ತಬ್ಲಿಘಿ ಜಮಾತ್​ ಸಭೆಯಲ್ಲಿ ಪಾಲ್ಗೊಂಡ ಬಳಿಕ ಧರ್ಮ ಬೋಧಕರ ವೇಷ ಧರಿಸಿ ಓಡಾಡುತ್ತಿದ್ದ 17 ವಿದೇಶಿಗರು ಜೈಲಿಗೆ

ಪಟನಾ: ವೀಸಾ ನಿಯಮವನ್ನು ಉಲ್ಲಂಘಿಸಿದ ಆರೋಪದಡಿ 17 ವಿದೇಶಿಗರನ್ನು ಪಟನಾ ಪೊಲೀಸರು ಮಂಗಳವಾರ ಬಂಧಿಸಿ ಜೈಲಿಗೆ ಹಾಕಿದ್ದಾರೆ.

ಈ 17 ಮಂದಿ ಪ್ರವಾಸಿಗರಂತೆ ಭಾರತಕ್ಕೆ ಬಂದಿದ್ದಾರೆ. ಆದರೆ ಇಲ್ಲಿ ಬಂದ ಬಳಿಕ ನಿಯಮವನ್ನು ಮೀರಿ ಧಾರ್ಮಿಕ ವಿಚಾರಗಳನ್ನು ಉಪದೇಶ ಮಾಡುತ್ತ, ಧರ್ಮ ಬೋಧಕರಂತೆ ಬಿಂಬಿಸಿಕೊಂಡಿದ್ದರು. ಟೂರಿಸ್ಟ್​ ವಿಸಾ ನಿಯಮ ಉಲ್ಲಂಘನೆ ಮಾಡಿದ ಕಾರಣ ಅವರನ್ನು ಬಂಧಿಸಿ ಜೈಲಿಗೆ ಕಳಿಸಲಾಗಿದೆ ಎಂದು ಪಟನಾ ಜಿಲ್ಲಾಧಿಕಾರಿ ಕುಮಾರ್​ ರವಿ ತಿಳಿಸಿದ್ದಾರೆ.

ಈ 17 ಜನ ಕಳೆದ ತಿಂಗಳು ದೆಹಲಿ ನಿಜಾಮುದ್ದೀನ್​ ಮಸೀದಿಯಲ್ಲಿ ನಡೆದಿದ್ದ ತಬ್ಲಿಘಿ ಜಮಾತ್​ ಸಭೆಯಲ್ಲಿ ಪಾಲ್ಗೊಂಡಿದ್ದರು ಎಂದೂ ಮಾಹಿತಿ ನೀಡಿದ್ದಾರೆ. ಮಾ.23ರಂದು ದಿಘಾದ ಮಸೀದಿಯೊಂದರಲ್ಲಿ ಅಡಗಿದ್ದ 10 ಮಂದಿ ವಿದೇಶಿಗರನ್ನು ಪಟನಾ ಪೊಲೀಸರು ಬಂಧಿಸಿದ್ದರು.

ತಬ್ಲಿಘಿ ಜಮಾತ್​ ಸಮಾವೇಶದಲ್ಲಿ ಪಾಲ್ಗೊಂಡಿದ್ದ 960 ಮಂದಿ ಮುಸ್ಲಿಮರ ಟೂರಿಸ್ಟ್​ ವೀಸಾವನ್ನು ಈಗಾಗಲೇ ಕೇಂದ್ರ ಗೃಹ ಸಚಿವಾಲಯ ಬ್ಲ್ಯಾಕ್​ಲಿಸ್ಟ್​ಗೆ ಹಾಕಿ, ರದ್ದುಗೊಳಿಸಿದೆ. (ಏಜೆನ್ಸೀಸ್​)