ನೋಟು ಬದಲಾವಣೆ ಗಡುವು ಮುಗಿಯಿತು…2ಸಾವಿರ ರೂ.ಕೈಯಲ್ಲಿದ್ರೆ ಏನು ಮಾಡಬೇಕೆಂದಿತು ಆರ್​ಬಿಐ?

ನವದೆಹಲಿ: 2ಸಾವಿರ ರೂ.ನೋಟುಗಳನ್ನು ಬ್ಯಾಂಕ್‌ಗಳಲ್ಲಿ ವಿನಿಮಯ ಮಾಡಿಕೊಳ್ಳಲು ನೀಡಲಾಗಿದ್ದ ಗಡುವು ಶನಿವಾರಕ್ಕೆ ಮುಕ್ತಾಯವಾಗಿದ್ದು, ಮುಂದೇನು ಎಂಬ ಪ್ರಶ್ನೆ ಎಲ್ಲರನ್ನು ಕಾಡುತ್ತಿರಬಹುದು. ಆದರೆ ಆತಂಕಗೊಳ್ಳುವ ಅಗತ್ಯವಿಲ್ಲ, ಇನ್ನು ಮುಂದೆ ಬೆಂಗಳೂರು ಸೇರಿದಂತೆ ದೇಶದ 19 ಆರ್​ಬಿಐ ವಿಭಾಗೀಯ ಕಾರ್ಯಾಲಯಗಳಲ್ಲಿ ಬದಲಾವಣೆ ಮಾಡಿಕೊಳ್ಳಬಹುದು. ಇದಕ್ಕೆ ಆರ್​ಬಿಐ ಅನುಮತಿಸಿದೆ.

ಆರ್​ಬಿಐ ವಿಭಾಗೀಯ ಕಾರ್ಯಾಲಯಗಳಲ್ಲಿ ಪ್ರತಿ ವಹಿವಾಟಿಗೆ ಗರಿಷ್ಠ 20ಸಾವಿರ ರೂಗಳ ವಿನಿಮಯ ಮಿತಿ ಹೇರಲಾಗಿದೆ. ಗ್ರಾಹಕರು ತಮ್ಮ ಬ್ಯಾಂಕ್ ಖಾತೆ ಪ್ರಸ್ತುತಪಡಿಸಿ 2ಸಾವಿರ ರೂ.ನೋಟುಗಳನ್ನು ಪ್ರಸ್ತುತಪಡಿಸಬಹುದು. ಈ ನೋಟುಗಳ ಮೌಲ್ಯಯುತವಾದರೂ ಇನ್ನು ಮುಂದೆ ಅವುಗಳನ್ನು ವಹಿವಾಟುಗಳಿಗೆ ಸ್ವೀಕರಿಸಲಾಗುವುದಿಲ್ಲ. ನೋಟುಗಳನ್ನು ಆರ್‌ಬಿಐನೊಂದಿಗೆ ಮಾತ್ರ ಬದಲಾಯಿಸಬಹುದು ಎಂದು ಆರ್​ಬಿಐ ಗವರ್ನರ್​ ಶಕ್ತಿಕಾಂತ ದಾಸ್​ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ಇದನ್ನೂ ಓದಿ: ಚಿನ್ನದ ಬೆಲೆಯಲ್ಲಿ ನಿರಂತರ ಏರಿಕೆ: ಇಂದಿನ ಚಿನ್ನ-ಬೆಳ್ಳಿ ದರ ಇಲ್ಲಿ ತಿಳಿಯಿರಿ

2ಸಾವಿರ ಮುಖಬೆಲೆಯ ನೋಟುಗಳ ಬದಲಾವಣೆಗೆ ಮೊದಲು ಸೆ.30ರವರೆಗೆ ಆರ್​ಬಿಐ ಗಡುವು ವಿಧಿಸಿದ್ದು, ಬಳಿಕ ಅ.7ರವರೆಗೆ ಕಾಲಾವಕಾಶ ನೀಡಿತ್ತು. ಮಾರುಕಟ್ಟೆಯಲ್ಲಿ ಇನ್ನೂ ಈ ನೋಟುಗಳು ಉಳಿದುಕೊಂಡಿರುವ ಕಾರಣ ಇನ್ನು ಮುಂದೆ ಆರ್​ಬಿಐನ ಪ್ರಾದೇಶಿಕ ಕಾರ್ಯಾಲಯಗಳಲ್ಲಿ ಬದಲಿಸಿಕೊಳ್ಳಲು ಅನುಮತಿಸಲಾಗಿದೆ ಎಂದು ಅವರು ವಿವರಿಸಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿ ಅವರು ದಿಢೀರನೆ ಅಧಿಕ ಮುಖಬೆಲೆಯ 1ಸಾವಿರ, 5ನೂರು ರೂ,ನ ನೋಟುಗಳನ್ನು ರದ್ದುಗೊಳಿಸಿದ ನಂತರ ನವೆಂಬರ್ 2016 ರಲ್ಲಿ ಆರ್​ಬಿಐ 2ಸಾವಿರ ರೂ. ನೋಟು ಮುದ್ರಿಸಲು ಪ್ರಾರಂಭಿಸಿತು. ಆದರೆ ಮೇ ತಿಂಗಳಲ್ಲಿ ಹೆಚ್ಚಿನ ಮೌಲ್ಯದ ನೋಟುಗಳನ್ನು ಚಲಾವಣೆಯಿಂದ ಹಿಂಪಡೆಯಲು ನಿರ್ಧರಿಸಿದ ನಂತರ 2ಸಾವಿರ ಮುಖಬೆಲೆಯ ನೋಟುಗಳಲ್ಲಿ ಸುಮಾರು ಶೇ.96 ರಷ್ಟು ಆರ್​ಬಿಐಗೆ ಮರಳಿವೆ. ಇನ್ನು ಸೆಪ್ಟೆಂಬರ್ 29ರವರೆಗೆ ಕೇವಲ 0.14 ಲಕ್ಷ ಕೋಟಿ ಮೌಲ್ಯದ 2ಸಾವಿರ ರೂ, ನೋಟುಗಳು ಚಲಾವಣೆಯಲ್ಲಿ ಉಳಿದಿವೆ.

ಇನ್ನು ದೇಶದಲ್ಲಿ 2ಸಾವಿರ ಮುಖಬೆಲೆಯ ಒಟ್ಟು 12ಸಾವಿರ ಕೋಟಿ ಮೊತ್ತದ ನೋಟುಗಳು ಚಲಾವಣೆಯಲ್ಲಿದ್ದವು ಎನ್ನಲಾಗುತ್ತಿದೆ.

https://www.vijayavani.net/lottery-agent-from-kerala-strikes-jackpot-with-unsold-ticket-wins-rs-1-crore