ್ರೀಂಕೋರ್ಟ್​ಗೆ ಸಲ್ಲಿಸಿದ್ದ ಕ್ಯುರೇಟಿವ್​ ಅರ್ಜಿಯೂ ತಿರಸ್ಕೃತಗೊಂಡಿದೆ.

ನಾಳೆ ಮುಂಜಾನೆ 5.30ಕ್ಕೆ ನಾಲ್ವರು ಅಪರಾಧಿಗಳನ್ನು ನೇಣಿಗೇರಿಸಬೇಕು ಎಂದು ದೆಹಲಿ ಪಟಿಯಾಲಾ ಕೋರ್ಟ್​ ಆದೇಶ ನೀಡಿದೆ.

ಅಪರಾಧಿಗಳಿಗೆ ಇನ್ಯಾವುದೇ ಕಾನೂನು ಪ್ರಕ್ರಿಯೆಗಳು ಬಾಕಿ ಇಲ್ಲ. ಪವನ್​ ಮತ್ತು ಅಕ್ಷಯ್​ ಸಲ್ಲಿಸಿದ್ದ ಎರಡನೇ ಕ್ಷಮಾದಾನ ಅರ್ಜಿಯನ್ನೂ ರಾಷ್ಟ್ರಪತಿ ತಿರಸ್ಕಾರ ಮಾಡಿದ್ದಾರೆ ಎಂದು ಪಬ್ಲಿಕ್​ ಪ್ರಾಸಿಕ್ಯೂಟರ್​ ಇರ್ಫಾನ್​ ಅಹಮದ್​ ಇಂದು ಪಟಿಯಾಲಾ ನ್ಯಾಯಾಲಯಕ್ಕೆ ತಿಳಿಸಿದ್ದಾರೆ.
ಇಂದು ದೆಹಲಿ ಪಟಿಯಾಲಾ ಹೌಸ್ ಕೋರ್ಟ್​ನ ಆವರಣದಲ್ಲಿ ದೊಡ್ಡ ಹೈಡ್ರಾಮಾವೇ ನಡೆಯಿತು. ಡಿವೋರ್ಸ್​ಗೆ ಮನವಿ ಸಲ್ಲಿಸಿರುವ ಅಪರಾಧಿ ಅಕ್ಷಯ್​ ಕುಮಾರ್ ಪತ್ನಿ ನ್ಯಾಯಾಲಯದ ಅಂತಿಮ ತೀರ್ಪನ್ನು ಕೇಳುತ್ತಿದ್ದಂತೆ ಮೂರ್ಛೆ ಹೋದರು.

2012ರಲ್ಲಿ ನಡೆದ ಅತ್ಯಾಚಾರ ಪ್ರಕರಣಕ್ಕೆ ಸಂಬಂಧಪಟ್ಟಂತೆ ಆರು ಮಂದಿಯನ್ನು ಬಂಧಿಸಲಾಗಿತ್ತು. ಅದರಲ್ಲಿ ರಾಮ ಸಿಂಗ್​ ಎಂಬಾತ ಪ್ರಕರಣದ ವಿಚಾರಣೆ ನಡೆಯುತ್ತಿದ್ದಾಗಲೇ ತಿಹಾರ್ ಜೈಲಿನಲ್ಲೇ ಆತ್ಮಹತ್ಯೆ ಮಾಡಿಕೊಂಡಿದ್ದ. ಬಾಲಾಪರಾಧಿಯನ್ನು 2015ರಲ್ಲಿ ಬಿಡುಗಡೆ ಮಾಡಲಾಗಿತ್ತು. ಈಗುಳಿದ ನಾಲ್ವರು ನಾಳೆ ಮುಂಜಾನೆ ನೇಣಿಗೇರಲಿದ್ದಾರೆ.(ಏಜೆನ್ಸೀಸ್​)

https://www.vijayavani.net/the-supreme-court-on-thursday-rejected-the-curative-petition-filed-by-pawan-gupta-one-of-the-four-death-row-convicts-in-the-2012-nirbhaya-gangrape-and-murder-case/