ಮಸೀದಿಯಲ್ಲಿ ಅಡಗಿ ಜೈಲುಪಾಲಾಗಿದ್ದ 17 ವಿದೇಶಿ ತಬ್ಲಿಘಿಗಳು ಈಗ ಬಿಡುಗಡೆ!

ರಾಂಚಿ: ದೆಹಲಿಯಲ್ಲಿ ನಡೆದ ತಬ್ಲಿಘಿ ಜಮಾತ್‌ನಿಂದ ಮರಳಿದ ಮೇಲೆ ಮಸೀದಿಯೊಂದರಲ್ಲಿ ಅಡಗಿಕೊಂಡಿದ್ದ ಆರೋಪದ ಮೇಲೆ ಜೈಲು ಪಾಲಾಗಿದ್ದ 17 ವಿದೇಶಿ ತಬ್ಲಿಘಿ ಸದಸ್ಯರ ಬಿಡುಗಡೆಗೆ ಜಾರ್ಖಂಡ್‌ನ ನ್ಯಾಯಾಲಯ ಇದೀಗ ಆದೇಶಿಸಿದೆ.

ಈ 17 ಮಂದಿಯ ಮೂರು ತಿಂಗಳ ನ್ಯಾಯಾಂಗ ಕಸ್ಟಡಿ ಪೂರ್ಣಗೊಂಡ ಹಿನ್ನೆಲೆಯಲ್ಲಿ ಅವರವರ ತಾಯ್ನಾಡಿಗೆ ಮರಳಲು ರಾಂಚಿಯ ಮುಖ್ಯ ಜ್ಯುಡಿಷಿಯಲ್ ಮ್ಯಾಜಿಸ್ಟ್ರೇಟ್ ಕೋರ್ಟ್ ಅನುಮತಿ ನೀಡಿದೆ. ಇವರೆಲ್ಲರಿಗೂ ತಲಾ 2,200 ರೂಪಾಯಿ ದಂಡವನ್ನೂ ವಿಧಿಸಿದೆ. ತಮ್ಮ ಕೃತ್ಯದಿಂದ ಕರೊನಾ ವ್ಯಾಧಿ ಹರಡುವ ಸಾಧ್ಯತೆಯಿತ್ತು ಎಂದು ಈ 17 ಜನರು ತಪ್ಪನ್ನು ಭಾಗಶಃ ಒಪ್ಪಿಕೊಂಡಿದ್ದರು.

ರಾಂಚಿಯ ಹಿಂದ್‌ಪಿರಿ ಪ್ರದೇಶದ ಮಸೀದಿಯಲ್ಲಿ ಅಡಗಿದ್ದವರನ್ನು ಮಾರ್ಚ್ 30ರಂದು ಬಂಧಿಸಲಾಗಿತ್ತು. ಜುಲೈ 15ಕ್ಕೆ ಇವರಿಗೆ ಜಾರ್ಖಂಡ್ ಹೈಕೋರ್ಟ್ ಜಾಮೀನು ನೀಡಿತ್ತು. ಈ 17 ಜನರು ಮಲೇಷ್ಯಾ, ಬ್ರಿಟನ್, ನೆದರ್‌ಲೆಂಡ್ಸ್, ಜಾಂಬಿಯಾ ಮತ್ತು ಕೆರಿಬಿಯನ್ ಐಲ್ಯಾಂಡ್ ದೇಶಗಳ ಪ್ರಜೆಗಳು. ಈ ಪೈಕಿ ಮಲೇಷ್ಯಾದ ಒಬ್ಬ ಮಹಿಳೆಗೆ ಕರೊನಾ ಸೋಂಕು ತಗುಲಿತ್ತು. (ಏಜೆನ್ಸೀಸ್​)