1000 ವರ್ಷ ಹಳೆಯ ಚೋಳರ ತಾಮ್ರಶಾಸನಗಳು ಭಾರತಕ್ಕೆ ವಾಪಸ್: ನೆದರ್‌ಲ್ಯಾಂಡ್ಸ್‌ನಿಂದ ಐತಿಹಾಸಿಕ ಹಸ್ತಾಂತರ

ಈ ತಾಮ್ರಶಾಸನಗಳನ್ನು ‘ಆನೈಮಂಗಲಂ ಕಾಪರ್ ಪ್ಲೇಟ್ಸ್’ ಅಥವಾ ‘ಲೈಡನ್ ಪ್ಲೇಟ್ಸ್’ ಎಂದು ಕರೆಯಲಾಗುತ್ತದೆ. ಇವು ಚೋಳ ಸಾಮ್ರಾಜ್ಯದ ಅತ್ಯಂತ ಮಹತ್ವದ ಐತಿಹಾಸಿಕ ದಾಖಲೆಗಳಲ್ಲೊಂದು ಎಂದು ಇತಿಹಾಸಕಾರರು ಹೇಳುತ್ತಾರೆ. ರಾಜರಾಜ ಚೋಳ-I ಆಳ್ವಿಕೆಯ ಕಾಲಕ್ಕೆ ಸೇರಿದ ಈ ಶಾಸನಗಳು ಕ್ರಿ.ಶ. 11ನೇ ಶತಮಾನಕ್ಕೆ ಸೇರಿವೆ.

ಪ್ರಧಾನಮಂತ್ರಿ ಮೋದಿ ಈ ಕುರಿತು ಪ್ರತಿಕ್ರಿಯಿಸಿ, “ಪ್ರತಿ ಭಾರತೀಯನಿಗೂ ಇದು ಸಂತಸದ ಕ್ಷಣ. 11ನೇ ಶತಮಾನದ ಚೋಳ ತಾಮ್ರಶಾಸನಗಳು ಭಾರತಕ್ಕೆ ಮರಳಿವೆ” ಎಂದು ಸಾಮಾಜಿಕ ಜಾಲತಾಣ ‘X’ನಲ್ಲಿ ಬರೆದುಕೊಂಡಿದ್ದಾರೆ. ಈ ಹಸ್ತಾಂತರ ಸಮಾರಂಭದಲ್ಲಿ ನೆದರ್‌ಲ್ಯಾಂಡ್ಸ್ ಪ್ರಧಾನಿ Rob Jetten ಕೂಡ ಉಪಸ್ಥಿತರಿದ್ದರು.

ಇತಿಹಾಸಕಾರರ ಪ್ರಕಾರ, ಈ ತಾಮ್ರಶಾಸನಗಳು ಒಟ್ಟು 21 ದೊಡ್ಡ ತಾಮ್ರ ಫಲಕಗಳನ್ನು ಒಳಗೊಂಡಿವೆ. ಇವುಗಳಲ್ಲಿ ತಮಿಳು ಮತ್ತು ಸಂಸ್ಕೃತ ಭಾಷೆಯಲ್ಲಿ ಶಾಸನಗಳು ಕೆತ್ತಲ್ಪಟ್ಟಿವೆ. ಚೋಳರ ವಂಶಾವಳಿ, ಆಡಳಿತ ಮತ್ತು ಧಾರ್ಮಿಕ ದಾನಗಳ ಕುರಿತು ಮಹತ್ವದ ಮಾಹಿತಿ ಇವುಗಳಲ್ಲಿ ದಾಖಲಾಗಿದೆ. ವಿಶೇಷವಾಗಿ ನಾಗಪಟ್ಟಣಂನಲ್ಲಿದ್ದ ಬೌದ್ಧ ವಿಹಾರಕ್ಕೆ ನೀಡಲಾದ ಭೂದಾನ ಮತ್ತು ಆದಾಯದ ವಿವರಗಳು ಈ ಶಾಸನಗಳಲ್ಲಿ ಉಲ್ಲೇಖಗೊಂಡಿವೆ.

ಇವು ಕೇವಲ ಧಾರ್ಮಿಕ ಅಥವಾ ಆಡಳಿತಾತ್ಮಕ ದಾಖಲೆಗಳಲ್ಲ, ಮಧ್ಯಕಾಲೀನ ದಕ್ಷಿಣ ಭಾರತದ ಜಾಗತಿಕ ವ್ಯಾಪಾರ ಮತ್ತು ಸಾಂಸ್ಕೃತಿಕ ಸಂಪರ್ಕದ ಸಾಕ್ಷಿಯೂ ಆಗಿವೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಚೋಳರ ಕಾಲದಲ್ಲಿ ದಕ್ಷಿಣ ಭಾರತ ಮತ್ತು ಆಗಿನ ಶ್ರೀವಿಜಯ ಸಾಮ್ರಾಜ್ಯ (ಇಂದಿನ ಇಂಡೋನೇಷ್ಯಾ ಭಾಗ) ನಡುವೆ ಇದ್ದ ಸಂಬಂಧವನ್ನು ಈ ಶಾಸನಗಳು ಸ್ಪಷ್ಟಪಡಿಸುತ್ತವೆ.

