ಮಧ್ಯರಾತ್ರಿಯಿಂದ 200 ವಿಶೇಷ ರೈಲುಗಳ ಸಂಚಾರ ಆರಂಭ

ನವದೆಹಲಿ: ಭಾರತೀಯ ರೈಲ್ವೆ ಜೂ.1ರಿಂದ 200 ವಿಶೇಷ ರೈಲುಗಳ ಸಂಚಾರವನ್ನು ಆರಂಭಿಸುತ್ತಿದೆ. ಇಂದು ಮಧ್ಯರಾತ್ರಿ 12 ಗಂಟೆಯಿಂದಲೇ ರೈಲುಗಳ ಸಂಚಾರ ಆರಂಭವಾಗಲಿದ್ದು, ಮೊದಲ ದಿನ ಅಂದಾಜು 1.45 ಲಕ್ಷ ಜನರು ಈ ಸೇವೆಯನ್ನು ಪಡೆದುಕೊಳ್ಳುತ್ತಿದ್ದಾರೆ.

ಹಾಲಿ ಸಂಚರಿಸುತ್ತಿರುವ ಶ್ರಮಿಕ್​ ಸ್ಪೆಶಲ್​ ಮತ್ತು 30 ವಿಶೇಷ ಎಸಿ ರೈಲುಗಳ ಜತೆಗೆ ಈ 200 ವಿಶೇಷ ರೈಲುಗಳು ಸಂಚರಿಸಲಿವೆ.

ಜೂ.1ರಿಂದ ಜೂ.30ರವರೆಗೆ ಈ ರೈಲುಗಳಲ್ಲಿ ಸಂಚರಿಸಲು ಐಆರ್​ಸಿಟಿಸಿ ವೆಬ್​ಸೈಟ್​ ಮತ್ತು ಆ್ಯಪ್​ಗಳಲ್ಲದೆ ರೈಲು ನಿಲ್ದಾಣಗಳಲ್ಲಿನ ಮುಂಗಡ ಟಿಕೆಟ್​ ಕಾಯ್ದಿರಿಸುವಿಕೆ ಕೇಂದ್ರಗಳಲ್ಲಿ ಅಂದಾಜು 26 ಲಕ್ಷಕ್ಕೂ ಹೆಚ್ಚು ಜನರು ಟಿಕೆಟ್​ ಮುಂಗಡ ಕಾಯ್ದಿರಿಸಿದ್ದಾರೆ.

90 ನಿಮಿಷ ಮೊದಲೇ ಬರಬೇಕು: ವಿಶೇಷ ರೈಲುಗಳ ಪ್ರಯಾಣಿಕರು ತಮ್ಮ ರೈಲುಗಳು ಹೊರಡುವ 90 ನಿಮಿಷ ಮೊದಲೇ ರೈಲು ನಿಲ್ದಾಣಕ್ಕೆ ಬರುವುದು ಕಡ್ಡಾಯವಾಗಿದೆ. ಟಿಕೆಟ್​ ಕನ್ಫರ್ಮ್​ ಆದವರು ಮತ್ತು ಆರ್​ಎಸಿ ಆಗಿರುವ ಟಿಕೆಟ್​ಗಳನ್ನು ಹೊಂದಿರುವವರು ಮಾತ್ರ ರೈಲು ನಿಲ್ದಾಣಕ್ಕೆ ಬಂದು ರೈಲು ಹತ್ತಬಹುದಾಗಿದೆ ಎಂದು ಭಾರತೀಯ ರೈಲ್ವೆ ತಿಳಿಸಿದೆ.

https://www.vijayavani.net/karnataka-corona-case-may-31/