ಮಹಾತ್ಮ ಗಾಂಧೀಜಿಯವರ ವೇಷದಲ್ಲಿ ಬಂದು ಕರೊನಾ ತಪಾಸಣೆ ಮಾಡಿಸಿಕೊಂಡ ಬಾಲಕ

ಗುಜರಾತ್​ನ ರಾಜಕೋಟ್​ನಲ್ಲಿ 10 ವರ್ಷದ ಬಾಲಕನೋರ್ವ ಮಹಾತ್ಮ ಗಾಂಧೀಜಿಯವರಂತೆ ವೇಷ ಧರಿಸಿ, ಕೊವಿಡ್​-19 ತಪಾಸಣೆಗೆ ಒಳಗಾಗಲು ಆಗಮಿಸಿದ್ದು ಗಮನಸೆಳೆದಿದೆ.

ಅಕ್ಟೋಬರ್​ 2ರಂದು ಗಾಂಧಿ ಜಯಂತಿ ಇರುವ ನಿಮಿತ್ತ, ಅವರಂತೆ ವೇಷ ಧರಿಸಿ ಕರೊನಾ ಬಗ್ಗೆ ಅರಿವು ಮೂಡಿಸುವ ಸಲುವಾಗಿ ಈ ಬಾಲಕ ಹೀಗೆ ಬಂದಿದ್ದ ಎಂದು ಹೇಳಲಾಗಿದೆ. ಗಾಂಧೀಜಿಯವರಂತೆ ಆಗಮಿಸಿ ಕರೊನಾ ಟೆಸ್ಟ್​ಗೆ ಒಳಗಾದ ಬಾಲಕನ ಫೋಟೋಗಳು, ವಿಡಿಯೋಗಳು ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟೆ ವೈರಲ್​ ಆಗಿದ್ದು, ನೆಟ್ಟಿಗರಿಂದ ಮೆಚ್ಚುಗೆಯನ್ನೂ ಪಡೆದಿದೆ. ಇದನ್ನೂ ಓದಿ: ಮಾಸ್ಕ್‌ ಧರಿಸದೇ ಇದ್ದರೆ 1000 ರೂ. ದಂಡ; ಗ್ರಾಮೀಣ ಭಾಗದಲ್ಲಿ 500 ರೂ. ಫೈನ್!

ಬಿಳಿ ಬಣ್ಣದ ಧೋತಿ ಧರಿಸಿ, ಮೈತುಂಬ ಶಾಲು ಹೊದ್ದು, ಕನ್ನಡಕ ಧರಿಸಿ, ಕೋಲು ಹಿಡಿದು ಬಂದ ಪುಟ್ಟ ಬಾಲಕ ಪಕ್ಕಾ ಗಾಂಧೀಜಿಯವರಂತೆ ಕಾಣುತ್ತಿದ್ದ. ಅವನೊಂದಿಗೆ ಪುಟ್ಟ ಬಾಲಕಿಯೂ ಸೀರೆ ಉಟ್ಟು ಬಂದಿದ್ದಳು. ಈ ವೇಳೆ ಮಾಧ್ಯಮವೊಂದರ ಜತೆ ಮಾತನಾಡಿದ ಬಾಲಕ, ಜನರು ಕರೊನಾಕ್ಕೆ ಹೆದರುವ ಅಗತ್ಯವಿಲ್ಲ. ಪ್ರತಿಯೊಬ್ಬರೂ ತಪಾಸಣೆಗೆ ಒಳಗಾಗಬೇಕು ಎಂಬ ಅರಿವು ಮೂಡಿಸುವ ಸಲುವಾಗಿ ಹೀಗೆ ಬಂದಿದ್ದೇನೆ ಎಂದು ಹೇಳಿಕೊಂಡಿದ್ದಾನೆ. ಅಲ್ಲದೆ, ನಾನು ನನ್ನ ಸ್ವಾಬ್​ನ್ನು ಟೆಸ್ಟ್​ಗೆ ನೀಡಿದ್ದೇನೆ. ಕರೊನಾ ವಿರುದ್ಧ ಹೋರಾಟದಲ್ಲಿ ಎಲ್ಲರೂ ಸಹಕರಿಸಿದರೆ ನಮ್ಮ ದೇಶ ಇನ್ನಷ್ಟು ಆರೋಗ್ಯಯುತವಾಗುತ್ತದೆ ಎಂದು ಹೇಳಿದ್ದಾನೆ. (ಏಜೆನ್ಸೀಸ್​)

https://www.vijayavani.net/tamil-nadu-extends-covid-19-lockdown-till-october-31/