ಈ ಅಮೂಲ್ಯ ಪರಂಪರೆ ಸುಮಾರು 300 ವರ್ಷಕ್ಕೂ ಹೆಚ್ಚು ಕಾಲ ನೆದರ್‌ಲ್ಯಾಂಡ್ಸ್‌ನ ಲೈಡನ್ ವಿಶ್ವವಿದ್ಯಾಲಯದಲ್ಲಿ ಸಂರಕ್ಷಿಸಲ್ಪಟ್ಟಿತ್ತು. 17ನೇ ಶತಮಾನದಲ್ಲಿ ಡಚ್ ಆಡಳಿತ ಕಾಲದಲ್ಲಿ ನಾಗಪಟ್ಟಣಂ ಪ್ರದೇಶದಿಂದ ಈ ಶಾಸನಗಳನ್ನು ಯೂರೋಪ್‌ಗೆ ಕೊಂಡೊಯ್ಯಲಾಗಿದೆ ಎಂದು ಇತಿಹಾಸಕಾರರು ಹೇಳುತ್ತಾರೆ. ಬಳಿಕ ಅವು ಲೈಡನ್ ವಿಶ್ವವಿದ್ಯಾಲಯದ ಗ್ರಂಥಾಲಯದ ಏಷ್ಯಾ ವಿಭಾಗದಲ್ಲಿ ಉಳಿದಿದ್ದವು.

ಭಾರತ ಸರ್ಕಾರ 2012ರಿಂದಲೇ ಈ ತಾಮ್ರಶಾಸನಗಳ ವಾಪಸಾತಿಗಾಗಿ ಪ್ರಯತ್ನ ಆರಂಭಿಸಿತ್ತು. UNESCO ಬೆಂಬಲಿತ ಅಂತಾರಾಷ್ಟ್ರೀಯ ಸಮಿತಿಗಳಲ್ಲಿಯೂ ಭಾರತ ಈ ವಿಷಯವನ್ನು ಮುಂದಿಟ್ಟಿತ್ತು. 2023ರಲ್ಲಿ ನಡೆದ ಸಭೆಯಲ್ಲಿ ಭಾರತ ಪರವಾದ ವಾದಗಳಿಗೆ ಬೆಂಬಲ ವ್ಯಕ್ತವಾದ ಬಳಿಕ ನೆದರ್‌ಲ್ಯಾಂಡ್ಸ್ ಸರ್ಕಾರ ಹಸ್ತಾಂತರ ಪ್ರಕ್ರಿಯೆಗೆ ಒಪ್ಪಿಗೆ ನೀಡಿತ್ತು.

ಪುರಾತತ್ವ ತಜ್ಞರ ಪ್ರಕಾರ, ಈ ಶಾಸನಗಳು ಚೋಳರ ಆಡಳಿತ ವ್ಯವಸ್ಥೆ, ಧಾರ್ಮಿಕ ಸಹಿಷ್ಣುತೆ ಮತ್ತು ಸಮುದ್ರ ವ್ಯಾಪಾರದ ಬಗ್ಗೆ ಅಧ್ಯಯನಕ್ಕೆ ಅತ್ಯಂತ ಮುಖ್ಯ ದಾಖಲೆಗಳಾಗಿವೆ. “ಇವು ಕೇವಲ ತಾಮ್ರ ಫಲಕಗಳಲ್ಲ; ಭಾರತದ ಸಾಂಸ್ಕೃತಿಕ ಸ್ಮೃತಿ” ಎಂದು ಹಲವರು ಅಭಿಪ್ರಾಯಪಟ್ಟಿದ್ದಾರೆ.

ತಮಿಳುನಾಡಿನಲ್ಲಿ ಈ ಬೆಳವಣಿಗೆಗೆ ಭಾರೀ ಸಂತಸ ವ್ಯಕ್ತವಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಅನೇಕರು “ಇದು ತಮಿಳು ಪರಂಪರೆಯ ಗೆಲುವು” ಎಂದು ಪ್ರತಿಕ್ರಿಯಿಸಿದ್ದಾರೆ. ಕೆಲ ಇತಿಹಾಸಾಸಕ್ತರು ಮತ್ತು ಸಂಸ್ಕೃತಿ ಹೋರಾಟಗಾರರು, ವಿದೇಶಗಳಲ್ಲಿ ಇರುವ ಇನ್ನಷ್ಟು ಭಾರತೀಯ ಪುರಾತನ ವಸ್ತುಗಳನ್ನು ಕೂಡ ಮರಳಿ ತರಲು ಸರ್ಕಾರ ಮುಂದಾಗಬೇಕು ಎಂದು ಒತ್ತಾಯಿಸಿದ್ದಾರೆ.

ಇತ್ತೀಚಿನ ವರ್ಷಗಳಲ್ಲಿ ಭಾರತ ತನ್ನ ಕಳವಾಗಿದ್ದ ಅಥವಾ ವಿದೇಶಗಳಿಗೆ ಸಾಗಿಸಲಾಗಿದ್ದ ಅನೇಕ ಪುರಾತನ ವಸ್ತುಗಳನ್ನು ಮರಳಿ ಪಡೆಯಲು ಯಶಸ್ವಿಯಾಗಿದೆ. ಅಮೆರಿಕ, ಆಸ್ಟ್ರೇಲಿಯಾ ಮತ್ತು ಯುರೋಪಿನ ಹಲವು ದೇಶಗಳಿಂದ ಮೂರ್ತಿಗಳು, ಪುರಾತನ ಕಲಾಕೃತಿಗಳು ಮತ್ತು ಶಾಸನಗಳನ್ನು ಭಾರತಕ್ಕೆ ಹಿಂತಿರುಗಿಸಲಾಗಿದೆ. ಈಗ ಚೋಳರ ತಾಮ್ರಶಾಸನಗಳ ವಾಪಸ್ಸು ಆ ಪ್ರಯತ್ನಗಳಿಗೆ ಮತ್ತೊಂದು ದೊಡ್ಡ ಯಶಸ್ಸಾಗಿ ಪರಿಗಣಿಸಲಾಗಿದೆ,(ಏಜೆನ್ಸೀಸ್​).