ಮೊರಾಕೊದಲ್ಲಿ 6.8 ತೀವ್ರತೆಯ ಭೂಕಂಪ; 296 ಕ್ಕೂ ಹೆಚ್ಚು ಸಾವು, ನೂರಾರು ಜನರಿಗೆ ಗಾಯ, ಸಂತಾಪ ಸೂಚಿಸಿದ ಪಿಎಂ ಮೋದಿ

ಮೊರಾಕೊ: ಶುಕ್ರವಾರ (ಸೆ.8) ತಡರಾತ್ರಿ ಮೊರಾಕೊದಲ್ಲಿ ಪ್ರಬಲ ಭೂಕಂಪ ಸಂಭವಿಸಿದೆ. ಭೂಕಂಪದಿಂದಾಗಿ ಕನಿಷ್ಠ 296 ಜನರು ಸಾವನ್ನಪ್ಪಿದ್ದಾರೆ. ಅಸೋಸಿಯೇಟೆಡ್ ಪ್ರೆಸ್‌ನ ವರದಿಯ ಪ್ರಕಾರ, ದೇಶದ ಆಂತರಿಕ ಸಚಿವಾಲಯವು ಭೂಕಂಪದ ತೀವ್ರತೆಯನ್ನು 6.8 ಎಂದು ಅಳೆದಿದೆ.

ಮನೆಗಳಿಂದ ಹೊರಬಂದ ಜನರು

ಪ್ರಬಲ ಭೂಕಂಪದ ನಂತರ ಜನರು ಭಯಭೀತರಾಗಿ ಮನೆಗಳಿಂದ ಓಡಿಹೋದರು. ಭೂಕಂಪದಿಂದ ಐತಿಹಾಸಿಕ ಕಟ್ಟಡಗಳಿಗೆ ಭಾರೀ ಹಾನಿಯಾಗಿದ್ದು, ವಿದ್ಯುತ್ ಕಡಿತವೂ ಆಗಿದೆ. ಭೂಕಂಪವು ರಾತ್ರಿ 11:11 ಗಂಟೆಗೆ (22:11 GMT) 44 ಮೈಲಿಗಳು (71 ಕಿಲೋಮೀಟರ್) ನೈರುತ್ಯಕ್ಕೆ 18.5 ಕಿಲೋಮೀಟರ್ ಆಳದಲ್ಲಿ ಮಾರಕೇಶ್‌ನ ನೈಋತ್ಯಕ್ಕೆ ಅಪ್ಪಳಿಸಿತು ಎಂದು ಯುಎಸ್ ಜಿಯೋಲಾಜಿಕಲ್ ಸರ್ವೆ ಹೇಳಿದೆ. ಸ್ಪೆಕ್ಟೇಟರ್ ಪ್ರಕಾರ, ಮೊರಾಕೊದಲ್ಲಿ ಭೂಕಂಪದಿಂದಾಗಿ ಕನಿಷ್ಠ 296 ಜನರು ಸಾವನ್ನಪ್ಪಿದ್ದಾರೆ ಮತ್ತು 153 ಜನರು ಗಾಯಗೊಂಡಿದ್ದಾರೆ.

ಸಂತಾಪ ಸೂಚಿಸಿದ ಪ್ರಧಾನಿ ಮೋದಿ

ಆಫ್ರಿಕಾದ ಮೊರಾಕೊದಲ್ಲಿ ಸಂಭವಿಸಿದ ಭಾರೀ ಭೂಕಂಪದ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಸಂತಾಪ ವ್ಯಕ್ತಪಡಿಸಿದ್ದಾರೆ . ಎಕ್ಸ್ (ಹಿಂದಿನ ಟ್ವಿಟರ್) ನಲ್ಲಿ 'ಮೊರಾಕೊದಲ್ಲಿ ಭೂಕಂಪದಿಂದಾಗಿ ಪ್ರಾಣ ಮತ್ತು ಆಸ್ತಿ ನಷ್ಟದಿಂದ ತೀವ್ರ ದುಃಖವಾಗಿದೆ. ಈ ಸಮಯದಲ್ಲಿ ನನ್ನ ಆಲೋಚನೆ ಮೊರಾಕೊದ ಜನರೊಂದಿಗೆ ಇದೆ. ಗಾಯಾಳುಗಳು ಆದಷ್ಟು ಬೇಗ ಗುಣಮುಖರಾಗಲಿ. ಈ ಸಂಕಷ್ಟದ ಸಮಯದಲ್ಲಿ ಮೊರಾಕೊಗೆ ಸಾಧ್ಯವಿರುವ ಎಲ್ಲ ನೆರವು ನೀಡಲು ಭಾರತ ಸಿದ್ಧವಿದೆ' ಎಂದು ತಿಳಿಸಿದ್ದಾರೆ.

ತೀವ್ರತೆ ಎಷ್ಟಿತ್ತು? 

ರಾತ್ರಿ 11:11 ಕ್ಕೆ ಸಂಭವಿಸಿದ ಭೂಕಂಪವು 6.8 ತೀವ್ರತೆ ಹೊಂದಿದ್ದು, ಹಲವಾರು ಸೆಕೆಂಡುಗಳ ಕಾಲ ಕಂಪಿಸಿತು ಎಂದು ಯುಎಸ್ ಜಿಯೋಲಾಜಿಕಲ್ ಸರ್ವೆ ಹೇಳಿದೆ. ಆದರೆ ಯುಎಸ್ ಏಜೆನ್ಸಿ ಭೂಕಂಪದ 19 ನಿಮಿಷಗಳ ನಂತರ 4.9 ತೀವ್ರತೆಯ ಭೂಕಂಪನವನ್ನು ವರದಿ ಮಾಡಿದೆ. ಅಂದಹಾಗೆ ಮೊರೊಕ್ಕನ್ನರು ಹಾನಿಗೊಳಗಾದ ಕೆಲವು ಕಟ್ಟಡಗಳು ಮತ್ತು ಐತಿಹಾಸಿಕ ಕಟ್ಟಡಗಳ ಭಾಗಗಳ ಹಲವಾರು ವಿಡಿಯೋಗಳನ್ನು ಪೋಸ್ಟ್ ಮಾಡಿದ್ದಾರೆ.

https://www.vijayavani.net/india-showcases-konark-temple-wheel-as-pm-modi-receives-g20-summit-leaders-at-bharat-mandapam